పల్లె ప్రగతి

ప్రగతి పథంలో పల్లెలు దూసుకెళ్తున్నాయి. రాష్ట్ర ఏర్పాటు అనంతరం పల్లెలకు మహర్దశ వచ్చింది. ప్రభుత్వం అనేక నిధులు కేటాయించి అభివృద్ధి పనులు చేపట్టడంతో పల్లెల రూపురేఖలు మారిపోయాయి.

• పట్టణాలకు దీటుగా సౌకర్యాలు
• గ్రామాల్లో మౌలిక వసతులకు పెద్దపీట
• ఇంటింటికీ తాగునీరు..ప్రతి గ్రామానికి రోడ్డు
• ఆహ్లాదాన్ని పంచుతున్న పచ్చని వనాలు
• యువతకు క్రీడలు.. పల్లె దవాఖానలు

మేడ్చల్‌, జూన్‌14(నమస్తే తెలంగాణ): ప్రగతి పథంలో పల్లెలు దూసుకెళ్తున్నాయి. రాష్ట్ర ఏర్పాటు అనంతరం పల్లెలకు మహర్దశ వచ్చింది. ప్రభుత్వం అనేక నిధులు కేటాయించి అభివృద్ధి పనులు చేపట్టడంతో పల్లెల రూపురేఖలు మారిపోయాయి. ప్రతి పల్లెలో మంచినీటి సౌకర్యం, రోడ్లు, డంపింగ్‌యార్డులు, పల్లె ప్రకృతి వనాలు, వైకుంఠధామాలు, కమ్యునిటీ భవనాల నిర్మాణాలను మేడ్చల్‌-మల్కాజిగిరి జిల్లాలోని 61 గ్రామాల్లో చేపట్టారు. 2022-23 ఆర్థిక సంవత్సరానికి గాను రూ. 7 కోట్ల 16 లక్షల 89 వేల నిధులను పల్లెల అభివృద్ధికి ప్రభుత్వం మంజూరు చేసింది. ప్రతి ఏడాది పల్లెల అభివృద్ధికి మరిన్ని ప్రత్యేక నిధులతో పాటు ఎమ్మెల్యే నిధులు, జడ్పీ నిధులు రూ. 10 కోట్లు వెచ్చిస్తున్నారు. ప్రతి ఆర్థిక సంవత్సరంలో రూ. 18 కోట్ల నిధులతో గ్రామాల్లో అభివృద్ధి పనులు చేపడుతున్నారు.

• జిల్లాలోని 61 గ్రామపంచాయతీల్లో 20 అనుబంధ గ్రామాల్లో 81 పల్లె ప్రకృతి వనాలను ఏర్పాటు చేశారు.
• ప్రతి సంవత్సరం హరితహారం కార్యక్రమంలో భాగంగా పల్లె ప్రకృతి వనాలకు అవసరమయ్యే మొక్కలను 61 నర్సరీల ద్వారా ఏర్పాటు చేశారు.
• పల్లె ప్రకృతి వనాలతో పాటు 5 గ్రామాల్లో బృహత్‌ పల్లె ప్రకృతి వనాలను 10 ఎకరాల విస్తీర్ణంలో ఏర్పాటు చేశారు.
• 61 గ్రామపంచాయతీల్లో డంపింగ్‌ యార్డులను ఏర్పాటు చేసి పల్లెల్లో ఉత్పత్తి అయ్యే చెత్తనంతా డంపింగ్‌యార్డులకు తరలిస్తున్నారు.
• జిల్లాలోని 61 గ్రామపంచాయతీల్లో సకల సదుపాయాలతో వైకుంఠధామాలు నిర్మించారు.
• 2022-23 ఆర్థిక సంవత్సరంలో పన్నుల వసూళ్లు రూ. 22.65 కోట్లు ఉండగా… రూ. 21.51 కోట్లు వసూలు చేసి 95.51శాతం పన్నులు రాబట్టారు.
• మిషన్‌ భగీరథ పథకం ద్వారా గ్రామాల్లో సురక్షిత మంచినీటిని అందిస్తున్నారు.
• క్రీడలను ప్రోత్సహిస్తూ గ్రామాల్లో ఇప్పటి వరకు 50 క్రీడా ప్రాంగణాలను ఏర్పాటు చేశారు. మరో 11 క్రీడా ప్రాంగణాలకు స్థల పరిశీలన చేపట్టారు.
• జిల్లా ప్రజలకు సరైన వైద్యం అందించేందుకు 70 పల్లె దవాఖానలు ఏర్పాటు చేశారు. ఈ దవాఖానల్లో ఎంబీబీఎస్‌ వైద్యులతో పాటు ఏఎన్‌ఎం అందుబాటులో ఉండి వైద్య సేవలందిస్తున్నారు.
• సీఎం కేసీఆర్‌ దత్తత మండలం మూడుచింతలపల్లిలోని కేశవరం, లక్ష్మాపూర్‌, మూడుచింతలపల్లిలో రూ. 69 కోట్ల నిధులతో 112 అభివృద్ధి పనులు చేపట్టారు.

పల్లె ప్రగతికి సీఎం కృషి

పల్లెలు ప్రగతికి పట్టుగొమ్మలని ముఖ్యమంత్రి కేసీఆర్‌ గుర్తించారు. తెలంగాణ రాష్ట్రం ఏర్పాటు అనంతరం ముఖ్యమంత్రి పల్లెల అభివృద్ధిపై ప్రత్యేక దృష్టి సారించారు. గ్రామాల్లో పర్యావరణ పరిరక్షణకు పల్లె ప్రకృతి వనాలు, డంపింగ్‌యార్డులను నిర్మించి ఆహ్లాదకరమైన వాతావరణం కల్పించారు. పట్టణాలకు దీటుగా గ్రామాలను అభివృద్ధి చేశారు.
– కొంతం వెంకట్‌రెడ్డి, సర్పంచ్‌, కాచవాని సింగారం

పల్లెలన్నీ అభివృద్ధి చెందాయి..

రాష్ట్ర ఏర్పాటు అనంతరం పల్లెలన్నీ అభివృద్ధి చెందాయి. పట్టణాల్లో ఉన్న సౌకర్యాలను పల్లెల్లో కల్పిస్తున్నారు. తాగునీటికి ఇబ్బందులు తొలగి ప్రకృతి వనాలతో పల్లెలన్నీ పచ్చందాలతో కనువిందు చేస్తున్నాయి. పల్లెల పై పట్టుఉన్న కేసీఆర్‌ రాష్ర్టానికి ముఖ్యమంత్రిగా ఉండటం అదృష్టంగా భావిస్తున్నాం.
-రామకృష్ణారెడ్డి, రైతు, కాచవాని సింగారం