కొనసాగుతున్న దరఖాస్తుల స్వీకరణ

జీహెచ్‌ఎంసీ సర్కిల్‌ -18 పరిధిలో రెండో రోజు ప్రజాపాలన దరఖాస్తుల స్వీకరణ కార్యక్రమం కొనసాగింది.

• సర్కిల్‌-18 పరిధిలో 16293 దరఖాస్తులు 
• ఆధార్‌ కార్డుల కోసం జనం పరుగులు

బంజారాహిల్స్‌/బేగంపేట్‌/బన్సీలాల్‌పేట్‌,డిసెంబర్‌ 29: జీహెచ్‌ఎంసీ సర్కిల్‌ -18 పరిధిలో రెండో రోజు ప్రజాపాలన దరఖాస్తుల స్వీకరణ కార్యక్రమం కొనసాగింది. బంజారాహిల్స్‌, జూబ్లీహిల్స్‌, వెంకటేశ్వరకాలనీ, షేక్‌పేట డివిజన్ల పరిధిలో ఏర్పాటు చేసిన 16 కౌంటర్లలో అభయహస్తం పథకాల కోసం దరఖాస్తులను స్వీకరించారు.

• తొలిరోజు జీహెచ్‌ఎంసీ సర్కిల్‌-18 పరిధిలో అభయ హస్తం కోసం 4,730 దరఖాస్తులు రాగా 657 దరఖాస్తులు రేషన్‌ కార్డులు ఇతర సమస్యలపై వచ్చాయి.
• శుక్రవారం 7008 దరఖాస్తులు అభయ హస్తంలోని పథకాల కోసం వచ్చాయి. మరో 1620 దరఖాస్తులు రేషన్‌ కార్డులు,ఇతర సమస్యలను తీర్చాలని వచ్చాయి. మొత్తం మీద ఇప్పటివరకు అభయహస్తం కోసం సర్కిల్‌ పరిధిలో 14015 దరఖాస్తులు వచ్చాయి.
• రేషన్‌ కార్డులు, ఇతర వినతిపత్రాలు 2277 వచ్చాయని డీఎంసీ ప్రశాంతి తెలిపారు.
• అభయహస్తం పథకాలు పొందడానికి ఆధార్‌ కార్డు కచ్చితంగా ఉండాలని నిబంధన ఉండడంతో గతంలో ఆధార్‌ కార్డులో తమ కుటుంబ పేర్ల నమోదు కోసం మీసేవ కేంద్రాల వద్ద బారులు తీరుతున్నారు.
• బేగంపేట్‌ సర్కిల్‌ పరిధిలో..కాంగ్రెస్‌ ప్రభుత్వం పేద ప్రజల సంక్షేమ కోసం ఇచ్చిన గ్యారెంటీల అమలు కోసం అర్హులైన లబ్ధిదారుల నుంచి దరఖాస్తుల స్వీకరణ రెండో రోజు కూడా బేగంపేట్‌ సర్కిల్‌ పరిధిలో నిర్వహించారు.ఈ కేంద్రాలను బేగంపేట్‌ కార్పొరేటర్‌ మహేశ్వరి సందర్శించారు.
• ప్రజా పాలన సెంటర్‌లలో ప్రధానంగా గృహజ్యోతి, ఇందిరమ్మ ఇండ్లు, మహాలక్ష్మీ, రేషన్‌ కార్డుల కోసం దరఖాస్తులు అధికంగా వచ్చినట్లు అధికారులు వెల్లడించారు. బేగంపేట్‌ సర్కిల్‌ పరిధిలోని బేగంపేట్‌, రాంగోపాల్‌పేట్‌, మోండామార్కెట్‌, బన్సీలాల్‌పేట్‌ డివిజన్‌లలో ప్రత్యేక కౌంటర్‌లను ఏర్పాటు చేసి దరఖాస్తులను స్వీకరించారు.

అర్హులు సద్వినియోగం చేసుకోవాలి

బన్సీలాల్‌పేట్‌ డివిజన్‌లోని చాచా నెహ్రూనగర్‌లో ఏర్పాటు చేసిన ప్రజా పాలన అభయహస్తం దరఖాస్తుల స్వీకరణ కేంద్రాన్ని టీ.పీసీసీ కార్యదర్శి మర్రి ఆదిత్యారెడ్డి సందర్శించారు. ఈ కార్యక్రమంలో కాంగ్రెస్‌ పార్టీ నాయకులు ఎన్‌ విఠల్‌, నారాయణ, శ్రీనివాస్‌, డాక్టర్‌ శివకుమార్‌లాల్‌, కే హేమలతా, జగదీష్‌, సురేశ్‌, రాజేందర్‌, దశరథ్‌, మాజీ కార్పొరేటర్‌ ఆయూబ్‌ఖాన్‌ తదితరులు పాల్గొన్నారు.