Bondi Beach Attack: సిడ్నీ బీచ్ అటాక్‌కు ముందు.. షూటింగ్ ప్రాక్టీస్‌ చేసిన నిందితులు

Bondi Beach Attack: బాండీ బీచ్‌లో దాడికి పాల్ప‌డిన తండ్రీకొడుకులు ఇద్ద‌రూ.. కొన్ని వారాల ముందు షూటింగ్ ప్రాక్టీస్ చేసిన‌ట్లు ఆస్ట్రేలియా పోలీసులు కోర్టులో చెప్పారు. దానికి సంబంధించిన డాక్యుమెంట్ల‌ను ప్ర‌జెంట్ చేశారు. దాడి రోజున కాల్పుల‌కు ముందు పేలుడు ప‌దార్ధాన్ని కూడా వాడిన‌ట్లు చెప్పారు.

సిడ్నీ : ఆస్ట్రేలియాలోని సిడ్నీ న‌గ‌రంలో ఉన్న బాండీ బీచ్(Bondi Beach Attack) వ‌ద్ద డిసెంబ‌ర్ 14వ తేదీన హ‌నుకా సంబ‌రాలు జ‌రుపుకుంటున్న యూదుల‌పై ఇస్లామిక్ తీవ్ర‌వాదులు కాల్పులు జ‌రిపిన విష‌యం తెలిసిందే. ఆ కాల్పుల్లో 15 మంది మ‌ర‌ణించారు. అయితే అనుమానిత సాయుధులు… ఆ బీచ్ వ‌ద్ద ముందుగా పేలుడు ప‌దార్థాలు వినియోగించిన‌ట్లు తెలుస్తోంది. ఇక ఆ అటాక్ ప్లానింగ్‌కు ముందు చాన్నాళ్లు ఆ సాయుధులు షూటింగ్ ప్రాక్టీస్ చేసినట్లు కూడా ఆస్ట్రేలియా పోలీసులు కోర్టులో పేర్కొన్నారు. దీనికి సంబంధించిన ఆధారాల‌ను కోర్టు ముందు పొందుప‌రిచారు.

బోండీ బీచ్ అటాక్‌లో డ‌జ‌న్ల సంఖ్య‌లో జ‌నం గాయ‌ప‌డ్డారు. వాస్త‌వానికి ఆ సాయుధులు వాడిన టెన్నిస్ బాల్ బాంబు చివ‌రి నిమిషంలో పేల‌లేద‌ని తెలిసింది. 24 ఏళ్ల నిందితుడు న‌వీద్ అక్ర‌మ్‌పై 59 అభియోగాలు న‌మోదు చేశారు. రెండ‌వ గ‌న్‌మెన్ సాజిద్ అక్ర‌మ్‌.. పోలీసుల కాల్పుల్లో మృతిచెందిన విష‌యం తెలిసిందే. కోర్టు డాక్యుమెంట్ల ప్ర‌కారం.. ఆ తండ్రీకొడుకులు ఇద్ద‌రూ .. కొన్ని నెల‌ల ముందే అటాక్ కోసం క్షుణ్ణంగా ప్లాన్ చేసిన‌ట్లు తెలుస్తున్న‌ది.

దాడికి రెండు రోజుల ముందు ఆ ఇద్ద‌రూ బాండీ బీచ్ వ‌ద్ద రెక్కీ వేసిన‌ట్లు తెలిసింది. నిందితుల‌కు చెందిన ఫోన్ల‌లో ఉన్న ఫోటోలు, వీడియోల‌ను పోలీసులు సీజ్ చేశారు. వాటిని కోర్టులో ప్ర‌జెంట్ చేశారు. ఇస్లామిక్ స్టేట్ గ్రూపుకు చెందిన జెండా ముందు కూర్చున్న ఆ ఇద్ద‌రు స్టేట్మెంట్ చేసిన‌ట్లు ఓ వీడియోలో ఉన్న‌ది. ఖురాన్‌లోని కొన్ని అర‌బిక్ పంక్తుల‌ను న‌వీద్ అక్ర‌మ్ వ‌ల్ల‌వేసిన‌ట్లు తెలుస్తున్న‌ది. ఆస్ట్రేలియాలోని మారుమూల గ్రామంలో తండ్రీకొడుకులిద్ద‌రూ షూటింగ్ ప్రాక్టీస్ చేశారు.

న్యూ సౌత్ వేల్స్‌లోని మారుమూల ప్ర‌దేశంలో వాళ్లు ఫైరింగ్ ప్రాక్టీస్ చేసిన‌ట్లు ఓ వీడియోలో గుర్తించారు. దాడికి రెండు రోజుల ముందు బాండీ బీచ్‌కు వ‌చ్చి త‌మ టెర్ర‌ర్ అటాక్ ప్లానింగ్ చేసిన‌ట్లు ఆరోప‌ణ‌లు ఉన్నాయి. దాడికి ముందు ఆ ఇద్ద‌రూ ఫిలిప్పీన్స్‌కు కూడా వెళ్లినట్లు ఆస్ట్రేలియా పోలీసులు అనుమానిస్తున్నారు. తీవ్ర‌వాదానికి కేంద్ర‌మైన ఫిలిప్పీన్స్‌లోని ఓ ప్ర‌దేశానికి ఇద్ద‌రూ వెళ్లి వ‌చ్చిన‌ట్లు ఆసీస్ పోలీసులు తేల్చారు.