సాగర్‌కు సరికొత్త అందం లేక్‌ఫ్రంట్‌ పార్కు

హైదరాబాద్‌ ఒక మినీ భారతదేశమని, అలాంటి నగరాన్ని విశ్వనగరంగా తీర్చిదిద్దడమే లక్ష్యంగా సీఎం కేసీఆర్‌ వేలాది కోట్లతో మౌలిక వసతులు కల్పిస్తున్నారని మంత్రి తలసాని శ్రీనివాస్‌ యాదవ్‌ అన్నారు. మంగళవారం హుస్సేన్‌సాగర్‌ తీరంలో సరికొత్త థీమ్‌లతో నిర్మించిన ఆధునిక పార్కును రాష్ట్ర పురపాలక శాఖ స్పెషల్‌ చీఫ్‌ సెక్రటరీ అర్వింద్‌కుమార్‌తో కలిసి మంత్రి తలసాని ప్రారంభించారు.

• హైదరాబాద్‌ ఓ మినీ ఇండియా
• గ్లోబల్‌ సిటీ స్థాయిలో మౌలిక వసతులు
• పార్కు ప్రారంభోత్సవంలో మంత్రి తలసాని శ్రీనివాస్‌ యాదవ్‌

సిటీబ్యూరో, సెప్టెంబర్‌ 26 (నమస్తే తెలంగాణ): హైదరాబాద్‌ ఒక మినీ భారతదేశమని, అలాంటి నగరాన్ని విశ్వనగరంగా తీర్చిదిద్దడమే లక్ష్యంగా సీఎం కేసీఆర్‌ వేలాది కోట్లతో మౌలిక వసతులు కల్పిస్తున్నారని మంత్రి తలసాని శ్రీనివాస్‌ యాదవ్‌ అన్నారు. మంగళవారం హుస్సేన్‌సాగర్‌ తీరంలో సరికొత్త థీమ్‌లతో నిర్మించిన ఆధునిక పార్కును రాష్ట్ర పురపాలక శాఖ స్పెషల్‌ చీఫ్‌ సెక్రటరీ అర్వింద్‌కుమార్‌తో కలిసి మంత్రి తలసాని ప్రారంభించారు. ఈ సందర్భంగా మంత్రి మాట్లాడుతూ… హుస్సేన్‌సాగర్‌ తీరంలో నిర్మించిన లేక్‌ ఫ్రంట్‌ పార్కును అద్భుతంగా తీర్చిదిద్దారన్నారు. దేశ, విదేశాల నుంచి వచ్చి ఇక్కడే స్థిరపడేందుకు ఆసక్తి చూపుతున్నారు అంటే ఇక్కడ జరుగుతున్న అభివృద్ధేనని ఉద్ఘాటించారు.

అంతర్జాతీయ స్థాయిలో నగరంలో పలు రకాల మౌలిక వసతులను ప్రభుత్వం కల్పిస్తోందన్నారు. ముఖ్యంగా సీఎం కేసీఆర్‌ విజన్‌కు అనుగుణంగా మంత్రి కేటీఆర్‌ నగరంలో పలు ప్రాజెక్టులకు రూపకల్పన చేయించి వాటిని క్షేత్ర స్థాయిలో విజయవంతంగా కార్యరూపం దాల్చేలా చేస్తున్నారని వివరించారు. ఇందులో రాష్ట్ర పురపాలక శాఖ స్పెషల్‌ చీఫ్‌ సెక్రెటరీ అర్వింద్‌కుమార్‌ ఎంతో కీలకంగా వ్యవహరిస్తూ అద్భుతమైన ప్రాజెక్టులను పూర్తి చేస్తున్నారని పేర్కొన్నారు. అందుకు నిదర్శనం మురికి కూపంగా ఉండే లేక్‌ ఫ్రంట్‌ పార్కు ప్రాంతాన్ని ఎంతో అద్భుతంగా తీర్చిదిద్దారు అంటే మంత్రి కేటీఆర్‌తో పాటు పురపాలక, హెచ్‌ఎండీఏ అధికారుల కృషి ఎంతో ఉందన్నారు.

10 ఎకరాల స్థలంలో అద్భుతమైన పార్కును నిర్మించారని, సాగర్‌ చుట్టూ ఎన్నో అద్భుతమైన కట్టడాలు ఉన్నాయన్నారు. అందులో ఒకటి నూతన సచివాలయం, 125 అడుగుల అంబేద్కర్‌ విగ్రహం, అమర వీరుల స్మారక చిహ్నం ఇలా ఎన్నో ఉన్నాయని తెలిపారు. హెచ్‌ఎండీఏ గ్రేటర్‌లో అద్భుతమైన కార్యక్రమాలను చేపడుతోందని, ఇందులో ప్రధానంగా ఓఆర్‌ఆర్‌ చుట్టూ గణనీయంగా అభివృద్ధి చోటు చేసుకున్నదని చెప్పారు. ప్రత్యేక తెలంగాణ రాష్ట్రం వచ్చిన తర్వాత హైదరాబాద్‌ మహానగరం ప్రపంచంలోని అద్భుతమైన నగరాల్లో ఒకటిగా మారిందన్నారు. అద్భుతంగా పార్కు నిర్మాణం చేపట్టిన అధికారులను మంత్రి ప్రత్యేకంగా అభినందించారు. ఈ కార్యక్రమంలో రాష్ట్ర పురపాలక శాఖ స్పెషల్‌ చీఫ్‌ సెక్రెటరీ అర్వింద్‌కుమార్‌, హెచ్‌ఎండీఏ చీఫ్‌ ఇంజనీర్‌ బి.ఎల్‌.ఎన్‌.రెడ్డి, అర్బన్‌ ఫారెస్ట్‌ డైరెక్టర్‌ ప్రభాకర్‌, హెచ్‌ఎండీఏ ఎస్‌ఈ పరంజ్యోతిలతో పాటు బుద్ధ పూర్ణిమ ప్రాజెక్టు అధికారులు పాల్గొన్నారు.

సాగర తీరంలో సరికొత్త థీమ్‌తో..
పచ్చని చెట్ల మధ్య నుంచి నడుచుకుంటూ నేరుగా నీటి పైకి ఎంచక్కా వెళ్లిపోవచ్చు. నీటి ఉపరితలం నుంచి 15 మీటర్ల ఎత్తులో చూస్తే అది ఒక అద్భుత దృశ్యంగా అలరిస్తుంది. ఇప్పటి వరకు సాగర్‌ చుట్టూ ఉన్న పార్కులకు పూర్తి భిన్నంగా లేక్‌ ఫ్రంట్‌ పార్కును తీర్చిదిద్దారు. నగర వాసులకే కాకుండా దేశ, విదేశీ పర్యాటకులకు ఎన్నో విశేషాలను అందించే హుస్సేన్‌సాగర్‌ ఇప్పుడు సరికొత్త హంగులతో నగర వాసులను ఆకట్టుకునేందుకు లేక్‌ ఫ్రంట్‌ పార్కు అందుబాటులోకి వచ్చింది. హెచ్‌ఎండీఏ ఎంతో ప్రతిష్టాత్మకంగా ఈ ప్రాజెక్టును చేపట్టింది. ఇప్పటి వరకు హైదరాబాద్‌ మహానగరంలో ఎన్నో పార్కులు ఉన్నా, వాటికి పూర్తి భిన్నంగా అత్యాధునిక డిజైన్లు, సాగర తీరంలో సరికొత్త అనుభూతిని పొందేలా ఇందులో నీటి పైకి వెళ్లేలా రెండు చోట్ల ఏర్పాటు చేసిన బోర్డు వాక్‌లు ప్రత్యేక
ఆకర్షణగా నిలుస్తాయి.

లేక్‌ ఫ్రంట్‌ పార్కు ఫీచర్లు..

• సుమారు 10 ఎకరాల స్థలంలో చేపట్టిన పార్కులో 25 ఏండ్లు ఉన్న 22 చెట్లను ఇందులో ట్రాన్స్‌ప్లాంటేషన్‌ ద్వారా నాటడంతో అవి విజయవంతంగా పచ్చదనంతో ఉన్నాయి. అలాగే పార్కులో 40 రకాల చెట్లను నాటారు. వీటితో పాటు దోమలను నివారించే చెట్లతో పాటు సుగంధ ద్రవ్యాల వాసనను ఇచ్చే చెట్లు ఉన్నాయి.
• పార్కులో ఉన్న విశాలమైన స్థలంలో ల్యాండ్‌స్కేపింగ్‌ (పచ్చదనం) కోసం సుమారు 4లక్షల మొక్కలను ఆకర్షణీయమైన డిజైన్లతో నాటి నిత్యం పచ్చదనం కనిపించేలా చేశారు. వీటి కోసం మొట్ట మొదటిసారిగా పేర్లతో పాటు బార్‌కోడింగ్‌ను ఏర్పాటు చేశారు.
• పార్కులో అత్యాధునికంగా ఉండే పరిపాలన భవనంతో పాటు టికెట్‌ కౌంటర్‌ బ్లాక్‌, భద్రతా గదులు, మూత్రశాలలు, ఇతర మౌలిక వసతులను కల్పించారు.
• పార్కులో ఏర్పాటు చేసిన మౌలిక వసతుల్లో అత్యంత కీలకమైనవి విద్యుత్‌ దీపాలు. విద్యుత్‌తో వెలిగే బొల్లార్స్‌, డెకరేటివ్‌ ఎల్‌ఈడీ లైటింగ్‌, హైమాస్ట్‌ లైటింగ్‌, నవీ కాలమ్‌ లైటింగ్‌, నియో ఫ్లెక్సీ లైటింగ్‌ పార్కులోని బోర్డు వాక్‌ల వెంబడి ఏర్పాటు చేశారు.
• లేక్‌ ఫ్రంట్‌ పార్కులో నిర్మించిన బోర్డు వాక్‌ డెక్‌ నీటికి 15 మీటర్ల ఎత్తులో క్యాంటీలీవర్‌ , పర్గోలాస్‌ల సాయంతో నీటిలోకి వెళ్లినట్లు ఉంటుంది.
• హుస్సేన్‌సాగర్‌ తీరంలో ఉన్న లేక్‌ ఫ్రంట్‌ పార్కులో ఎన్నో ఆకర్షణీయమైన నిర్మాణాలు ఇందులో ఉన్నాయి. పంచతంత్ర వాక్‌ వే, సెంట్రల్‌ పాత్‌ వే, అండర్‌పాస్‌లు, పెవిలియన్స్‌, ప్రొమెనేడ్‌ ఏరియాలు వంటివి సందర్శకులను విశేషంగా ఆకట్టుకునేలా తీర్చిదిద్దారు.
• పార్కులో ఎంతో హైలెట్‌గా నిలిచేవి ఎలివేటెడ్‌ వాక్‌వేస్‌ (ఆకాశ మార్గాలు)లు. ఇందులో మొత్తం 4 ఆకాశ మార్గాలను నిర్మించగా, వీటి పొడవు 110 మీటర్లు, క్యాంటీలీవర్‌ జెట్టి పొడవు 15 మీటర్లు ఉంటుంది. నీటి మీదకు చొచ్చుకెళ్లేలా ఉండే వ్యూ పాయింట్‌ పార్కులో అత్యంత ఆకట్టుకునేలా ఉంటుంది. అలాగే 2 మీటర్ల వెడల్పుతో కూడిన క్యాంటీలీవర్‌ వాక్‌వే పొడవు 240 మీటర్లు, 2 మీటర్ల వెడల్పుతో కూడిన వాక్‌వే 690 మీటర్లతో ఉంటుంది.
• ప్రజల సందర్శన కోసం పార్కును ఉదయం 5.30 నుంచి 11.30 గంటల వరకు.
• పార్కులో ప్రవేశానికి రుసుము చిన్న పిల్లలకు రూ.10, పెద్దలకు రూ.50 వసూలు చేస్తారు. మార్నింగ్‌ వాకర్స్‌ కోసం ప్రతి నెలా రూ.100 చార్జీ నిర్ణయించారు.
• లేక్‌ ఫ్రంట్‌ పార్కు అభివృద్ధి కోసం రూ.22 కోట్లను సివిల్‌, ఎలక్ట్రికల్‌ పనులు కోసం వెచ్చిస్తే, ల్యాండ్‌ స్కేపింగ్‌ కోసం రూ.4.65 కోట్లు వెచ్చించారు.