Iran Leadership | ఇరాన్ నాయకత్వంలో అంతర్యుద్ధం.. అబ్బాస్‌ అరాగ్చీని తొలగించాలన్న ఇరాన్ అధ్యక్షుడు, స్పీకర్

Iran Leadership : ఇరాన్ నాయకత్వంలో అంతర్యుద్ధం మొదలైనట్లు కనిపిస్తోంది. అయతొల్లా ఖమేనీ మరణం తర్వాత ఆ దేశానికి నాయకత్వ సమస్య వేధిస్తుంది.

Iran Leadership : ఇరాన్ నాయకత్వంలో అంతర్యుద్ధం మొదలైనట్లు కనిపిస్తోంది. అయతొల్లా ఖమేనీ మరణం తర్వాత ఆ దేశానికి నాయకత్వ సమస్య వేధిస్తుంది. ఇప్పుడు ఇరాన్‌ను నడిపిస్తున్న వారి మధ్య విబేధాలు కూడా మొదలయ్యాయి. ఇరాన్ విదేశాంగ మంత్రి అబ్బాస్ అరాగ్చీని తొలగించాలని ఆ దేశ అధ్యక్షుడు మసౌద్ పెజెష్కియన్, పార్లమెంట్ స్పీకర్ మొహమ్మద్ బాగర్ ఘలిబాఫ్ కోరుతున్నారు. ఇరాన్‌కు సంబంధించిన అనేక వ్యవహారాల్లో అబ్బాస్ స్వతంత్రంగా వ్యవహరిస్తుండటమే ఇందుకు కారణంగా తెలుస్తోంది.

ఆయన ఏ నిర్ణయం తీసుకున్నా.. ఇరాన్ అధ్యక్షుడు, ఇతర నేతల్ని సంప్రదించడం లేదు. అలాగే, ఇరాన్ సైనిక సంస్థ అయిన ఐఆర్‌‌జీసీతో సన్నిహితంగా ఉంటున్నారు. ఆ సంస్థతో కలిసి అబ్బాస్ స్వతంత్రంగా నిర్ణయాలు తీసుకుంటున్నారు. అమెరికాతో అణు చర్చల అంశంలో కూడా అబ్బాస్ సొంతంగా నిర్ణయాలు తీసుకుంటున్నారు. ఆయన ఏ సమాచారాన్ని అధ్యక్షుడు, పార్లమెంట్ స్పీకర్, ఇతర నేతలతో పంచుకోవడం లేదు. అంతేకాదు, ఐఆర్‌‌జీసీ కమాండర్ అహ్మద్ వాహిదితో సన్నిహితంగా ఉంటున్నారు. ఆయనను మాత్రమే సంప్రదిస్తూ అణు చర్చల అంశంలో కీలకంగా వ్యవహరిస్తున్నారు.

దీంతో ఇరాన్‌ అధ్యక్షుడు సహా ఇతర​అగ్రనాయకత్వం అబ్బాస్ అరాగ్చీపై ఆగ్రహంతో ఉంది. ఈ నేపథ్యంలోనే అరాగ్చీని విదేశాంగ మంత్రి పదవి నుంచి తొలగించాలని వారంతా భావిస్తున్నారు. ఇందుకు సంబంధించిన సాధ్యాసాధ్యాలను పరిశీలిస్తున్నట్లు తెలుస్తోంది. అబ్బాస్ వైఖరి ఇలాగే కొనసాగితే కచ్చితంగా ఆయనను తొలగించాలని వారు నిర్ణయించారు. అయితే, ఈ అంశంపై ఎలాంటి అధికారిక ప్రకటన మాత్రం వెలువడలేదు. ఇరాన్‌లో ప్రస్తుతం ఉన్న నాయకత్వంలో అంతర్గత విబేధాలు ఇదే మొదటిసారి కాదు. ఖమేనీ మరణం తర్వాత నుంచి పలువురు నేతల మధ్య ఈ విబేధాలు కొనసాగుతున్నట్లు తెలుస్తోంది.

ముఖ్యంగా ఐఆర్‌‌జీసీ కమాండ్ వాహిదికి, అధ్యక్షుడు పెజెష్కియన్‌కు మధ్య బేధాభిప్రాయాలున్నాయి. ప్రస్తుతం కొనసాగుతున్న యుద్ధం, ఆర్థిక సంక్షోభం వంటి అంశాలు నాయకత్వంలో బేధాభిప్రాయాలకు కారణాలుగా విశ్లేషకులు చెబుతున్నారు. ప్రస్తుతం అంతర్యుద్ధం ఇరాన్‌లో ఎలాంటి పరిణామాలకు దారితీస్తుందో చూడాలి.