మహేష్‌ బ్యాంక్‌ సైబర్‌ దోపిడీకి 3 నెలలు ముందే పక్కా స్కెచ్‌

ఏపీ మహేశ్‌ కో ఆపరేటివ్‌ బ్యాంక్‌పై సైబర్‌దాడి చేసేందుకు సైబర్‌ నేరగాళ్లు మూడు నెలల ముందు నుంచే స్కెచ్‌ వేశారని నగర పోలీస్‌ కమిషనర్‌ సీవీ ఆనంద్‌ తెలిపారు. తెలంగాణ స్టేట్‌ కో ఆపరేటివ్‌ అపెక్స్‌ బ్యాంక్‌ లిమిటెడ్‌(టీఎస్‌ క్యాబ్‌)ను గతేడాది జూలైలో హ్యాక్‌ చేసిన ముఠా.. మహేశ్‌ బ్యాంక్‌పై గత నవంబర్‌ నుంచి దాడి మొదలు పెట్టిందని స్పష్టం

200 మంది ఉద్యోగులకు ఫిషింగ్‌ మెయిల్స్‌
ఇద్దరు ఉద్యోగులు ఆ మెయిల్స్‌ తెరిచారు..!
బ్యాంకులో సైబర్‌ సెక్యూరిటీ లోపాలు
హ్యాకర్స్‌ చేతికి చిక్కిన పాస్‌వర్డ్‌.. యూజర్‌ ఐడీలు
హ్యాండ్లర్స్‌ అరెస్ట్‌, విదేశాల్లో కీలక సూత్రధారి
హ్యాకింగ్‌ తీరును వివరించిన నగర సీపీ

సిటీబ్యూరో, మార్చి 30 : ఏపీ మహేశ్‌ కో ఆపరేటివ్‌ బ్యాంక్‌పై సైబర్‌దాడి చేసేందుకు సైబర్‌ నేరగాళ్లు మూడు నెలల ముందు నుంచే స్కెచ్‌ వేశారని నగర పోలీస్‌ కమిషనర్‌ సీవీ ఆనంద్‌ తెలిపారు. తెలంగాణ స్టేట్‌ కో ఆపరేటివ్‌ అపెక్స్‌ బ్యాంక్‌ లిమిటెడ్‌(టీఎస్‌ క్యాబ్‌)ను గతేడాది జూలైలో హ్యాక్‌ చేసిన ముఠా.. మహేశ్‌ బ్యాంక్‌పై గత నవంబర్‌ నుంచి దాడి మొదలు పెట్టిందని స్పష్టం చేశారు. ఈ కేసు వివరాలను బుధవారం సీపీ మీడియాకు వెల్లడించారు. హ్యాకింగ్‌ ఎలా చేశారనే విషయాన్ని పవర్‌ పాయింట్‌ ప్రజంటేషన్‌ ద్వారా వివరించారు.

హ్యాకింగ్‌ ఇలా చేశారు..

• విదేశాల నుంచి ప్రాక్సీ సర్వర్లు ఉపయోగించి నవంబర్‌ 4, 10, 16వ తేదీల్లో ఆర్టీజీఎస్‌, బ్యాంకు డిపాజిట్లు, డిస్కౌంట్లంటూ సబ్జెక్ట్‌ సూచిస్తూ.. బ్యాంకులో పనిచేసే 200 మందికి ఫిషింగ్‌ ఈ-మెయిల్స్‌ను పంపించారు. ఇద్దరు ఉద్యోగులు ఓపెన్‌ చేయడంతో వారి పాస్‌వర్డ్‌, యూజర్‌ ఐడీలను ప్రధాన హ్యాకర్లు అపహరించారు.
• బ్యాంకుకు చెందిన పూర్తి డేటాబేస్‌ సర్వర్‌కు సంబంధించిన యాక్సెస్‌ అనుమతులు ఒకరిద్దరికే ఉండాలి. కానీ మహేశ్‌ బ్యాంక్‌లో పది మందికి ఉన్నాయి. దీంతో సునాయాసంగా హ్యాకర్ల చేతికి ప్రధాన డేటాబేస్‌, సర్వర్‌ పాస్‌వర్డ్‌, యూజర్‌ ఐడీ వివరాలు అందాయి.
• ఆయా ఉద్యోగుల కంప్యూటర్లలోకి ఈ- మెయిల్స్‌ ద్వారా కీ లాగర్స్‌ పంపించారు.
• మరోవైపు ఢిల్లీలో ఉన్న హ్యాండ్లర్లు ప్రధాన హ్యాకర్ల సూచనలతో బ్యాంకు ఖాతాలను సమకూర్చే పనిని చకచకా నిర్వహించారు. అలా శాన్విక ఎంటర్‌ప్రైజెస్‌, షాయినాజ్‌బేగం, హిందుస్థాన్‌ ట్రేడర్స్‌, సంపత్‌కుమార్‌, కటకం కోటేశ్వర్‌, ప్రియాంక ఎంటర్‌ప్రైజెస్‌, ఫాతిమా మాత సెక్యూర్‌ వెల్డింగ్స్‌ ఖాతాదారులతో మాట్లాడి ఆయా అకౌంట్లను తమ ఆధీనంలోకి తీసుకున్నారు. జనవరి 22, 23వ తేదీల్లో శని, ఆదివారాలు ఉండడంతో హ్యాకర్లు డేటాబేస్‌ సర్వర్‌లోకి ప్రవేశించారు.
• శాన్విక ఖాతాలో రూ. 299 ఉండగా, దానిని రూ. 4,00,40,361కు, షాయినాజ్‌బేగం అకౌంట్‌లో రూ. 2.5 లక్షలుండగా, రూ. 3,59,55,390, హిందుస్థాన్‌ ట్రేడర్స్‌ బ్యాంక్‌ ఖాతాలో రూ. 3 వేలుండగా రూ. 4,83,25,985లకు పెంచారు. సంపత్‌ ఖాతాలో రూ. 3 వేలుండగా రూ. 4,99,999కి పెంచారు. మిగతా మూడు ఖాతాల్లోనూ నగదును పెంచేందుకు ప్రయత్నించి విఫలమయ్యారు.
• సంపత్‌ అకౌంట్‌ కేపీహెచ్‌బీలో ఉంది. ప్రధాన హ్యాండ్లర్లు ఇక్ఫా స్టీఫెన్‌ ఓర్జి, క్యాపిటల్‌ అనే వ్యక్తులు ఓపెన్‌ చేసి, అతడి ఖాతాలోకి ముందుగా రూ. కోటి డిపాజిట్‌ చేసి అక్కడి నుంచి వేరే ఖాతాల్లోకి బదిలీ చేశారు. అయితే అందులో రూ. 95 లక్షలు సాంకేతిక కారణాలతో తిరిగి వాపస్‌ వచ్చాయి.
• ఆయా ఖాతాల్లో ఉన్న కోట్ల రూపాయల డబ్బును 115 బ్యాంకు ఖాతాల్లోకి మళ్లించారు. అక్కడి నుంచి దేశవ్యాప్తంగా ఉన్న 398 అకౌంట్లలోకి బదిలీ చేశారు.
• హ్యాకింగ్‌ జరిగిన విషయాన్ని గుర్తించిన మహేశ్‌ బ్యాంక్‌ అధికారులు సీసీఎస్‌ సైబర్‌క్రైమ్‌ పోలీసులకు ఫిర్యాదు చేయడంతో నగదు బదిలీ కాకుండా స్తంభింపజేసేందుకు ప్రయత్నించారు. రూ. 2.08 కోట్లు ఫ్రీజ్‌ అయ్యాయి.
• నిందితులను పట్టుకునేందుకు 10 బృందాలు వివిధ రాష్ర్టాలకు వెళ్లాయి. తాజాగా అరెస్టయిన ఇక్ఫా స్టీఫెన్‌ ఓర్జీతో పాటు 23 మందిని పట్టుకున్నారు. ఇందులో నలుగురు నైజీరియన్లు ఉన్నారు.

నిబంధనలు పాటించాల్సిందే..
బ్యాంకులు ఆర్బీఐ ఇచ్చిన సైబర్‌ సెక్యూరిటీ నిబంధనలు పాటించాలని సీపీ సీవీ ఆనంద్‌ స్పష్టం చేశారు. ఉద్యోగులకు ఫిషింగ్‌ మెయిల్స్‌పై అవగాహన కల్పించాలని, యాంటీ వైరస్‌ సిస్టమ్‌ ఉండాలని సూచించారు. నిబంధనలన్నీ తప్పనిసరిగా పాటించే విధంగా బ్యాంకు యాజమాన్యాలతో సమావేశం నిర్వహిస్తామన్నారు.