రెచ్చిపోతున్న ఇసుక మాఫియా

వికారాబాద్‌ జిల్లాలో ఇసుక మాఫియా రెచ్చిపోతున్నది. ప్రధానమైన కాగ్నాను ఇసుక మాఫియా అక్రమంగా ఇసుకను తోడేస్తున్నది. రాత్రికి రాత్రే ఇసుక డంపులను మాయం చేస్తున్నారు. ప్రధానంగా ఇసుక లభ్యమయ్యే యాలాల, తాండూరు, బషీరాబాద్‌ మండలాల్లోనే అక్రమంగా ఇసుకను తరలిస్తున్నారు.

• తాండూరు నియోజకవర్గంలో యథేచ్ఛగా రవాణా
• కాగ్నా పరివాహాక ప్రాంతం, శివసాగర్‌ నుంచి అక్రమంగా తరలింపు
• యాలాల, తాండూర్‌, బషీరాబాద్‌ మండలాల్లో జోరుగా దందా
• చూసీచూడనట్లుగా మైనింగ్‌, రెవెన్యూ, పోలీస్‌ శాఖ అధికారులు

వికారాబాద్‌, డిసెంబర్‌ 26, (నమస్తే తెలంగాణ): వికారాబాద్‌ జిల్లాలో ఇసుక మాఫియా రెచ్చిపోతున్నది. ప్రధానమైన కాగ్నాను ఇసుక మాఫియా అక్రమంగా ఇసుకను తోడేస్తున్నది. రాత్రికి రాత్రే ఇసుక డంపులను మాయం చేస్తున్నారు. ప్రధానంగా ఇసుక లభ్యమయ్యే యాలాల, తాండూరు, బషీరాబాద్‌ మండలాల్లోనే అక్రమంగా ఇసుకను తరలిస్తున్నారు. ఒక్క యాలాల మండలంలోనే లక్షల క్యూబిక్‌ మీటర్లలో కాగ్నా నుంచి ఇసుకను అక్రమంగా తరలిస్తున్నారు. ఖంజాపూర్‌, పాత తాండూరు ప్రాంతాల నుంచి పగలు,రాత్రి తేడా లేకుండా అక్రమంగా ఇసుక రవాణాకు పాల్పడుతున్నా.. అధికారులు పట్టించుకోకపోవడం గమనార్హం. అంతేకాకుండా ఏకంగా పోలీసులే ఈ అక్రమ ఇసుక రవాణాకు దగ్గరుండి చూసుకుంటున్నారనే ఆరోపణలు వస్తున్నాయి.

జోరుగా అక్రమ ఇసుక దందా…

యాలాల, తాండూరు, బషీరాబాద్‌ మండలంలోని కాగ్నా పరివాహక ప్రాంతంతో పాటు శివసాగర్‌లో అధిక మొత్తంలో ఇసుక వనరులు ఉన్నాయి. సంబంధిత ప్రాంతాల నుంచి ప్రతీ ఏటా రూ. కోట్ల విలువైన ఇసుక లభ్యమవుతున్నది. అదేవిధంగా జిల్లాలోని కొడంగల్‌, బొంరాసుపేట్‌ మండలాల్లో ఫిల్టర్‌ ఇసుక అక్రమ వ్యాపారం కూడా జోరుగా జరుగుతున్నా.. మైనింగ్‌, రెవెన్యూ, పోలీస్‌ అధికారులు నెలనెలా మామూళ్లు తీసుకుంటూ..పూర్తిగా నిర్లక్ష్యంగా వ్యవహరిస్తున్నట్లు ఆరోపణలు వినిపిస్తున్నాయి. అదేవిధంగా బషీరాబాద్‌ మండలం కాగ్నా పరివాహాక ప్రాంతంలోని మంతటి, రెడ్డి ఘనాపూర్‌, ఎక్‌మయి, మైల్వార్‌ ప్రాంతాల్లో పెద్ద ఎత్తున అక్రమంగా ఇసుక రవాణా జరుగుతున్నది.

అయితే ప్రభుత్వ నిబంధనల మేర ఉదయం నుంచి 6 గంటల నుండి సాయంత్రం 6 గంటల వరకు ఇసుక తరలించేందుకు అనుమతులు పొంది, నిబంధనలకు విరుద్ధంగా ఇసుక దందాకు పాల్పడుతున్నారు. రాత్రి వేళ్లలో యథేచ్ఛగా అక్రమంగా ఇసుకను తరలిస్తూ ప్రభుత్వ ఆదాయానికి గండికొడుతున్నారు. అయితే డబ్బులకు కక్కుర్తి పడి సంబంధిత అధికారులు ఇసుక మాఫియాకు అండగా ఉంటూ, ఇసుకను తరలించడంలో ఎలాంటి అడ్డంకులు లేకుండా చేస్తున్నట్లు చుట్టుపక్కల గ్రామాల ప్రజలు ఆరోపిస్తున్నారు. అయితే ప్రభుత్వ అభివృద్ధి కార్యక్రమాల పేరిట గుట్టుచప్పుడు కాకుండా ఇసుకను తరలిస్తూ అక్రమంగా సంపాదిస్తున్నారు. తాండూరు ఎమ్మెల్యే అనుచరుల అండతోనే ఇసుక మాఫియా అక్రమంగా ఇసుకను తరలిస్తున్నట్లు ఆరోపణలు వినిపిస్తున్నాయి.

ఇటీవల వెలుగుచూసిన ఇసుక మాఫియా ఆగడాలు..

• మూడు రోజుల కిందట బషీరాబాద్‌ మండలం కంసాన్‌పల్లి(బీ) గ్రామ పరిధిలో రైతులకు ఇసుక మాఫియాకు మధ్య అర్ధరాత్రి గొడవ జరిగింది. అయితే రైతుల పొలంలో ఇసుక మేటను ఇసుక మాఫియా అక్రమంగా రవాణా చేసే ప్రయత్నం చేయగా, రైతులు అడ్డుకున్నారు. మా పొలంలోని ఇసుక మేటను మీరెలా తీసుకెళ్లారంటూ ఇసుక మాఫియాతో వాగ్వాదం జరగడంతో ఒకరిపై ఒకరు దాడి చేసుకున్నారు. అయితే ఇసుక మాఫియాకు చెందిన వారిలో ఒకరికి గాయం కావడంతో పోలీసులకు ఫిర్యాదు చేశారు. రైతులు కూడా తమ పొలంలో అక్రమంగా ఇసుక మేటలను తరలిస్తుండడంతో అడ్డుకున్నామని, దీంతో దాడి చేశారని రైతులు కూడా పోలీసులకు ఫిర్యాదు చేశారు. అయితే ఇసుక మాఫియా ఫిర్యాదుతో కేసు చేసిన పోలీసులు, రైతులు ఇచ్చిన ఫిర్యాదును పట్టించుకోకపోవడంపై స్థానికంగా విమర్శలు వెల్లువెత్తుతున్నాయి. దీని వెనుక అధికార పార్టీ నాయకులున్నట్లు ఆరోపణలు వినిపిస్తున్నాయి.
• ఇటీవల బషీరాబాద్‌ మండలం జమ్లానాయక్‌ తండా సరిహద్దులో ఇసుక మాఫియా అక్రమ రవాణా సమాచారాన్ని తెలుసుకున్న పోలీసులు అడ్డుకునేందుకు వెళ్లగా, పోలీసులను చూసిన ఇసుక మాఫియా ట్రాక్టర్‌ను పోలీసుల మీదకు ఎక్కించే ప్రయత్నం చేయగా, ఓ కానిస్టేబుల్‌కు తీవ్ర గాయాలయ్యాయి.
• మూడు నెలల కిందట…తాండూరు మండలం వీరశెట్టిపల్లికి చెందిన ఓ వ్యక్తి కాగ్నా నది కేంద్రంగా రాత్రి సమయంలో ట్రాక్టర్ల ద్వారా అక్రమ ఇసుక తరలింపు సమాచారాన్ని పోలీసులకు సమాచారమందించారు. అయితే స్థానికుల ఫిర్యాదుతో ట్రాక్టర్లను పోలీసులు సీజ్‌ చేశారు. అయితే డయల్‌ 100కు ఫిర్యాదు చేసిన వ్యక్తి వివరాలను బయటపెట్టొద్దనే కనీస అవగాహనను మరిచిన పోలీసులు.. ఫిర్యాదు చేసిన వ్యక్తి వివరాలను ఇసుక మాఫియాకు అందించారు. దీంతో వీరశెట్టిపల్లి గ్రామానికి అర్ధరాత్రి వెళ్లిన ఇసుక మాఫియా ఫిర్యాదుదారుడి ఇంటి మీదికెళ్లి దాడి చేసి అతడితో పాటు కుటుంబసభ్యులను చంపుతామని బెదిరించారు. ఇసుక మాఫియా దాడితో ఊరంతా భయబ్రాంతులకు గురయ్యారు. అనంతరం దాడికి సంబంధించి ఫిర్యాదుదారుడు పోలీసులకు ఫిర్యాదు చేశారు. అయితే ఇసుక మాఫియా దౌర్జన్యంగా వ్యవహరించి ఫిర్యాదుదారుడిపై దాడి చేసినప్పటికీ చూసీచూడనట్లుగా వదిలేయడంతోపాటు ఇసుక మాఫియాతో చేతులు కలిపి ఫిర్యాదుదారుడి సమాచారాన్ని ఇసుక అక్రమార్కుల ఇవ్వడంపై పోలీసులపై తీవ్ర విమర్శలు వెల్లువెత్తాయి. అంతేకాకుండా డయల్‌ 100కు సమాచారమిచ్చిన వ్యక్తి వివరాలను బయటపెట్టిన పోలీసులపై అప్పట్లో జిల్లా అంతటా విమర్శలు వెల్లువెత్తాయి.
• తాండూరు పట్టణంలో ఇల్లు నిర్మించుకుంటున్న ఓ రిటైర్డ్‌ ఆర్మీ ఉద్యోగి ఇసుకను తెప్పించుకున్నారు. అయితే స్థానికంగా ఇసుక మాఫియా వారికి కాకుండా వేరే వారితో ఇసుకను తెప్పించడంతో అక్రమ ఇసుక దందాను నడిపిస్తున్న వ్యక్తి ఫొటోలు తీసి స్థానిక రెవెన్యూ, పోలీసులకు ఫిర్యాదు చేశారు. దీంతో పంచాయతీ అధికార పార్టీ ముఖ్య నేత వద్దకు వెళ్లగా, తాండూరు పట్టణంలో ఎవరికీ ఇసుక కావాలన్నా మమ్మల్ని మాత్రమే సంప్రదించాలని సదరు ముఖ్య నేత ముందే బెదిరింపులకు పాల్పడినట్లు తెలిసింది.