కరెన్సీని రెట్టింపు చేస్తానంటూ..

ఒక నోటును రెండు నోట్లుగా మారుస్తాను.. ఐదు వందల నోటు ఒకటి ఇస్తే.. రెండు నోట్లుగా మార్చి వెయ్యి రూపాయలు చేస్తానంటూ.. సోషల్‌ మీడియా ద్వారా ప్రచారం చేస్తూ అమాయకులను మోసం చేస్తున్న ఐవరీ కోస్ట్‌ దేశానికి చెందిన నిందితుడిని ఎల్బీనగర్‌ ఎస్‌ఓటీ పోలీసులు వలపన్ని పట్టుకున్నారు.

• మోసం చేస్తున్న ఐవరీ కోస్ట్‌ దేశానికి చెందిన వ్యక్తి అరెస్ట్‌
• నిందితుడి నుంచి రూ.10 లక్షల నకిలీ కరెన్సీ స్వాధీనం

మన్సూరాబాద్‌, జూలై 3: ఒక నోటును రెండు నోట్లుగా మారుస్తాను.. ఐదు వందల నోటు ఒకటి ఇస్తే.. రెండు నోట్లుగా మార్చి వెయ్యి రూపాయలు చేస్తానంటూ.. సోషల్‌ మీడియా ద్వారా ప్రచారం చేస్తూ అమాయకులను మోసం చేస్తున్న ఐవరీ కోస్ట్‌ దేశానికి చెందిన నిందితుడిని ఎల్బీనగర్‌ ఎస్‌ఓటీ పోలీసులు వలపన్ని పట్టుకున్నారు. ఎల్బీనగర్‌లోని డీసీపీ కార్యాలయంలో సోమవారం ఏర్పాటు చేసిన విలేకరుల సమావేశంలో డీసీపీ బి. సాయిశ్రీ కేసు వివరాలను వెల్లడించారు.

• ఐవరీ కోస్ట్‌ దేశానికి చెందిన జోన్‌ గుయ్‌ రోస్టాండ్‌ అలియాస్‌ దౌడా (46) బిజినెస్‌ వీసాపై 2021లో ఇండియాకు వచ్చాడు. జనవరి 2022లో అతడి వీసా గడువు ముగిసింది. అయినప్పటికీ తన దేశానికి వెళ్లకుండా అక్రమంగా నగరంలోని రాజేంద్రనగర్‌, బండ్లగూడ, సన్‌ సిటీ, ఆనంద్‌నగర్‌కాలనీలో నివాసముంటున్నాడు. సులభంగా డబ్బు సంపాదించాలనే ఆశతో జోన్‌ గుయ్‌ రోస్టాండ్‌ రియల్‌ ఎస్టేట్‌ వ్యాపారులతో పాటు ఇతర రంగాలకు చెందిన ప్రముఖులను మోసగించేందుకు పథకం వేశాడు. ఐదు వందల నోటును రెండుగా చేసి వెయ్యి చేస్తాను.. ఐదు లక్షలను పది లక్షలు చేస్తాను.. ఇచ్చిన డబ్బులన్నింటినీ రెట్టింపు చేస్తానంటూ.. సోషల్‌ మీడియా 9.. ఫేస్‌బుక్‌లో ప్రకటనలు ఇచ్చాడు. కావాలంటే డెమో చేసి చూపుతానని నమ్మించి తనతో మాట్లాడేందుకు వాట్సాప్‌ నంబర్‌ కూడా ఇచ్చాడు. నిందితుడి ఇచ్చిన ప్రకటనను చూసిన మాదాపూర్‌కు చెందిన ఓ వ్యక్తి నెల రోజుల కిందట అతడిని వాట్సాప్‌ కాల్‌లో సంప్రదించాడు. మొదట డెమో ఇచ్చేందుకు అంగీకరించాడు. నిందితుడు తన డెమోతో బాధితుడిని నమ్మించాడు. బాధితుడు రూ. 25 లక్షలు ఇచ్చి.. డబుల్‌ చేయమని సూచించాడు. నిందితుడు తన మాయాజాలంతో బాధితుడిని నమ్మించి, మోసం చేసి, రూ.25లక్షలతో ఉడాయించాడు. మనీ డబుల్‌ అంటూ.. నిందితుడు ఇచ్చిన నోట్లను బాధితుడు చూడగా.. నకిలీ నోట్లతో పాటు నోటు సైజులో ఉండే తెల్ల పేపర్లు బయటపడ్డాయి. తాను మోసపోయినట్లు గ్రహించిన బాధితుడు మాదాపూర్‌ పోలీసులకు ఫిర్యాదు చేశాడు.
• ఇదే తరహాలో ఎల్బీనగర్‌లో కూడా ఓ వ్యక్తిని మోసం చేసేందుకు ప్రయత్నిస్తూ ఎల్బీనగర్‌ ఎస్‌ఓటీ పోలీసులకు పట్టుబడ్డాడు. నిందితుడి నుంచి నకిలీ కరెన్సీ రూ.10 లక్షలు, కరెన్సీ షేప్‌ పేపర్‌ కట్టింగ్‌ బండిల్స్‌ గ్రీన్‌-2, వైట్‌-2, కెమికల్‌ బాటిల్స్‌-5, సెల్‌ఫోన్‌, గడువు తీరిన వీసా జిరాక్స్‌ పేపర్స్‌తోపాటు ఇతర సామగ్రిని పోలీసులు స్వాధీనం చేసుకున్నారు. నిందితుడిని అరెస్టు చేసి, రిమాండ్‌కు తరలించారు. ఈ సమావేశంలో ఎల్బీనగర్‌, మహేశ్వరం జోన్‌ ఎస్‌ఓటీ డీసీపీ కె. మురళీధర్‌, ఎల్బీనగర్‌ ఏసీపీ శ్రీధర్‌రెడ్డి, ఎల్బీనగర్‌ ఇన్‌స్పెక్టర్‌ అంజిరెడ్డి, ఎల్బీనగర్‌ ఎస్‌ఓటీ ఇన్‌స్పెక్టర్‌ ఏ.సుధాకర్‌ పాల్గొన్నారు.

మోసం ఇలా..

డెమో ఇచ్చే సమయంలో మొదట రెండు రూ. 500 అసలు నోట్లను ఎవరికీ కనిపించకుండా మలిచి ఎడమ చేతిలో పెట్టుకుంటాడు. డెమోను తిలకించేందుకు వచ్చిన వ్యక్తి నుంచి రెండు రూ. 500 నోట్లను తీసుకుంటాడు. సదరు రెండు నోట్లను రెండు తెల్ల కాగితాల మధ్య పెట్టి అయోడిన్‌, ఇతర రసాయన పౌడర్లను రాసి ఒక ఎన్వలప్‌ కవర్‌లో పెడతాడు. కొంత సేపటి తర్వాత ఆ నోట్లను శుభ్రపరిచేందుకు ఒక కప్పు నీటిలో ముంచుతూ డెమోను తిలకించేందుకు వచ్చిన వ్యక్తి దృష్టి మళ్లిస్తాడు. ఎన్వలప్‌లో ఉన్న రెండు రూ. 500 నోట్లతో పాటు అప్పటికే తన ఎడమచేతిలో దాచిన మరో రెండు రూ. 500 నోట్లను కప్పులో వేసి కడిగినట్లు చేసి నాలుగు రూ. 500 నోట్లను బయటకు తీసి చూపుతాడు.