తక్షణ స్పందన.. సమస్యల పరిష్కారం

తక్షణమే స్పందించి నిందితులను పట్టుకోవడం, శాంతి భద్రతలకు విఘాతం కలుగకుండా చర్యలు తీసుకుంటూ ఉత్తమ ప్రతిభ కనబర్చిన సిబ్బందిని నగర పోలీస్‌ కమిషనర్‌ సీవీ ఆనంద్‌ అభినందించారు. వారికి నగదు పురస్కారాలను అందజేశారు

• విధి నిర్వహణలో ఉత్తమ ప్రతిభ
• సిబ్బందిని అభినందించిన సీపీ సీవీ ఆనంద్‌

సిటీబ్యూరో, అక్టోబర్‌ 18 (నమస్తే తెలంగాణ): తక్షణమే స్పందించి నిందితులను పట్టుకోవడం, శాంతి భద్రతలకు విఘాతం కలుగకుండా చర్యలు తీసుకుంటూ ఉత్తమ ప్రతిభ కనబర్చిన సిబ్బందిని నగర పోలీస్‌ కమిషనర్‌ సీవీ ఆనంద్‌ అభినందించారు. వారికి నగదు పురస్కారాలను అందజేశారు.

• ఈ నెల 14న సికింద్రాబాద్‌ సంగీత్‌ థియేటర్‌ వద్ద మహిళ మెడలో నుంచి గొలుసు స్నాచింగ్‌ జరిగింది. ఈ కేసులో నిందితుడిని అదే రోజు పట్టుకున్నారు. గోపాలపురం ఇన్‌స్పెక్టర్‌ సాయిశ్వర్‌ గౌడ్‌, అదనపు ఇన్‌స్పెక్టర్‌ కోటయ్య, డీఎస్సై పాండు, కానిస్టేబుళ్లు కమలాకర్‌, ధన్‌రాజ్‌ను అభినందించారు.
• సుల్తాన్‌బజార్‌ పోలీసు స్టేషన్‌ పరిధిలో పాదచారుడి వద్ద సెల్‌ఫోన్‌ లాక్కొని పారిపోయిన నిందితులను కొన్ని గంటల వ్యవధిలోనే పట్టుకున్నారు. ఎస్సై శ్రీకాంత్‌రెడ్డి, కానిస్టేబుళ్లు రాకేశ్‌ కుమార్‌, నరేందర్‌కుమార్‌, అఫ్రోజ్‌ను అభినందించారు.
• సైఫాబాద్‌ పోలీస్‌స్టేషన్‌ పరిధిలో.. గత నెలలో మండపంలోని విగ్రహం ధ్వంసం ఘటనపై పోలీసులు వెంటనే స్పందించి.. ఘటనకు పాల్పడిన ఇద్దరు మహిళల మానసిక స్థితిని ప్రజలకు వివరించి.. శాంతి భద్రతలను కాపాడారు.

ఇన్‌స్పెక్టర్‌ రాజు నాయక్‌, సత్తయ్య, ఎస్సైలు సురేశ్‌ రెడ్డి, నిరంజన్‌రెడ్డి, కానిస్టేబుల్‌ వేణుయాదవ్‌, నాంపల్లి ఇన్‌స్పెక్టర్‌ ఖలీల్‌ పాషా, బేగంపేట పీఎస్‌ ఎస్సై అనూష తదితరులు సీపీ అభినందించారు.