స్కూల్‌ బస్సులు.. ఎంత సేఫ్‌!

బడిపిల్లల ప్రాణాలు డ్రైవర్లచేతుల్లో ఉన్నాయడనంలో ఎలాంటి సందేహం లేదు. విద్యా సంస్థల బస్సులు నడిపే డ్రైవర్లు మద్యం తాగి నడిపిస్తున్నారు. ఈ నిర్లక్ష్యం పిల్లల ప్రాణాలతో చెలగాటలాడమే అవుతుందని తల్లిదండ్రులు విద్యా సంస్థల నిర్వాహకులపై ఆగ్రహం వ్యక్తం చేస్తున్నారు.

• మద్యం మత్తులో వాహనాల డ్రైవర్లు
• నిబంధనలు పాటించని విద్యాసంస్థలు
• ఆర్టీఏ అధికారుల సూచనలు బేఖాతర్‌
• ఫిట్‌నెస్‌ పరీక్షకు రాని 3వేల బస్సులు

సిటీబ్యూరో, జూన్‌ 19 (నమస్తే తెలంగాణ) : బడిపిల్లల ప్రాణాలు డ్రైవర్లచేతుల్లో ఉన్నాయడనంలో ఎలాంటి సందేహం లేదు. విద్యా సంస్థల బస్సులు నడిపే డ్రైవర్లు మద్యం తాగి నడిపిస్తున్నారు. ఈ నిర్లక్ష్యం పిల్లల ప్రాణాలతో చెలగాటలాడమే అవుతుందని తల్లిదండ్రులు విద్యా సంస్థల నిర్వాహకులపై ఆగ్రహం వ్యక్తం చేస్తున్నారు. ఆర్టీఏ నిబంధనలు పాటించకుండా ఇష్టానుసారంగా విద్యా సంస్థలు చెలరేగిపోతున్నాయి. గ్రేటర్‌లో 13,502 విద్యా సంస్థల బస్సులు ఉన్నాయి. హైదరాబాద్‌లో 1247, మేడ్చల్‌ మల్కాజిగిరిలో 6058, రంగారెడ్డిలో 6197 బస్సులు ఉన్నాయి.

వీరికి ఆర్టీఏ ప్రతి స్కూల్‌ ప్రారంభానికి ముందు రోడ్‌ సేఫ్టీ, డ్రైవర్ల నియామక సామర్థ్యం, ప్రమాదాలు జరగకుండా తీసుకోవల్సిన జాగ్రత్తలు, బస్సు కండీషన్‌, ఆ బస్సుపై ఉండాల్సిన రంగులు, అక్షరాలు తదితర అన్నీ అంశాలపై సూచనలు ఇస్తారు. కానీ ఈ సారి ఆర్టీఏ అధికారులు వారికి సూచనలు చేసినప్పటికీ విద్యా సంస్థల నిర్వాహకులు తమదారి తమదే అన్నట్టుగా వ్యవహరిస్తున్నారు. రోజు వారి కూలీగా డ్రైవర్లను నియమించుకుని ఎటువంటి అనుభవం లేకున్నా చేతికి స్కూల్‌ బస్సును ఇచ్చేస్తున్నారు. ఆ బస్సును నడపడానికి వాళ్లంతా మద్యం తాగి రోడ్డుపై ఉరికిస్తున్నారు. ఇలా పోలీసుల తనిఖీల్లో పట్టుబడుతున్నారు. ఇప్పటి వరకు 3వేల విద్యా సంస్థల బస్సులు అసలు ఫిట్‌నెస్‌ పరీక్షకే రాలేదని అధికారులు చెబుతుండటం ఆందోళన కలిగిస్తుంది.

ఇవి పాటించాల్సిందే..!

• మోటార్‌ వాహనాల చట్టం ప్రకారం స్కూల్‌ బస్సు తప్పక పాటించాల్సి న నియమాలు
• రిజిస్ట్రేషన్‌ సర్టిఫికెట్‌(ఆర్‌సీ), వ్యాలిడ్‌ ఇన్సూరెన్స్‌ సర్టిఫికెట్‌, వ్యాలిడ్‌ ఫిట్‌నెస్‌ సర్టిఫికెట్‌, పర్మిట్‌, ట్యాక్స్‌ పేమెంట్‌ రశీదు, పొల్యూషన్‌ అండర్‌ కంట్రోల్‌ సర్టిఫికెట్‌, డ్రైవింగ్‌ చేసే డ్రైవర్‌ లైసెన్సు తప్పక వాహనంతో ఉండాలి.
• ప్రభుత్వ సూచనల మేరకు ఐదు రకాల వాహనాల వేగానికి కళ్లెం వేయాలని ప్రభుత్వం నిర్ణయించింది. వాటిలో విద్యాసంస్థల బస్సులు కూడా ఉన్నాయి. ఫిటెనెస్‌కు ముందే ఆయా వాహనాల్లో వేగ నియంత్రణ పరికరాలు ఉండేలా చూడాల్సి ఉంటుంది.
• తెలంగాణ మోటార్‌ వెహికల్‌ రూల్స్‌ 1989 ప్రకారం రూల్‌నంబర్‌ 186జీ ప్రకారం తెలంగాణలో విద్యాసంస్థల బస్సులు పూర్తి పసుపు రంగులో ఉండాలి. ఆ బస్సుపై పెద్ద అక్షరాలతో స్కూల్‌ బస్సు అని రాయడం తప్పనిసరి.
• వాహనం డ్రైవర్‌ 60 సంవత్సరాలకు మించి ఉండరాదు. డ్రైవర్‌కు సంబంధించిన ఆరోగ్య వివరాలు బస్సులో
  అతికించాలి.
• కనీసం ఐదు సంవత్సరాలు డ్రైవింగ్‌ అనుభవం ఉండాలి.
• వాహనంలో ఫిర్యాదుల పట్టికను ఏర్పాటు చేసి ఫిర్యాదులను ప్రతి నెలకు ఒకసారి పరిశీలించాలి.
• ప్రతి వాహనంలో అత్యవసర ద్వారం పెట్టాలి. పెద్ద అక్షరాలతో రాయించాలి. వాహనంలో ఫస్ట్‌ ఎయిడ్‌ కిట్‌ ఉండాలి.
• ప్రతి బస్సులో విద్యార్థుల పేర్లు, ఇంటి చిరునామా, తరగతులు, దిగాల్సిన ప్రదేశం పేర్ల పట్టికతో పాటు రూట్‌ మ్యాప్‌ తప్పని సరి.
• విద్యార్థులు బస్సును ఎక్కడం, దిగడం విషయాన్ని గ్రహించేందుకు కన్వెస్ట్‌ క్రాస్‌ అద్దాలుండాలి. ప్రతి బస్సులో కూర్చున్న విద్యార్థులు డ్రైవర్‌కు కన్పించేలా పెద్ద అద్దం పెట్టాలి.
• బస్సులు సీట్ల కింద విద్యార్థుల బ్యాగులు పెట్టునేందుకు అరలు ఏర్పాటు చేయాలి
• రవాణా శాఖ ఇచ్చే శిక్షణలో డ్రైవర్‌ పాల్గొనాల్సి ఉంటుంది. సంవత్సరానికి ఒకసారి విద్యార్థులతో రోడ్‌ సేఫ్టీ డేను నిర్వహించాలి.