బైక్‌పై వచ్చి పుస్తెల తాడు తస్కరణ

ఓ వృద్ధురాలి బంగారు పుస్తెల తాడును తస్కరించారు. నాగోల్‌ పోలీసుల కథనం ప్రకారం.. రంగారెడ్డి జిల్లా, హయత్‌నగర్‌ మండలం, గౌరెల్లి గ్రామానికి చెందిన వీరమ్మ (65) సోమవారం మధ్యాహ్నం ఆధార్‌ అప్‌డేట్‌ కోసం గ్రామంలోని మీ సేవా సెంటర్‌కి వెళ్లింది.

• వరుస ఘటనలతో ప్రజల్లో భయాందోళనలు
• వినాయక నవరాత్రుల సందడిలోనూ నేరాలు
• దొంగల నుంచి రక్షించాలని పోలీసులకు ప్రజల మొర

సిటీబ్యూరో, సెప్టెంబర్‌ 1 (నమస్తే తెలంగాణ): స్నాచరు,్ల దోపిడీ దొంతలు బరితెగిస్తున్నారు.. వరుస ఘటనలతో నగరంతోపాటు శివారు ప్రాంతాలలోని ప్రజలు బెంబేలెత్తుతున్నారు. ఒక పక్క వినాయక నవరాత్రులు సందడి నెలకొనగా.. మరో పక్క స్నాచర్లు రెచ్చిపోతుండడం ఆందోళన కల్గిస్తోంది.

వినాయక నవరాత్రుల సందర్భంగా పోలీసులు ఎక్కువగానే తిరుగుతుంటారు, అయినా స్నాచర్లు వరుస ఘటనలకు పాల్పడుతుండడంతో ఎక్కడికక్కడే కొత్త ముఠాలు ఏర్పడ్డాయా? అనే అనుమానాలు కలుగుతున్నాయి. స్నాచింగ్‌లపై ఉక్కుపాదం మోపాల్సిన పోలీసులు ఆ దిశగా చర్యలు చేపట్టకపోవడంతో స్నాచర్లు రెచ్చిపోతున్నారని ప్రజలు ఆందోళన వ్యక్తం చేస్తున్నారు.

ఇటీవల జరిగిన ఘటనలు

• నాగోల్‌ పోలీస్‌స్టేషన్‌ పరిధిలోని గౌరెల్లి గ్రామానికి చెందిన వీరమ్మ(65) నడుచుకుంటూ వెళ్తుండగా, సోమవారం మధ్యాహ్నం 2 గంటల సమయంలో గ్రామంలోనే బైక్‌పై వెనుక నుంచి వచ్చిన ఇద్దరు దుండగులు ఆమె మెడలో నుంచి మంగళసూత్రాన్ని లాక్కొని పరారయ్యారు.
• ఉప్పల్‌ భగాయత్‌లో నాగోల్‌ ప్రాంతానికి చెందిన ప్రవీణ గత శుక్రవారం వాకింగ్‌ చేస్తుండగా గుర్తుతెలియని వ్యక్తి ఆమె వద్దకు వెళ్లాడు. కర్రలతో ఆమెను బెదిరించి మెడలో ఉన్న మంగళసూత్రంతో పాటు చెవుల రింగులు సుమారు 2.75 తులాల విలువైన ఆభరణాలు దోపిడీ చేశాడు. ఆమె ఫోన్‌ను లాక్కొని చెట్ల పొదదలో పడేసి, ఎవరికైనా చెబితే చంపేస్తానంటూ అక్కడి నుంచి పరారయ్యాడు. ఈ ఘటనతో షాక్‌కు గురైన బాధితురాలు వెంటనే తేరుకొని గట్టిగా ఆరుస్తూ వెంబడించే ప్రయత్నం చేసినా అప్పటికే దుండగుడు పరారయ్యాడు. ఇదే పోలీస్‌స్టేషన్‌ పరిధిలో కళ్యాణపురి టీచర్స్‌ కాలనీలోని గురువారం దాసమ్మ అనే మహిళ మెడలో నుంచి బైక్‌పై వచ్చిన గుర్తుతెలియని వ్యక్తులు పుస్తల తాడును లాక్కొని పరారయ్యారు.
• గత నెల 11వ తేదీ అర్ధరాత్రి తరువాత కేపీహెచ్‌బీ కాలనీలో నివాసముంటున్న రిటైర్డు తహసీల్దార్‌ దంపతులు కొల్ల నాగేశ్వర్‌రావు (90), సరస్వతి(80)లను ఇంట్లో నిర్భంధించి వారిని ఇతక బాదారు. వారిని కత్తులతో బెదిరించి ఇంట్లో నుంచి భారీ ఎత్తున్న బంగారం, నగదు, వెంబడి ఆభరణాలు అపహరించారు. ఆ తరువాత మరో ఇంట్లో కూడా దోపిడీకి విఫలయత్నం చేశారు.
• ఈ నెల 10వ తేదీన సరూర్‌నగర్‌ పోలీస్‌స్టేషన్‌ పరిధిలోని చంపాపేట్‌లో ఇంట్లో ఉన్న ఒంటరి మహిళను బెదిరించి 10 తులాల బంగారం, రూ. 30 వేల నగదును గుర్తుతెలియని వ్యక్తులు అపహరించారు. ఈ ఘటనతో స్థానిక ప్రజలు ఉలిక్కిపడ్డారు.

 

వరస ఘటనలతో ఆందోళన
స్నాచింగ్‌లు, దోపిడీ దొంగతనాలతో ప్రజలు భయపడుతున్నారు. సీసీ కెమెరాల నిఘాలో సురక్షితంగా ఉన్నామనే భావనలో గత పదేండ్లు ప్రశాంతంగా నగర వాసులు జీవనం సాగించారు. కానీ నగరంతో పాటు శివారు ప్రాంతాలలో ఉండే ప్రజలు సురక్షితంగా ఉండాలంటే పోలీసులు మరిన్ని పటిష్ట చర్యలు తీసుకొని స్నాచింగ్‌లు, దోపిడీ, దొంగతనాలపై ఉక్కుపాదం మోపాలని ప్రజలు కోరుతున్నారు.