ప్రగతి సంబురాలు

తెలంగాణ స్వయం పాలన తొమ్మిదేండ్లు పూర్తి చేసుకుని పదో వసంతంలోకి అడుగిడుతున్న శుభ సందర్భంలో దశాబ్ది వేడుకలను నేటి నుంచి 22వ తేదీ వరకు అంగరంగ వైభవంగా నిర్వహించేందుకు అధికార యంత్రాంగం అన్ని ఏర్పాట్లు పూర్తి చేసింది. జీహెచ్‌ఎంసీ చేసిన వివిధ పనులు, ప్రాజెక్టుల గురించి విస్తృత ప్రచారం చేయనున్నారు.

• నేటి నుంచి దశాబ్ది ఉత్సవాలు

సిటీబ్యూరో, జూన్‌ 1 (నమస్తే తెలంగాణ): తెలంగాణ స్వయం పాలన తొమ్మిదేండ్లు పూర్తి చేసుకుని పదో వసంతంలోకి అడుగిడుతున్న శుభ సందర్భంలో దశాబ్ది వేడుకలను నేటి నుంచి 22వ తేదీ వరకు అంగరంగ వైభవంగా నిర్వహించేందుకు అధికార యంత్రాంగం అన్ని ఏర్పాట్లు పూర్తి చేసింది. జీహెచ్‌ఎంసీ చేసిన వివిధ పనులు, ప్రాజెక్టుల గురించి విస్తృత ప్రచారం చేయనున్నారు. గతానికి, ఇప్పటికి ఉన్న పరిస్థితులను, జరిగిన అభివృద్ధిని ఫొటోలు సహా ‘నాడు-నేడు’ పేరిట ఫ్లెక్సీల ద్వారా వివరించడంతో పాటు బ్రోచర్లు వేసి పంచాలని అధికారులకు సూచించారు. నగరంలో పెరిగిన మౌలిక వసతుల సదుపాయాల్ని, మెరుగుపడిన పచ్చదనం, పారిశుద్ధ్యం తదితర కార్యక్రమాలను వివరించడంతో పాటు పట్టణాభివృద్ధిలో జాతీయ స్థాయిలో సాధించిన అవార్డుల వివరాలు, డంప్‌ యార్డులు, ఇలా నగరంలో జరిగిన అన్ని కార్యక్రమాలను భారీ ఎత్తున ప్రచారం చేయనున్నారు. ముఖ్యంగా తెలంగాణ ప్రభుత్వం అమలు చేస్తున్న ప్రజా సంక్షేమ కార్యక్రమాలను విస్తృతంగా ప్రజల్లోకి తీసుకు వెళ్లేందుకు ఆయా శాసనసభ్యులు, ఎమ్మెల్సీలు, ఇతర ప్రజాప్రతినిధులు ఈ ఉత్సవాల్లో భాగస్వామ్యం చేస్తున్నారు.

ఉత్సవాల్లో ముఖ్యమైనవి

• నేడు రాష్ట్ర అవతరణ దినోత్సవాలు నిర్వహిస్తారు. మంత్రులు పతాక వందనం, దశాబ్ది ఉత్సవాలపై ప్రసంగిస్తారు.
• హైదరాబాద్‌, రాచకొండ, సైబరాబాద్‌ పోలీస్‌ కమిషనరేట్ల పరిధిలోని కార్యక్రమాలు నిర్వహిస్తారు. నెక్లెస్‌రోడ్‌పై పెట్రోలింగ్‌ కార్స్‌, బ్లూ క్లాస్ట్‌కు ర్యాలీ, అంబేద్కర్‌ విగ్రహం ఎదుట పోలీస్‌ బ్యాండ్లతో ప్రదర్శన. పోలీస్‌ జాగృతి కళాకారుల బృందాలతో ప్రదర్శన, పోలీస్‌ జాగిలాల పరికరాలపై అవగాహన, పోలీసులు వాడుతున్న ఆధునాతన సాంకేతిక అంశాలు, బాడీ కెమెరాలు, బ్రీత్‌ అనలైజర్లు మొదలైన పరికరాలపై వివరిస్తారు.
• తెలంగాణ సుపరిపాలన దినోత్సవం సందర్భంగా వార్డు కార్యాలయాలను ప్రారంభించనున్నారు.
• రవీంద్రభారతిలో గంగా జమునా తెహజీబ్‌ ప్రతింబింబించేలా ఉర్దూ, తెలుగు కవులచే రాష్ట్ర స్థాయి కవి సమ్మేళనం.
• హైదరాబాద్‌లో నిర్మించిన స్కైవేలు, ఫ్లై ఓవర్లు, అండర్‌పాస్‌లు, వివిధ బ్రిడ్జిల నిర్మాణం, చెరువులు, పార్కుల అభివృద్ధి, మెట్రో రైలు విస్తరణ, రోడ్లు, నాలాల అభివృద్ధి పనులు, చారిత్రక ప్రదేశాల అభివృద్ధికి తీసుకున్న చర్యలపై వివరిస్తూ రవీంద్రభారతిలో సభ నిర్వహించనున్నారు
• హైదరాబాద్‌లో తాగునీటి ఎద్దడిని పరిష్కరించిన తీరు, భవిష్యత్‌ అవసరాలకు రింగు మెయిన్‌ నిర్మాణం, ఉచిత తాగునీటి సరఫరా విషయాలను వివరించనున్నారు.
• దేశానికే దిక్చూచిగా టీఎస్‌ బీపాస్‌ చట్టం తీసుకొచ్చిన సంగతి, తద్వారా సులువైన నిర్మాణం అనుమతుల ప్రక్రియ వంటి అంశాలను ప్రజలను వివరిస్తారు.