వర్షంలో బండి పైలం గురూ

వర్షాకాలం వచ్చిందంటే వాహనాల వినియోగం విషయంలో జాగ్రత్తలు తప్పనిసరని మెకానిక్‌ నిపుణులు చెబుతున్నారు. వర్షంలో డ్రైవ్‌ చేయడం ప్రమాదకరమని అంటున్నారు. లైట్‌ నుంచి బ్రేక్‌ వరకు ప్రతీది నాణ్యతగా ఉండేల పరిశీలించుకోవాలని సూచిస్తున్నారు. కండిషన్‌ చెక్‌ చేసుకోవాల్సిన అవసరం ఉంటుందని చెబుతున్నారు.

• వర్షంలో వాహనాలు నడిపేటప్పుడు జాగ్రత్తలు తీసుకోవాలంటున్న నిపుణులు
• మైనర్‌ రిపేర్లే.. అని నిర్లక్ష్యం చేస్తే ఘోర ప్రమాదాలు జరిగే అవకాశం
• పెట్రోల్‌, టైర్లలో గాలి,బ్రేకులు చెక్‌ చేసుకోవాలి
• నిర్ణీత సమయానికి సర్వీసింగ్‌ అవసరమంటున్న మెకానిక్‌లు

సిటీబ్యూరో, జూలై 3 (నమస్తే తెలంగాణ): వర్షాకాలం వచ్చిందంటే వాహనాల వినియోగం విషయంలో జాగ్రత్తలు తప్పనిసరని మెకానిక్‌ నిపుణులు చెబుతున్నారు. వర్షంలో డ్రైవ్‌ చేయడం ప్రమాదకరమని అంటున్నారు. లైట్‌ నుంచి బ్రేక్‌ వరకు ప్రతీది నాణ్యతగా ఉండేల పరిశీలించుకోవాలని సూచిస్తున్నారు. కండిషన్‌ చెక్‌ చేసుకోవాల్సిన అవసరం ఉంటుందని చెబుతున్నారు. వర్షం కారణంగా వాహనాలు తరుచూ మొరాయిస్తున్నాయి. దీంతో రోడ్లపై బైకులు సడన్‌గా ఆగిపోతే.. పెట్రోల్‌, బ్రేకులు, ఇంజన్‌ ఆయిల్‌, క్లచ్‌ తదితరవి చెక్‌ చేసుకోకుంటే ప్రమాదం పొంచి ఉంటుందని మెకానిక్‌లు హెచ్చరిస్తున్నారు. చిన్న రిపేర్లే కదా అని తేలికగా తీసుకుంటే రోడ్లపై ఇబ్బందులు ఎదుర్కోవడమే కాదు.. ఆ ప్రభావం బైక్‌, కారు ఇతర భాగాలపై పడి వేలల్లో డబ్బులు గుల్ల అవుతాయి. వాహనాల పనితీరును ఎప్పటికప్పుడు పరీక్షించుకోవాల్సిన అసవరం ఉంది.

వర్షంలో వీటిపై అవగాహన అవసరం..
వర్షంలో బైకులు తరుచుగా ఆగిపోతుంటాయి. ఎంత కిక్‌ కొట్టినా స్టార్ట్‌ కావు. ఏమైందో కూడా తెలియని పరిస్థితి. బండి సడన్‌గా ఆగిపోయిందంటే కిక్‌ మీద కిక్‌ కొడుతూ ఉంటాం. కానీ ఇంజన్‌కు ఉన్న ప్లగ్‌ పాయింట్‌లోకి నీళ్లు చేరడం వల్ల బండి ఆగిపోయిందన్న విషయం మనకు అర్థం కాదు. ఆ విషయం తెలియక బండిని స్టార్ట్‌ చేయడానికి ప్రయత్నిస్తుంటాం. కిక్‌ వరుసగా కొట్టడంతో పెట్రోల్‌ ఓవర్‌ ఫ్లో అయి.. ప్లగ్‌పాయింట్‌కు తగిలి ప్లగ్‌ షాట్‌ అయిపోతుందని మెకానిక్‌లు చెబుతున్నారు. అయితే ఇలాంటి పరిస్థితి ఎదురయినప్పుడు ప్లగ్‌ క్యాప్‌ తీసేసి.. దానిని తుడవాలి. అనంతరం యథావిధిగా అమర్చిన తర్వాత బండి స్టార్ట్‌ చేయాలి.

• బాగా నడిచే బైక్‌ ఒక్కసారిగా ఆగిపోయింది. అప్పుడు మనదృష్టి ‘కీ’ పాయింట్‌ వద్దకు వెళ్లాలి. తాళం తిప్పి తీసిన తర్వాత..కొంత గ్యాప్‌ ఉంటుంది. ఆగ్యాప్‌లోకి నీళ్లు చేరడంతో బండి స్టార్ట్‌ కాదు. ఆ సమయంలో ఆ కీ పాయింట్‌ వద్ద కొంత గాలి ఊదుతూ ఉండటం వల్ల సమస్య పరిష్కారమవుతుంది.
• సాధ్యమైనంత వరకు నీళ్లల్లో నుంచి బైక్‌ను నడపకుండా చూసుకోవాలి. మనం కిక్‌ కొట్టినప్పుడు బైక్‌ బాడీ షేక్‌ అయినట్టు అనిపిస్తుంది. అప్పుడు ప్లగ్‌ క్యాప్‌ ప్రాబ్లం అని గుర్తించాలి.
• వాహనాలకు సర్వీసింగ్‌ సమయానికి చేయిస్తూ ఉండాలి. రెండు నెలలకు ఒకసారి ఇంజన్‌ ఆయిల్‌ చేంజ్‌ చేయాలి. ఇలా చేస్తే బైక్‌లకు ఎలాంటి సమస్యలు రావు. కొన్ని సమయాల్లో బండి డ్రైవ్‌లో ఉన్నప్పుడే క్లచ్‌ వైర్‌ తెగిపోతుంది. దానివల్ల కొన్ని ప్రమాదాలు జరిగే అవకాశం ఉంది. అయితే క్లచ్‌ నాణ్యతను ముందే గుర్తించాలి. క్లచ్‌ కేబుల్‌లో తీగలు ఉంటాయి. ఒక్క తీగ తెగినా.. క్లచ్‌ వైర్‌ తెగే అవకాశం ఉంటుంది. మనం క్లచ్‌ ప్రెస్సింగ్‌ చేసేటప్పుడు రెగ్యులర్‌గా ఉన్న అనుభూతి రాదు. అప్పుడే మనం గుర్తించాలి. మొదట మెకానిక్‌ వద్దకు వెళ్లి క్లచ్‌ వైర్‌ చెక్‌ చేసుకున్నాక బండి నడపడం మంచింది.
• స్కూటీలకు సైలెన్సర్‌… బైకుల కన్నా కిందకు ఉంటుంది. నీళ్లలో పోయినప్పుడు సైలెన్సర్‌లోకి నీళ్లు వెళ్లే అవకాశం ఎక్కువగా ఉంటుంది. జాగ్రత్తలు తీసుకోవాల్సి ఉంటుంది.
• ఇంజన్‌కు దగ్గరలో ఉన్న కాయిల్స్‌ తడిస్తేనే బండి ఆగిపోతుంది. వర్షం బాగా కురుస్తన్నప్పుడు బండి డ్రైవ్‌ చేయకుండా ఉండటం మేలు. నీటి గుంతల్లో నుంచి వాహనం నడపవద్దు.

చక్రాలు సాఫీగా తిరగాల్సిందే..

• ముఖ్యంగా టైర్‌ నాణ్యతను ఎప్పటికప్పుడు పరిశీలించుకోవాలి. చాలా మంది టైర్లు గ్రిప్‌ను కోల్పోతున్నా నిర్లక్ష్యంతో వాహనాన్ని అలానే నడుపుతుంటారు. అది చాలా ప్రమాదకరం. వర్షాకాలంలో ప్రమాదాలకు అధిక కారణం టైర్లు బాగులేకపోవడమే.
• కార్ల టైర్లల్లో సరిపడా గాలి ఉండేలా చూసుకోవాలి. టైర్‌ పరిణామాన్ని బట్టి గాలి ఫిల్‌ చేస్తారు.
• కారును ఎక్కువగా వినియోగించకపోతే టైర్లు హార్డ్‌గా మారే ప్రమాదం ఉంది. ఆ సమయంలో అధిక వేగంతో ప్రయాణం చేసినప్పుడు టైరు కదలికల్లో మార్పు వస్తుంది. రోడ్డుపై మేకులు, బండలు ఉన్నప్పుడు లేదా బ్రేకులు వేయడానికి ప్రయత్నించిన సమయంలో ఒక్కసారిగా కారు టైరు బ్లాస్ట్‌ అయ్యే ప్రమాదం ఉంది.
• వాహనదారులు ఇష్టారీతిన డ్రైవ్‌ చేయడం కూడా ప్రమాదమే. ముఖ్యంగా సడెన్‌ బ్రేకులు ఎక్కువసార్లు వేయడం, స్పోర్ట్స్‌ వాహనాల మాదిరిగా వీల్స్‌ను ఎక్కువ సార్లు అటు ఇటూ తిప్పడం కూడా టైర్‌ నాణ్యతపై ప్రభావం చూపుతుంది. నెమ్మదిగా టైర్‌ గ్రిప్స్‌ బలాన్ని కోల్పోతాయి.
• ప్రతి 5వేల కిలో మీటర్లకు ఒక్కసారి తప్పనిసరిగా వీల్‌ బ్యాలెన్స్‌ చెక్‌ చేసుకోవాలి. టైర్లలో ఎయిర్‌ కండిషన్‌ చూసుకోవాలి.
• 40వేల కిలోమీటర్లను పూర్తిచేసుకున్న కార్లకు తప్పనిసరిగా కొత్త టైర్లను అమర్చుకోవాలి.
• టైర్లను కొనుగోలు చేసే సమయంలో నూతన తేదీల తయారీనే ఎంచుకోవాలి.

సమయానికి సర్వీసింగ్‌ చేయించాలి
వర్షాకాలంలో వాహనాలు తరుచూ మొరాయిస్తుంటాయి. రోడ్లపై ఆగిపోతుండటం చూస్తుంటాం. అయితే వాహనాల పట్ల జాగ్రత్తలు తీసుకుంటే మేలు. వాహనాలకు సర్వీసింగ్‌ సమయానికి చేయిస్తూ ఉండాలి. బైక్‌లకు ప్రతి 2వేల కిలోమీటర్లకు సర్వీసింగ్‌ చేయించాలి. రెండు నెలకు ఒకసారి ఇంజన్‌ ఆయిల్‌ చేంజ్‌ చేయాలి. ఇలా చేస్తే బైకులకు ఎలాంటి సమస్యలు రావు. కొన్ని సమయాల్లో బండి డ్రైవ్‌లో ఉన్నప్పుడే క్లచ్‌ వైర్‌ తెగిపోతుంది. దానివల్ల ప్రమాదాలు జరిగే అవకాశం ఉంది. క్లచ్‌ నాణ్యతను ముందే గుర్తించాలి.
– ప్రశాంత్‌, బైక్‌ మెకానిక్‌, చిక్కడపల్లి

టైర్ల పనితీరు చెక్‌ చేసుకోవాలి
టైర్ల పనితీరు సరిగా లేకపోతే స్కిడయ్యే ప్రమాదం అధికంగా ఉంటుంది. సడెన్‌ బ్రేకులు వేసినా ప్రమాదమే. అందుకే టైర్ల పనితీరు బాగుండేలా చూసుకోవాలి. కారు మోడల్‌ను బట్టి టైర్లు.. వాటి పరిమాణాన్ని బట్టి ఎయిర్‌ ఫిలప్‌ చేయాల్సి ఉంటుంది. కారు బ్రేకుల పనితీరు తగ్గితే వెంటనే మెకానిక్‌కు చూపించాలి. వర్షంకాలంలో బ్రేకులు త్వరగా క్షీణిస్తాయి.
– నాయుడు, కార్‌ మెకానిక్‌, మారుతీ షోరూం