ఎవరు ఉంటారో..పోతారో!

ఏడాదిలో మూడు పోలీసు స్టేషన్లు మారాను. ఎక్కడా పూర్తిస్థాయిలో పనిచేసే పరిస్థితి లేదు.. ఎప్పుడు ఎలాంటి ఆర్డర్‌ వస్తుందో తెలియక టెన్షన్‌ పెరిగిపోతుంది. ఇప్పుడు మళ్లీ మరోసారి బదిలీ తప్పదా అనుకుంటున్నారు నగరంలోని కీలక జోన్‌లో పనిచేస్తున్న ఓ ఇన్‌స్పెక్టర్‌.

• సిటీ పోలీసు కమిషనరేట్‌లో జోరుగా చర్చ
• కొత్త సీపీ రాకతో ఇన్‌స్పెక్టర్లు, ఎస్సైలలో మొదలైన గుబులు
• పాత సీపీ మార్క్‌తో పనిచేసిన వారితో పాటు ఆరోపణలు ఉన్నవారిపై వేటుపడే అవకాశం
• లూప్‌లైన్‌లో ఉన్న సమర్థులకు ప్రాధాన్యత పోస్టులు దక్కుతాయంటూ ప్రచారం

సిటీబ్యూరో, నవంబర్‌ 15 (నమస్తే తెలంగాణ): ఏడాదిలో మూడు పోలీసు స్టేషన్లు మారాను. ఎక్కడా పూర్తిస్థాయిలో పనిచేసే పరిస్థితి లేదు.. ఎప్పుడు ఎలాంటి ఆర్డర్‌ వస్తుందో తెలియక టెన్షన్‌ పెరిగిపోతుంది. ఇప్పుడు మళ్లీ మరోసారి బదిలీ తప్పదా అనుకుంటున్నారు నగరంలోని కీలక జోన్‌లో పనిచేస్తున్న ఓ ఇన్‌స్పెక్టర్‌. తాను పనిచేసిన చోట పూర్తిగా పట్టు సాధించే సమయానికే బదిలీ కావడంతో ఎక్కడా సరిగ్గా న్యాయం చేయలేకపోతున్నానని ఆవేదన వ్యక్తం చేశారు. ఇది ఒక్క ఇన్‌స్పెక్టర్‌ బాధ మాత్రమే కాదు. హైదరాబాద్‌ పోలీసు కమిషనరేట్‌లో కొందరు పోలీసు అధికారులు తమ సన్నిహితుల వద్ద చెబుతున్న మాటలివి. ప్రస్తుతం హైదరాబాద్‌ సీపీ మారారు. కొత్త సీపీగా మహేశ్‌ భగవత్‌ వచ్చారు. మళ్లీ బదిలీలు తప్పవా అని కొందరు అనుకుంటుంటే మరికొందరు లూప్‌లైన్‌లో ఉన్న అధికారులు మాత్రం తమకు ఇప్పటికైనా ప్రాధాన్యం కలిగిన పోస్టులు లభిస్తాయి అంటూ ఆసక్తిగా ఎదురు చూస్తున్నారు.

బదిలీలు ఉండేనా..!

కమిషనర్‌గా మహేశ్‌ భగవత్‌ బాధ్యతలు చేపట్టిన తర్వాత కమిషనరేట్‌లోని పోలీసు అధికారుల్లో గుబులు మొదలైంది. నగరానికి కొత్త పోలీసు బాసు రాగానే ప్రతీసారి జరిగే చర్చ ఇప్పుడు మళ్లీ జరుగుతోంది. ఫోకల్‌ పోస్టుల్లో ఉన్నవారంతా ఎప్పుడేం జరుగుతుందోనంటూ భయపడిపోతున్నారు. తమ గాడ్‌ఫాదర్ల ద్వారా కొత్త సీపీని ప్రసన్నం చేసుకునే ప్రయత్నాలు చేస్తున్నట్లు తెలిసింది. ఇదిలా ఉంటే వీరిలో చాలామందిపై పెద్ద ఎత్తున ఆరోపణలు ఉన్నాయని, వారిని అప్రాధాన్య పోస్టుకు బదిలీ చేయడం ఖాయమని సీనియర్‌ అధికారి ఒకరు చెప్పారు. ముఖ్యంగా నగరంలోని జూబ్లీజోన్‌, ఖైరతాబాద్‌ జోన్‌, రాజేంద్రనగర్‌ జోన్‌లలో పనిచేస్తున్న ఏసీపీలు, ఇన్‌స్పెక్టర్లలో కొందరు పాత సీపీకి దగ్గరగా ఉంటూ ఆయన కోటరీగా వ్యవహరించారని, వారందరిపై అవినీతి ఆరోపణలు, ప్రజలతో పాటు పై అధికారులతో సక్రమంగా వ్యవహరించలేదన్న విమర్శలు ఉండటంతో వారిపై వేటు పడక తప్పదని తెలుస్తున్నది. ఇప్పటికే కొందరు ఏసీపీలు, కొందరు ఇన్‌స్పెక్టర్లపై వేటు ఖాయం కాగా మరికొందరు బదిలీపై వెళ్లడానికి సిద్ధమయ్యారు.

లూప్‌లైన్‌కు పంపే దిశగా కసరత్తు..!

వీరందరినీ ఒక్కసారిగా మార్చకపోయినా విడతలవారీగా ఈ అక్రమాల ఆరోపణలు ఉన్న అధికారులను లూప్‌లైన్‌కు పంపే దిశగా కసరత్తు మొదలైనట్లు కమిషనరేట్‌లోని అడ్మిన్‌ విభాగానికి చెందిన ఒక అధికారి చెప్పారు. అయితే గతంలో శాంతిభద్రతలు, స్టేషన్‌ నిర్వహణ, ప్రాంతంపై పట్టు సాధించిన వారిని రెండేళ్ల వరకు బదిలీలు చేయకపోగా.. ప్రస్తుతం ఎప్పుడు పడితే అప్పుడు బదిలీలు జరుగుతున్నాయని ఓ ఇన్‌స్పెక్టర్‌ ఆవేదన వ్యక్తం చేశారు. అవినీతి, అక్రమాలకు పాల్పడుతూ ఆరోపణలు ఎదుర్కొన్న వారిపై చర్యలు తీసుకోవడం సబబే అయినా సీపీ తనకున్న ఇంటిలిజెన్స్‌ నివేదిక, కొన్ని రిపోర్టుల ఆధారంగా బదిలీలు చేయాలని, సీపీ పక్కనే ఉండి తమకు నచ్చనివారిపై ఆయనకు వ్యతిరేకంగా చెప్పేవారి మాటలు నమ్మకుండా నేరుగా సీపీనే నిర్ణయం తీసుకోవాలని అధికారులు కోరుతున్నారు.

బదిలీల పేరిట లక్షలు దండుకున్నారు..!

గత సీపీ సజ్జనార్‌ సమయంలో పెద్ద ఎత్తున పైరవీలు చేసి బదిలీల పేరిట లక్షల రూపాయలు దండుకున్న సజ్జనార్‌కు అత్యంత ఆంతరంగికుడైన ఐడీపార్టీ కానిస్టేబుల్‌, ఆయన ఎక్కడ పనిచేస్తే అక్కడకు వెళ్లే కొందరిపై ఎలాంటి చర్యలు ఉంటాయోనంటూ కమిషనరేట్‌లో మాట్లాడుకుంటున్నారు. ఒక ఇన్‌స్పెక్టర్‌ పోస్టును రూ.25 నుంచి రూ.50లక్షల వరకు ఆ స్థానాన్ని బట్టి అమ్ముకున్నారంటూ అప్పట్లో పెద్ద ఎత్తున దుమారం రేగింది. ఆ తర్వాత కూడా బదిలీల పేరుతో చాలావరకు అక్రమాలు జరిగాయని, కొందరైతే నేరుగా తాము ఇంత పెట్టి వచ్చాం.. అంతకంటే ఎక్కువ సంపాదించుకోవాలంటూ పోలీసు స్టేషన్లలోనే దుకాణాలు తెరవడంపై సజ్జనార్‌ సైతం విసుగెత్తినట్లు ఇటీవల జరిగిన టెలికాన్ఫరెన్స్‌ను ఉదహరిస్తూ కమిషనరేట్‌ అధికారులు చర్చించుకుంటున్నారు. ఈ నేపథ్యంలో బదిలీల విషయంలో ఈసారి నిష్పాక్షికంగా జరగాలనే డిమాండ్‌ ప్రతీ ఒక్కరి నుంచి వ్యక్తమవుతోంది.

నిజాయితీపరులకు ప్రాధాన్యం దక్కేనా?

హైదరాబాద్‌ కమిషనరేట్‌లో పనిచేయడమంటేనే కత్తిమీద సామువంటిది. పండుగలు, వేడుకలు, బందోబస్తులతో నిరంతరం బిజీగా ఉండే పోలీసు అధికారులకు నేరనియంత్రణ పెద్ద సవాల్‌గానే ఉంటుంది. పాతబస్తీ వంటి చోట్ల రౌడీషీటర్ల కదలికలను పరిశీలించడంతో పాటు వారిని కంట్రోల్‌ చేసే క్రమంలో ఎదురయ్యే ఒత్తిళ్లను అధిగమించడం కూడా కష్టంగానే ఉంటోంది. అయినా హైదరాబాద్‌లో పనిచేయడానికి చాలామంది సుముఖత వ్యక్తం చేస్తారు.

ఈ క్రమంలోనే హైదరాబాద్‌ సిటీలో గతంలో నిజాయితీగా పనిచేసి ఏడాది కాలంగా లూప్‌లైన్లో ఉన్న పదిమందికి పైగా ఇన్‌స్పెక్టర్లు ఇప్పటికైనా సరైన పోస్టింగు వస్తుందా అని చూస్తున్నారు. జూబ్లీహిల్స్‌ జోన్‌లో గతంలో పనిచేసిన ఒక ఇన్‌స్పెక్టర్‌ను ఆయన ముక్కుసూటితనం, నిజాయితీ వైఖరితో లూప్‌లైన్‌లోకి పంపినట్లు పోలీసు కమిషనరేట్‌లో చర్చ జరుగుతోంది. ఇటువంటి ఇన్‌స్పెక్టర్లు సుమారు పదిమందికి పైగా కమిషనరేట్‌లో ఉన్నారని, వారందరినీ సీపీగా సజ్జనార్‌ రాగానే లూప్‌లైన్‌లోకి పంపి తనకు అనుకూలమైన వారిని ఏసీపీలు, ఇన్‌స్పెక్టర్లుగా తెచ్చి పెట్టుకున్నారు. ఇప్పటికైనా అటువంటి నిజాయితీ కలిగిన అధికారులకు ప్రాధాన్య పోస్టులు దక్కుతాయా అనే చర్చ జరుగుతోంది. ఇప్పటికే పలు ఆరోపణలు ఎదుర్కొంటూ ఇంకా పీఎస్‌లలోనే కొనసాగుతున్న అధికారులలోనూ భయంపట్టుకుంది. ప్రజల నుంచి వచ్చిన ఫిర్యాదులు, ఇటీవల జరిగిన కొన్ని సంఘటనల నేపథ్యంలో వారు కూడా తమ సీటు ఉంటుందా, పోతుందా అనే భయంలో పడ్డారు.