నగరం నడిబొడ్డున భీమ్‌ జాతర

నగరం నడిబొడ్డున సాగరతీరంలో ఆకాశమంత అద్భుతం ఆవిష్కృతమైంది. సామాజిక సమానత్వ స్ఫూర్తిని నింపుతూ.. జగమంతా కీర్తించేలా కన్నుల పండువగా శుక్రవారం విశ్వమానవ విజ్ఞానమూర్తి విగ్రహావిష్కరణ జరిగింది.

• విగ్రహాన్ని ఆవిష్కరించిన సీఎం కేసీఆర్‌,ప్రకాశ్‌ అంబేద్కర్‌
• అంబరమంత విగ్రహాన్ని చూసి సబ్బండవర్ణాల సంబురం
• హుస్సేన్‌ సాగరం జనమయం
• 125 అడుగుల అంబేద్కర్‌ విగ్రహావిష్కరణ
• మారుమోగిన జైభీమ్‌, జై కేసీఆర్‌ నినాదాలు

హైదరాబాద్‌/ సిటీబ్యూరో,ఏప్రిల్‌ 14 (నమస్తే తెలంగాణ) ;నగరం నడిబొడ్డున సాగరతీరంలో ఆకాశమంత అద్భుతం ఆవిష్కృతమైంది. సామాజిక సమానత్వ స్ఫూర్తిని నింపుతూ.. జగమంతా కీర్తించేలా కన్నుల పండువగా శుక్రవారం విశ్వమానవ విజ్ఞానమూర్తి విగ్రహావిష్కరణ జరిగింది. అంబేద్కర్‌ జయంతి రోజునే దేశంలోని మొట్టమొదటి భారీ అంబేద్కర్‌ విగ్రహాన్ని ముఖ్యమంత్రి కేసీఆర్‌, అంబేద్కర్‌ మనుమడు ప్రకాశ్‌ అంబేద్కర్‌ ఆవిష్కరించారు. ఈ చారిత్రక సువర్ణాధ్యాయంలో భాగమయ్యేందుకు రాష్ట్ర నలుమూలల నుంచి తరలివచ్చిన జన ప్రవాహంతో సాగరతీరం నీలి వర్ణ శోభితమైంది. 125 అడుగుల అంబేద్కరుడి సమున్నత స్వరూపాన్ని చూసి సబ్బండవర్ణాల హృదయాలు ఉప్పొంగాయి. బాబాసాహెబ్‌ ఆశయాలకు అసలైన నివాళి ఇదే అంటూ జనమంతా జయజయ ధ్వానాలు పలుకుతూ చప్పట్లతో హర్షం వ్యక్తం చేశారు. అక్కడే సెల్ఫీలు, ఫొటోలు దిగి తమ జీవితంలో మధుర జ్ఞాపకంగా మలుచుకున్నారు. అంబేద్కర్‌ విగ్రహావిష్కరణకు వచ్చిన అభిమానులకు హెచ్‌ఎండబ్ల్యూఎస్‌ అధికారులు నీళ్లు, మజ్జిగ అందించారు. ఎక్కడ ఇబ్బంది లేకుండా పోలీసులు పటిష్ట బందోబస్తు ఏర్పాటు చేశారు. కార్యక్రమం జరుగుతున్నంత సేపు జైభీమ్‌, జై కేసీఆర్‌ నినాదాలతో సభా ప్రాంగణ పరిసరాలు దద్ధరిల్లాయి. సామాజిక మాధ్యమాల్లోనూ అంబేద్కర్‌ విగ్రహ చిత్రాలు, జ్ఞాపకాలతో పోస్టులు చక్కర్లు కొట్టాయి.

సాగర తీరాన అద్భుతం ఆవిష్కృతమైంది. వందల ఏండ్ల వలస పాలనలో కునారిల్లిన దేశాన్నితన అద్భుతమైన మేధాశక్తితో మహోన్నతమైన రాజ్యాంగాన్ని రచించి దేశాభివృద్ధికి పాటుపడిన జ్ఞాన శిఖరం, ప్రపంచ మేధావి డా.బాబాసాహెబ్‌ అంబేద్కర్‌ జయంతి సందర్భంగా సీఎం కేసీఆర్‌, అంబేద్కర్‌ మనుమడు ప్రకాశ్‌ యశ్వంత్‌ అంబేద్కర్‌ శుక్రవారం దేశంలోనే అత్యంత ఎత్తయిన 125 అడుగుల అంబేద్కర్‌ విగ్రహాన్ని ఆవిష్కరించారు. ఈ అద్భుత ఘట్టానికి హైదరాబాద్‌ హుస్సేన్‌సాగర తీరం వేదికైంది. విగ్రహావిష్కరణ సందర్భంగా రాష్ట్ర ప్రభుత్వం అంబేద్కర్‌కు ప్రత్యేకంగా నివాళులు అర్పించింది. హెలికాప్టర్‌ ద్వారా అంబేద్కర్‌ విగ్రహంపై పూల వర్షం కురిపించారు. ఈ సందర్భంగా సీఎం కేసీఆర్‌ పిడికిలి బిగించి జై భీమ్‌ అంటూ నినదించారు. విగ్రహావిష్కరణ సందర్భంగా బౌద్ధ గురువులు ప్రత్యేక ప్రార్థనలు నిర్వహించారు. అనంతరం ప్రకాశ్‌ అంబేద్కర్‌తో కలిసి ముఖ్యమంత్రి కేసీఆర్‌ రిబ్బన్‌కత్తిరించి విగ్రహాన్ని ప్రారంభించారు. మహా విగ్రహం పాదాల చెంత సీఎం కేసీఆర్‌, ప్రకాశ్‌ అంబేద్కర్‌, శాసనమండలి చైర్మన్‌ గుత్తా సుఖేందర్‌రెడ్డి, స్పీకర్‌ పోచారం శ్రీనివాస్‌రెడ్డి, రాష్ట్ర మంత్రులు, అధికారులు, దళిత సంఘాల ప్రతినిధులు పుష్పాంజలి ఘటించారు. అనంతరం విగ్రహ నిర్మాణంపై రూపొందించిన డాక్యుమెంటరీని, అంబేద్కర్‌ జీవిత విశేషాలతో ఏర్పాటు చేసిన ఫొటో ఎగ్జిబిషన్‌ను సీఎం కేసీఆర్‌, ప్రకాశ్‌ అంబేద్కర్‌ సహా ముఖ్యనేతలు తిలకించారు.

• మధ్యాహ్నం 3:23 గంటలకు సీఎం కేసీఆర్‌ వాహనశ్రేణి అంబేద్కర్‌ స్మృతివనం ప్రాంగణానికి చేరుకున్నది.
• 3:24 గంటలకు సీఎం కేసీఆర్‌, ప్రకాశ్‌ అంబేద్కర్‌కు మంత్రులు కొప్పులు ఈశ్వర్‌, వేముల ప్రశాంత్‌రెడ్డి ఇతర ప్రజాప్రతినిధులు స్వాగతం పలికారు.బౌద్ధ గురువులు కండువాతో ప్రకాశ్‌ అంబేద్కర్‌ను,సీఎం కేసీఆర్‌ను స్వాగతించారు.
• 8 మంత్రులు కొప్పుల ఈశ్వర్‌, సబితాఇంద్రారెడ్డి, సత్యవతి రాథోడ్‌, ఎంపీ మాలోత్‌ కవిత, మేయర్లు గద్వాల విజయలక్ష్మి, గుండు సుధారాణి, జీహెచ్‌ఎంసీ డిప్యూటీ మేయర్‌ మోతే శ్రీలత, ఘంటా చక్రపాణితోపాటు అక్కడ ఉన్న ఇతర నేతలను ప్రకాశ్‌ అంబేద్కర్‌కు ముఖ్యమంత్రి కేసీఆర్‌ పరిచయం చేశారు.
• 3:25 గంటలకు ప్రముఖులు అందరూ కాంస్య విగ్రహం వద్దకు చేరుకోగా, సీఎం కేసీఆర్‌ అంబేద్కర్‌ స్మృతివనం ప్రత్యేకతలను ప్రకాశ్‌ అంబేద్కర్‌కు వివరించారు.
• 3:33 గంటలకు అంబేద్కర్‌ విగ్రహంపై హెలికాప్టర్‌తో పూలవర్షం కురిపించారు. ఈ సందర్భంగా హెలికాప్టర్‌ విగ్రహం పై భాగానికి చేరుకోగానే
  సీఎం కేసీఆర్‌ జై భీమ్‌ అంటూ నినదించారు.
• 3:34 గంటలకు సీఎం కేసీఆర్‌తోపాటు ఇతర ప్రముఖులు నడుస్తూ అభివాదం చేస్తూ ముందుకు సాగగా తొలుత బౌద్ధగురువులు సంగీత వాయిద్యాలతో వారిని స్వాగతించారు.
• 3:37 గంటలకు అంబేద్కర్‌ విగ్రహ శిలాఫలకం ముందు ప్రకాశ్‌ అంబేద్కర్‌,సీఎం కేసీఆర్‌ కొబ్బరికాయ కొట్టారు.
• 3:37 గంటలకు రిమోట్‌తో సీఎం కేసీఆర్‌ సమక్షంలో ప్రకాశ్‌ అంబేద్కర్‌ విగ్రహ శిలాఫకాన్ని ఆవిష్కరించారు.
• 3:39 గంటలకు రిబ్బన్‌ను కట్‌చేసి విగ్రహప్రాంగణాన్ని ప్రకాశ్‌ అంబేద్కర్‌, సీఎం కేసీఆర్‌ ప్రారంభించారు.
• 3:40 గంటలకు అంబేద్కర్‌ చిత్రపటం వద్ద బౌద్ధ గురువులను సీఎం కేసీఆర్‌ శాలువాలతో సన్మానించారు. బుద్ధుడి విగ్రహాన్ని, పుస్తకాలను బహూకరించారు.
•  3:42 గంటలకు బౌద్ధ గురువులు ప్రార్థనలు ప్రారంభించారు.
•  3:45 గంటలకు విగ్రహం ముందున్న అంబేద్కర్‌ చిత్రపటం వద్ద సీఎం కేసీఆర్‌, ప్రకాశ్‌ అంబేద్కర్‌ పుష్పాంజలి ఘటించి విగ్రహంపై పూలు చల్లారు. మంత్రులు, ఇతర ప్రజాప్రతినిధులు చిత్రపటంపై పుష్పాంజలి ఘటించారు.
• 3:48 గంటలకు అంబేద్కర్‌ జీవితంలోని ముఖ్య ఘట్టాలతో కూడిన ఛాయాచిత్రాన్ని ప్రదర్శించారు.
•  3:52 గంటలకు విగ్రహ పీఠ భాగంలోని థియేటర్‌లో విగ్రహ నిర్మాణం, విగ్రహ రూపకల్పనలోని వివిధ దశలపై రూపొందించిన డాక్యుమెంటరీని ప్రదర్శించారు.
•  సాగర తీరం జై భీమ్‌, జై కేసీఆర్‌ నినాదాలతో హోరెత్తింది.నీలి జెండాలు చేతబట్టుకొని, కండువాలు చేబూని చీమల దండులా అంబద్కర్‌ విగ్రహావిష్కరణకు అన్ని వర్గాలప్రజలు కదలివచ్చారు.
• పెద్ద ఎత్తున సభకు అన్ని వర్గాల ప్రజలు తరలిరావడంతో నెక్లెస్‌రోడ్డు మరో సాగరహారాన్ని తలపించింది.
• పలు ఎల్‌ఈడీ స్క్రీన్ల వద్ద అభిమానులు సెల్ఫీలు తీసుకుంటూ సందడి చేశారు.
• సభకు వచ్చిన వారికోసం హెచ్‌ఎండబ్ల్యూఎస్‌ అధికారులు నీళ్ల ప్యాకెట్లు, సల్ల ప్యాకెట్లతోపాటు వాటర్‌ బాటిల్స్‌ను పంపిణీ చేశారు.
• వేసవి కాలం కావడంతో ప్రతి గ్యాలరీకి కూలర్లు,ఫ్యాన్లను ఏర్పాటు చేసి ఎలాంటి ఇబ్బందులు లేకుండా చర్యలు తీసుకున్నారు.
• సభికులకు మిఠాయిపొట్లాలను పంపిణీ చేయడంతోపాటు పలు ప్రాంతాల్లో వైద్యశిబిరాల (మెడికల్‌ క్యాంప్‌)ను ఏర్పాటు చేశారు.
• వివిధ జిల్లాల నుంచి వచ్చే వారికోసం పట్టణ ప్రగతి మొబైల్‌ బయోటాయిలెట్లను ఏర్పాటు చేశారు.
• పోలీసులు కట్టుదిట్టమైన భద్రతను ఏర్పాటు చేసి, కార్యక్రమం ముగిసేవరకూ బందోబస్తు నిర్వహించి శెభాష్‌ అనిపించుకున్నారు.