ప్రజలంతా సుఖ సంతోషాలతో ఉండాలి

శ్రీ ఉజ్జయినీ మహంకాళి అమ్మవారి ఆశీస్సులతో ప్రజలంతా సుఖ సంతోషాలతో జీవించాలని మాజీ మంత్రి , సనత్‌నగర్‌ ఎమ్మెల్యే తలసాని శ్రీనివాస్‌యాదవ్‌ ఆకాంక్షించారు. ఆంగ్ల నూతన సంవత్సరం సందర్భంగా సోమవారం ఆయన సికింద్రాబాద్‌ ఉజ్జయినీ మహంకాళి అమ్మవారిని దర్శించుకున్నారు.

• సనత్‌నగర్‌ ఎమ్మెల్యే తలసాని శ్రీనివాస్‌ యాదవ్‌
• ఆలయాలకు పోటెత్తిన భక్తజనం
• ఉత్సాహంగా నూతన సంవత్సర వేడుకలు

బంజారాహిల్స్‌/బేగంపేట్‌,జనవరి 1: శ్రీ ఉజ్జయినీ మహంకాళి అమ్మవారి ఆశీస్సులతో ప్రజలంతా సుఖ సంతోషాలతో జీవించాలని మాజీ మంత్రి , సనత్‌నగర్‌ ఎమ్మెల్యే తలసాని శ్రీనివాస్‌యాదవ్‌ ఆకాంక్షించారు. ఆంగ్ల నూతన సంవత్సరం సందర్భంగా సోమవారం ఆయన సికింద్రాబాద్‌ ఉజ్జయినీ మహంకాళి అమ్మవారిని దర్శించుకున్నారు. ముందుగా ఆలయ పండితులు ఆయనకు పూర్ణ కుంభంతో ఘన స్వాగతం పలికారు. ఈక్రమంలో అమ్మవారికి తలసాని శ్రీనివాస్‌యాదవ్‌ ప్రత్యేక పూజలు నిర్వహించారు. ఈ కార్యక్రమంలో మాజీ కార్పొరేటర్‌ అరుణగౌడ్‌, కోషికే కిరణ్మయి కిషోర్‌, నాయకులు శ్రీనివాస్‌గౌడ్‌, కిశోర్‌కుమార్‌ తదితరులు పాల్గొన్నారు.

బంజారాహిల్స్‌, జూబ్లీహిల్స్‌ పరిధిలో..

• నూతన సంవత్సరం సందర్భంగా సోమవారం ఖైరతాబాద్‌ నియోజకవర్గంలో ఉన్న ఆలయాలకు భక్తులు పోటెత్తారు. బంజారాహిల్స్‌, జూబ్లీహిల్స్‌, వెంకటేశ్వరకాలనీ, ఖైరతాబాద్‌, సోమాజిగూడ, హిమాయత్‌నగర్‌ డివిజన్ల పరిధిలోని ఆలయాలన్నీ భక్తులతో కిక్కిరిసి పోయాయి.
  జూబ్లీహిల్స్‌లోని టీటీడీ శ్రీ వేంకటేశ్వరస్వామి ఆలయంలో ఉదయం నుంచే వేలాదిమంది భక్తులు స్వామివారి దర్శనం కోసం బారులు తీరారు. పెద్ద సంఖ్యలో వచ్చిన వాహనాలతో సమీపంలోని రహదారులన్నీ నిండిపోయాయి.
• నూతన సంవత్సరం సందర్భంగా బంజారాహిల్స్‌ రోడ్డు నంబర్‌ 12లోని జగన్నాథ టెంపుల్‌లో నగరంలోని పలు ప్రాంతాలనుంచి భక్తులు భారీగా తరలివచ్చారు.
• శ్రీనగర్‌కాలనీలోని శ్రీ వేంకటేశ్వరస్వామి ఆలయం, బంజారాహిల్స్‌లోని హరేకృష్ణ స్వర్ణదేవాలయంలో పెద్ద సంఖ్యలో భక్తులు తరలివచ్చి దర్శనం చేసుకున్నారు.

• జూబ్లీహిల్స్‌ పెద్దమ్మతల్లి ఆలయానికి భక్తులు పోటెత్తారు. వేలాదిగా వచ్చిన భక్తులను నియంత్రించేందుకు భారీగా క్యూలైన్లను ఏర్పాటు చేశారు. విపరీతంగా వాహనాలు రావడంతో సమీపంలోని రోడ్లపై గంటలకొద్దీ ట్రాఫిక్‌ జామ్‌ ఏర్పడింది. ఒకవైపు ముఖ్యమంత్రి కాన్వాయ్‌ , మరోవైపు పెద్దమ్మగుడికి వచ్చిన భక్తులతో సమీపంలోని రోడ్లపై ప్రత్యక్ష నరకం కనిపించింది.