అగ్ని ప్రమాద సమయంలో..సురక్షితంగా బయట పడండి

గ్రేటర్‌లో వరుస అగ్ని ప్రమాదాలు అలజడి రేపుతున్నాయి. జనాల్లో భయాందోళన కలిగిస్తున్నాయి. మానవ నిర్లక్ష్యం, సరైన నిఘా, అప్రమత్తత లేక భారీ ప్రమాదాలు జరిగి ప్రాణ నష్టం, ఆస్తి నష్టం ఏర్పడుతున్నది.

• కరపత్రాలతో విస్తృత అవగాహన కల్పిస్తున్న ఈవీడీఎం
• ప్రారంభించిన మంత్రి కేటీఆర్‌

సిటీబ్యూరో, ఏప్రిల్‌ 16 (నమస్తే తెలంగాణ) : గ్రేటర్‌లో వరుస అగ్ని ప్రమాదాలు అలజడి రేపుతున్నాయి. జనాల్లో భయాందోళన కలిగిస్తున్నాయి. మానవ నిర్లక్ష్యం, సరైన నిఘా, అప్రమత్తత లేక భారీ ప్రమాదాలు జరిగి ప్రాణ నష్టం, ఆస్తి నష్టం ఏర్పడుతున్నది. ఈ నేపథ్యంలో జీహెచ్‌ఎంసీకి సంబంధించిన ఈవీడీఎం (ఎన్‌ఫోర్స్‌మెంట్‌, విజిలెన్స్‌, డిజాస్టర్‌ మేనేజ్‌మెంట్‌) బృందం అగ్ని ప్రమాద సమయంలో వ్యవహరించాల్సిన తీరు, అగ్ని ప్రమాదాల నివారణకు తీసుకోవాల్సిన జాగ్రత్తలపై ప్రత్యేక కరపత్రాలను రూపొందించి విస్తృత అవగాహన చేపడుతున్నది. రెండు రోజుల కిందట పురపాలక శాఖ మంత్రి కేటీఆర్‌ చేతుల మీదుగా ఈ అవగాహన కరపత్రాల పంపిణీ కార్యక్రమాన్ని ప్రారంభించారు. పాఠశాలలు, వాణిజ్య సముదాయాల్లో అప్రమత్తతపై అవగాహన కల్పిస్తున్నది. ఇందులో భాగంగానే ప్రజలకు పలు సూచనలు ఇస్తున్నారు. ప్రతి వంద చదరపు మీటర్లకు రెండు ఫైర్‌ ఎక్స్‌టింగ్విషర్స్‌, రెండు స్మోక్‌ డిటెక్టర్‌లను ఉంచాలని, అగ్ని ప్రమాద సమయంలో ఫైర్‌ కంట్రోల్‌ రూం నం.8712699444, 101, ట్విట్టర్‌ ః @Telanganafireలో సంప్రదించాలని ఈవీడీఎం డైరెక్టర్‌ ప్రకాశ్‌ రెడ్డి తెలిపారు.

అగ్ని ప్రమాదంలో చిక్కుకున్నప్పుడు

• ఒక గదికి వెళ్లి, కిటికీలో నుంచి రోడ్డు వైపు చూస్తూ ఉండండి
• కిటికీ గుండా సహాయం కోసం అరవడం, బయటకు వెళ్లడానికి సహాయం అడగండి
• భవనం ఖాళీ చేస్తున్నప్పుడు, మీకు వ్యక్తిగతంతో ప్రమాదం లేనంత వరకు ఇతరులకు సహాయం చేయండి
  కిటికీ గుండా బయటకు రండి
• మీరు గ్రౌండ్‌ ఫ్లోర్‌, మొదటి అంతస్తులో ఉన్నట్లయితే కిటికీ గుండా తప్పించుకోవచ్చు. పై అంతస్తులో ఉన్నట్లయితే తక్షణ ప్రమాదంలో ఉంటేనే కిటికీ నుంచి బయటకు రావడానికి ఆలోచించాలి
• వికలాంగును తరలించేటప్పుడు తగు శ్రద్ధ తీసుకోవాలి. వారికి మీ సహాయం అవసరం కావచ్చు.
• భవనం ఖాళీ చేసేటప్పుడు మెట్ల మార్గంలో ఎడమ వైపునకు ఉంటూ దిగుతూ, ఇతర వైపు నుంచి రెస్క్యూ బృందాలు పైకి వెళ్లుటకు తోడ్పడండి.
• బట్టలకు మంటలు అంటుకున్నప్పుడు పరగెత్తకండి. అక్కడే ఆగి, నేలపై పడుకొని దొర్లండి. వీలైతే కోటు, జాకెట్‌, దుప్పటి చుట్టుకోవాలి.
  పొగ నిండిన వాతావరణంలో..
• స్వచ్ఛమైన గాలిని పొందడానికి , నేలకు దగ్గరగా వంగి ఉండాలి.
• నేలకు ఒకటి లేదా రెండు అడుగుల పైన ( 30 నుంచి 60 సె.మీ మేర మీ తలను ఉంచాలి. అక్కడ గాలి స్వచ్ఛంగా ఉంటుంది)
• ఊపిరాడకుండా ఉన్నట్లయితే.. ఒక తడి గుడ్డను మీ నోరు, ముక్కు కప్పి ఉండేటట్లుగా చుట్టుకోవాలి.