వెల్లింగ్టన్: కరోనాను సమర్థంగా అడ్డుకున్న న్యూజిలాండ్లో తొలి వ్యాక్సిన్ సంబంధిత మరణం సోమవారం నమోదైంది. ఫైజర్ వ్యాక్సిన్( Pfizer vaccine ) తీసుకున్న ఓ మహిళ చనిపోయినట్లు అక్కడి ఆరోగ్య మంత్రిత్వ శాఖ వెల్లడించింది. అయితే ఆ మహిళ వయసు ఎంత అన్నది మాత్రం చెప్పలేదు. ఫైజర్ వ్యాక్సిన్ వల్ల కలిగే అత్యంత అరుదైన అనర్థం అయిన మయోకార్డిటిస్ (గుండె కండరాల్లో ఇన్ఫ్లేమేషన్) వల్లే ఆ మహిళ చనిపోయినట్లు భావిస్తున్నారు. ఫైజర్ కొవిడ్-19 వ్యాక్సిన్ వల్ల న్యూజిలాండ్లో సంభవించిన తొలి మరణంగా తన ప్రకటనలో చెప్పింది.
సదరు మహిళ ఇప్పటికే పలు ఆరోగ్య సమస్యలను ఎదుర్కొంటోందని ఆరోగ్య శాఖ తెలిపింది. అయితే ఫైజర్ వ్యాక్సిన్ వల్ల కలిగే అనర్థాల కంటే ప్రయోజనాలే అధికంగా ఉన్నట్లు కూడా స్పష్టం చేసింది. ఇప్పటి వరకూ న్యూజిలాండ్లో ఫైజర్తోపాటు జాన్సెన్, ఆస్ట్రాజెనెకా వ్యాక్సిన్లకు అనుమతి ఇచ్చారు. అయితే సాధారణ ప్రజలకు ఇవ్వడానికి మాత్రం ఇప్పటికైతే ఫైజర్కు మాత్రమే అనుమతి ఉంది.