అమెరికా : అగ్ర రాజ్యం అమెరికా మాజీ అధ్యక్షుడు బిల్ క్లింటన్(75) అస్వస్థతకు గురయ్యారు. మంగళవారం ఓ ప్రయివేటు కార్యక్రమానికి హాజరైన క్లింటన్.. స్వల్ప అనారోగ్యానికి గురైనట్లు తన సిబ్బందికి చెప్పాడు. దీంతో మాజీ అధ్యక్షుడిని చికిత్స నిమిత్తం కాలిఫోర్నియాలోని ఇర్విన్ మెడికల్ సెంటర్లో చేర్పించి, చికిత్స అందిస్తున్నారు. ప్రస్తుతం క్లింటన్ ఆరోగ్య పరిస్థితి నిలకడగా ఉందని వైద్యులు తెలిపారు. యూరిన్ ఇన్ఫెక్షన్ వల్లే క్లింటన్ అనారోగ్యానికి గురయ్యారని, ఇది వయసు పైబడిన వారిలో సాధారణంగా వచ్చే సమస్యే అని వైద్యులు స్పష్టం చేశారు. డాక్టర్ అల్పేస్ అమీన్, డాక్టర్ లిసా బార్డాక్ నేతృత్వంలో క్లింటన్కు చికిత్స కొనసాగుతోంది.
క్లింటన్కు 2004లో బైపాస్ హార్ట్ సర్జరీ నిర్వహించారు. 2010లో రెండు స్టెంట్లు కూడా వేశారు. కానీ ఆయనకు ఎలాంటి గుండె సమస్య కానీ, కొవిడ్ ఇన్ఫెక్షన్ కానీ లేదని డాక్టర్లు స్పష్టం చేశారు. 1993 నుంచి 2001 మధ్య అమెరికాకు 42వ ప్రెసిడెంట్గా బిల్ క్లింటన్ సేవలందించారు.