ఆదివారం 29 మార్చి 2020
International - Feb 20, 2020 , 02:39:14

నిపుణులకే ఎర్రతివాచీ!

నిపుణులకే ఎర్రతివాచీ!
  • బ్రెగ్జిట్‌ నేపథ్యంలో బ్రిటన్‌ కొత్త వలస విధానం
  • ‘పాయింట్ల ఆధారిత వీసా’ వ్యవస్థకు రూపకల్పన
  • 70 పాయింట్లు ఉంటేనే వీసా
  • వచ్చే ఏడాది నుంచి అమలు

లండన్‌, ఫిబ్రవరి 19: యురోపియన్‌ యూనియన్‌ (ఈయూ) నుంచి బయటికి వస్తున్న నేపథ్యంలో బ్రిటన్‌ సరికొత్త వలస విధానాన్ని ప్రకటించింది. నైపుణ్యం ఉన్నవారిని మాత్రమే తమ దేశంలోకి అనుమతించేలా ‘పాయింట్ల ఆధారిత వీసా’ విధానాన్ని రూపొందించింది. బ్రిటన్‌ హోంమంత్రి, ప్రవాస భారతీయురాలు ప్రీతీపటేల్‌ బుధవారం ఈ విధానాన్ని వివరించారు. ‘ఇది ప్రపంచానికే చారిత్రాత్మకమైన రోజు. బ్రిటన్‌లోకి ఇష్టారీతిన వచ్చివెళ్లే విధానానికి అంతం పలుకుతున్నాం. మా సరిహద్దులను మా ఆధీనంలోకి తీసుకుంటున్నాం. ప్రజల ఆకాంక్షల మేరకు పాయింట్ల ఆధారిత వలస విధానాన్ని ప్రకటిస్తున్నాం. తద్వారా వలసదారులు తగ్గడంతోపాటు ప్రతిభ ఉన్నవారు, నైపుణ్యం కలిగినవారే బ్రిటన్‌కు వస్తారు’ అని ప్రీతీ పటేల్‌ పేర్కొన్నారు. కొత్త విధానం వచ్చే ఏడాది జనవరి 1వ తేదీ నుంచి అమల్లోకి వస్తుందన్నారు. 


చదువు, నైపుణ్యాలకు పాయింట్లు 

కొత్త విధానం ప్రకారం విద్యార్హతలు, నైపుణ్యాలు వంటివాటిని లెక్కించి పాయింట్లు కేటాయిస్తారు. విదేశీయులు కచ్చితంగా ఇంగ్లిష్‌లో మాట్లాడాలి. కంపెనీ నియామక పత్రం ఉండాలి. ఈ రెండింటికీ కలిపి 50 పాయింట్లు ఇస్తారు. విద్యార్హతలు, అదనపు నైపుణ్యాలు, జీతభత్యాలు, వృత్తి వంటివాటి ఆధారంగా అదనపు పాయింట్లు కేటాయిస్తారు. కనీసం 70 పాయింట్లు సాధించినవారికి మాత్రమే వీసా మంజూరు చేస్తారు. కనీస వార్షిక వేతనాన్ని 25,600 పౌండ్లుగా (రూ.23.75 లక్షలు) నిర్ధారించారు. గతంలో ఇది 30వేల పౌండ్లుగా (రూ.27.85 లక్షలు) ఉండేది. ప్రస్తుతం డిగ్రీ చదివినవారు కూడా వీసా కోసం దరఖాస్తు చేసుకోవచ్చు. కానీ, నూతన విధానం ప్రకారం కనీసం పీజీ లేదా సత్సమానమైన అర్హత కలిగి ఉండాలి. నూతన వలస విధాన బిల్లు పార్లమెంట్‌ ఆమోదం పొందాల్సి ఉన్నదన్నారు. 


శాస్త్రవేత్తలకు.. విద్యార్థులకు ప్రత్యేక పథకం 

‘ద గ్లోబల్‌ టాలెంట్‌ స్కీమ్‌' పేరుతో బ్రిటన్‌ నూతనంగా రూపొందించిన ఫాస్ట్‌-ట్రాక్‌ వీసా విధానం శుక్రవారం నుంచి అమల్లోకి రానున్నది. ఈయూ సభ్యదేశాలకు చెందిన శాస్త్రవేత్తలు, పరిశోధకులు వంటివారు ఎలాంటి ఉద్యోగ నియామకపత్రం లేకుండా స్వేచ్ఛగా బ్రిటన్‌కు వలస వచ్చేందుకు దీనికి రూపకల్పన చేశారు. బ్రిటన్‌లో చదువాలనుకునే విదేశీ విద్యార్థులకూ పాయింట్ల ఆధారిత నూతన వీసా విధానం రూపొందించినట్టు ప్రభుత్వం తెలిపింది. ప్రభుత్వ అనుమతి పొందిన విద్యాసంస్థలో చేరుతున్నట్టు పత్రాలు చూపించాలి. సొంతంగా చదువు పూర్తిచేసేందుకు తగిన ఆర్థిక స్థోమత ఉన్నదని నిరూపించాలి. కచ్చితంగా ఆంగ్లం మాట్లాడగలగాలి. అయితే ఈయూ పౌరులకు మాత్రం మినహాయింపు ఉంటుంది. 


ప్రశంసలు.. విమర్శలు 

బ్రిటన్‌ కొత్త వలస విధానంపై ప్రశంసలతోపాటు విమర్శలు కూడా వెల్లువెత్తుతున్నాయి. నూతన వీసా విధానం ‘ప్రతికూల వాతావరణాన్ని’ సృష్టిస్తుందని, కార్మికులను ఆకర్షించడం కష్టంగా మారుతుందని ప్రతిపక్ష లేబర్‌ పార్టీ విమర్శించింది. ‘జెనో ఫోబియా’ (విదేశీయుల పట్ల భయం) కారణంగానే ఈ విధానాన్ని రూపొందించారని డెమోక్రాట్‌ పార్టీ అధికార ప్రతినిధి క్రిస్టీన్‌ జాైర్డెన్‌ పేర్కొన్నారు. నూతన వీసా విధానాలు ప్రపంచవ్యాప్తంగా ఉన్న ప్రతిభావంతులను, శాస్త్రవేత్తలను, పరిశోధకులను ఆకర్షించవచ్చని లండన్‌లోని ఇంపీరియల్‌ కాలేజీ అధ్యక్షుడు ప్రొఫెసర్‌ అలైస్‌ గాస్ట్‌ ప్రశంసించారు.


logo