క్యాన్సర్ రోగులకు కష్టాలు
క్యాన్సర్... పేరు వింటేనే గుండెల్లో గుబులు పుడుతుంది.. శరీరాన్ని కబళించే వ్యాధితో పాటు ఆర్థికంగా, మానసికంగా రోగిని, వారి కుటుంబాన్ని కుంగదీసే ప్రాణాంతక సమస్య.
- ఎంఎన్జేలో మూడు నెలలుగా మల్టీవిటమిన్లు, పెయిన్ కిల్లర్లు కరువు
- జోఫర్ వంటి కనీస ఔషధాలకూ కొరత
- వైద్యశాలలో సీటీ స్కాన్ ఫిల్మ్లు,కాంట్రాస్ట్ ఇంజెక్షన్లు సైతం లేవు
- మందుల కోసం క్యాన్సర్ రోగులకు నిత్యం తప్పని ఎదురుచూపులు
- బయట కొనాల్సి రావడంతోనిరుపేదలకు అదనపు ఆర్థిక భారం
- స్కాన్ చేసినా.. ఫిల్మ్లు లేవు
సిటీబ్యూరో, నవంబర్ 20 (నమస్తే తెలంగాణ): క్యాన్సర్… పేరు వింటేనే గుండెల్లో గుబులు పుడుతుంది.. శరీరాన్ని కబళించే వ్యాధితో పాటు ఆర్థికంగా, మానసికంగా రోగిని, వారి కుటుంబాన్ని కుంగదీసే ప్రాణాంతక సమస్య. అలాంటి వ్యాధితో పోరాడుతున్న పేద, మధ్యతరగతి రోగులకు ప్రభుత్వ వైద్యమే పెద్ద దిక్కు. ప్రైవేటు ఆసుపత్రుల్లో లక్షల రూపాయల ఖర్చుతో కూడిన చికిత్స పొందే ఆర్థిక స్థోమత లేని రోగులు ప్రభుత్వ ఆసుపత్రులపైనే ఆశలుపెట్టుకుంటారు. కానీ సర్కార్ వైద్యశాలలే చేతులెత్తేస్తే వారి పరిస్థితి ఏంటన్న ప్రశ్నలు తలెత్తుతున్నాయి. వేలాది మంది పేద క్యాన్సర్ బాధితులకు అండగా నిలవాల్సిన ఎంఎన్జే క్యాన్సర్ హాస్పిటల్లో కనీస మందులు లేక ఇబ్బందులు పడుతున్నామని రోగులు చెబుతున్నారు. వ్యాధితో ఒకవైపు పోరాడుతుంటే, మరోవైపు చికిత్సకు అవసరమైన మందులు, కనీస వైద్య సదుపాయాలు అందక తమపై అదనపు భారం పడుతున్నదని వాపోతున్నారు.
ఎంఎన్జే ఆసుపత్రిలో మూడు నెలలుగా మల్టీవిటమిన్ మాత్రలు, పెయిన్ కిల్లర్లు అందుబాటులో లేవని రోగులు చెబుతున్నారు. ప్యాన్టాప్, జోఫర్ వంటి చికిత్సకు అవసరమైన మందులు కూడా దొరకడం లేదని వాపోతున్నారు. కీమోథెరపీ, ఇతర వైద్య ప్రక్రియల అనంతరం కలిగే దుష్పభ్రావాలను నియంత్రించడానికి, నొప్పి నుంచి ఉపశమనం కోసం వైద్యులు సూచించే మందులు అందుబాటులో లేకపోవడం ఇబ్బందులకు దారితీస్తున్నదని వారు తెలిపారు. ఇప్పటికే వ్యాధి బాధతో ఇబ్బంది పడుతున్న రోగులకు బయట మందులు కొనుగోలు చేయాల్సి రావడం అదనపు ఆర్థిక భారంగా మారుతున్నదని పేర్కొన్నారు. హాస్పిటల్లో సీటీ స్కాన్ విభాగానికి సంబంధించిన ఫిల్మ్ల కొరత కూడా వేధిస్తున్నదని రోగులు చెబుతున్నారు. స్కాన్ చేసినప్పటికీ ఫిల్మ్లు అందుబాటులో లేక వైద్యులు, రోగులు ఇబ్బందులు ఎదుర్కొంటున్నట్లు తెలిపారు. వ్యాధి తీవ్రతను అంచనా వేయడం, చికిత్సకు సంబంధించిన తదుపరి నిర్ణయాలు తీసుకోవడం, గత పరీక్షలతో ప్రస్తుత నివేదికలను పోల్చి చూడడంలో స్కాన్ చిత్రాలు కీలకంగా ఉంటాయి. ఫిల్మ్లు లేకపోవడం వైద్య సేవలపై ప్రభావం చూపే ప్రమాదం ఉన్నదని వైద్య నిపుణులు చెబుతున్నారు.
కాంట్రాస్ట్ ఇంజెక్షను లేవు..
కాంట్రాస్ట్ ఇంజెక్షన్ల కొరత కారణంగా అవసరమైన సందర్భాల్లో కాంట్రాస్ట్ సీటీ స్కాన్లు చేయడం లేదని రోగులు ఆందోళన వ్యక్తం చేస్తున్నారు. చేసేది లేక సాధారణ సీటీ స్కాన్తోనే సరిపెట్టుకోవాల్సిన పరిస్థితి నెలకొందని చెబుతున్నారు. కొన్నిరకాల క్యాన్సర్ వ్యాధుల్లో కాం ట్రాస్ట్ స్కాన్ ద్వారా కణితి స్వభావం, పరిమాణం, శరీరంలోని ఇతర భాగాలకు వ్యాప్తి వంటి అంశాలను మరింత స్పష్టం గా అంచనా వేయవచ్చని వైద్య నిపుణులు చెబుతున్నారు. వ్యాధిని కచ్చితంగా నిర్ధారించిన తరువాతే సరైన వైద్యం అందించడం సాధ్యమవుతుందని పేర్కొంటున్నారు. కొన్ని రోజులుగా ఎంఎన్జేలో కాంట్రాస్ట్ ఇంజెక్షన్లు అందుబాటులో లేక రోగ నిర్ధారణ ప్రక్రియకు ఆటంకం ఏర్పడుతున్నదని రోగులు వాపోతున్నారు.
బిల్లుల బకాయిల ప్రభావం?
మందుల కొరత వెనుక సరఫరా వ్యవస్థలో ఆర్థిక సమస్యలు ఉన్నట్లు సమాచారం. మందులు, వైద్య వినియోగ వస్తువులు సరఫరా చేసిన సంస్థలకు బిల్లుల చెల్లింపులు పెండింగ్లో ఉండటంతో కొందరు సరఫరాదారులు మందుల సరఫరాను నిలిపివేసినట్లు సమాచారం. ప్రభుత్వ ఆసుపత్రులకు మందుల సరఫరా నిరంతర ప్రక్రియగా సాగాల్సి ఉండగా, బిల్లుల చెల్లింపుల జాప్యంతో రోగులకు అవసరమైన ఔషధాలు అందకపోవడం ఆందోళనకరమని రోగులు అంటున్నారు.
వ్యాధితో పాటు వ్యవస్థతో పోరాటం
క్యాన్సర్ రోగి చికిత్స కేవలం మందు లు ఇవ్వడం, పరీక్షలు నిర్వహించడంతో సరిపోదని రోగులు పేర్కొంటున్నారు. ప్రతి రోజూ నొప్పిని భరిస్తూ, బతుకుపై ఆశతో ఆసుపత్రికి వచ్చే రోగికి సమయానికి మందులు అందించడం, అవసరమైన పరీక్షలు నిర్వహించడం, చికిత్సలో అంతరాయం లేకుండా చూడటం వైద్య వ్యవస్థ బాధ్యతతే. ఇప్పటికే ఆర్థికంగా, మానసికంగా కుంగిపోయిన రోగులు బయట మందులు కొనుగోలు చేయడానికి అప్పులు చేయాల్సి వస్తే పరిస్థితి మరింత దయనీయంగా మారుతుంది.
పట్టించుకోని అధికారులు..
పేదలకు నాణ్యమైన వైద్యం అందించాలనే లక్ష్యంతో ప్రభుత్వం ప్రత్యేక క్యాన్సర్ ఆసుపత్రులను నిర్వహిస్తున్నది. ఎంఎన్జే వంటి కీలక హాస్పిటల్లో కొన్ని నెలలుగా కనీస ఔషధాల కొరత తలెత్తడం పర్యవేక్షణ వ్యవస్థపై ప్రశ్నలు లేవనెత్తుతున్నది. మందుల నిల్వలు, వినియోగం, కొనుగోళ్లు, సరఫరాదారుల బిల్లుల చెల్లింపులపై నిరంతర సమీక్ష చేయాల్సిన అధికారులు.. సమస్య ఉన్నప్పటికీ పట్టించుకోవడం లేదని రోగులు విమర్శిస్తున్నారు.
బ్రోకర్ల చేతిలో కీలుబొమ్మగా..
క్యాన్సర్ చికిత్సలో ప్రతి రోజూ..ప్రతి పరీక్ష, ప్రతి ఔషధం రోగికి ఎంతో విలువైనవి. మందుల సరఫరా సమస్యలు, పరీక్షలకు అవసరమైన పరికరాలు, వినియోగ వస్తువుల కొరతతో చికిత్సలో జాప్యం జరగకుండా చూడటం అత్యవసరం. అత్యవసర మందులకు ప్రత్యేక నిల్వలు ఏర్పాటు చేయడం, సరఫరాదారుల బిల్లులను సకాలంలో చెల్లించడం, ఔషధాల కొరత ఏర్పడకముందే ప్రత్యామ్నాయ కొనుగోళ్లకు చర్యలు తీసుకోవడంపై వైద్య, ఆరోగ్యశాఖ దృష్టి సారించాలి. క్యాన్సర్తో పోరాడుతున్న రోగులకు దవాఖాన మరో భారం కాకుండా భరోసా ఇచ్చే కేంద్రంగా నిలవాలి. వైద్య, ఆరోగ్యశాఖ మంత్రి, ఉన్నతాధికారులు దవాఖానల నిర్వహణ, రోగుల అవసరాలపై నిరంతరం దృష్టి పెట్టాలి. కాగా, తెలంగాణలో వైద్య, ఆరోగ్యశాఖ బ్రోకర్ల చేతిలో కీలుబొమ్మగా మారిందనే విమర్శలు వినిపిస్తున్నాయి.
రోగులకు కనీస మందులు ఇవ్వలేకపోవడం వైద్య, ఆరోగ్యశాఖ నిర్లక్ష్యానికి అద్దం పడుతున్నదని క్యాన్సర్ రోగులు మండిపడుతున్నారు. డైరెక్టర్ మారినా దవాఖాన నిర్వహణలో చెప్పుకోదగిన మార్పులు రాకపోవడం, రోగులకు సరైన వైద్యం లభించకపోవడంపై విమర్శలు ఉన్నాయని చెబుతున్నారు. అధికారులు, ప్రభుత్వం స్పందించి క్యాన్సర్ రోగులకు అవసరమైన మందులు అందుబాటులో ఉండేలా చూడాలని రోగులు, వారి కుటుంబ సభ్యులు కోరుతున్నారు.
Read Today's Latest Hyderabad News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

