సర్వీసు రోడ్లు.. మరింత విశాలంగా

శరవేగంగా ఐటీ కారిడార్‌ విస్తరణ, ఊహించని రీతిలో దూసుకుపోతున్న నగరాభివృద్ధి, వెరసి అవుటర్‌ రింగు రోడ్డు మాత్రమే కాదు..

• రూ.300 కోట్లతో 4 లేన్లుగా విస్తరణ పనులు
• నానక్‌రాంగూడ నుంచి టీఎస్‌టీఏ, నార్సింగ్‌ నుంచి కొల్లూరు దాకా..
• రూ.87 కోట్లతో గచ్చిబౌలి – శంషాబాద్‌ ఓఆర్‌ఆర్‌ స్ట్రెచ్‌ పునరుద్ధరణ

సిటీబ్యూరో ప్రధాన ప్రతినిధి, మార్చి 18(నమస్తే తెలంగాణ): శరవేగంగా ఐటీ కారిడార్‌ విస్తరణ, ఊహించని రీతిలో దూసుకుపోతున్న నగరాభివృద్ధి, వెరసి అవుటర్‌ రింగు రోడ్డు మాత్రమే కాదు.. దానికి రెండువైపులా సర్వీసు రోడ్లు కూడా ట్రాఫిక్‌ అవసరాలకు సరిపోయేలా కనిపించవడం లేదు. దీంతో తెలంగాణ ప్రభుత్వం మరింత ముందుచూపుతో అవుటర్‌ సర్వీసు రోడ్ల విస్తరణకు శ్రీకారం చుట్టింది. ప్రధానంగా గచ్చిబౌలి కేంద్రంగా ఐటీ కారిడార్‌ అటు శంషాబాద్‌, ఇటు నార్సింగి, మరోవైపు కొల్లూరు వరకు… ఇలా విస్తరిస్తున్న కొద్దీ రహదారుల వ్యవస్థను సైతం అదే రీతిలో పటిష్టం చేస్తున్నది. రూ.300 కోట్లతో హెచ్‌ఎండీఏ ఈ ప్రాంతాల పరిధిలోని అవుటర్‌ సర్వీసు రోడ్లను విస్తరించడంతో పాటు కీలకమైన గచ్చిబౌలి – శంషాబాద్‌ అవుటర్‌ రోడ్డుకు సైతం పునరుద్ధరణ పనుల్ని చేపట్టింది.

ఒకప్పుడు ఐటీ అంటే హైటెక్‌ సిటీ, మాదాపూర్‌ వరకు మాత్రమే. కానీ, తెలంగాణ ఏర్పడిన తర్వాత వస్తున్న జాతీయ, అంతర్జాతీయ పెట్టుబడులు… ఐటీ, ఐటీఈఎస్‌ కేంద్రాల ఏర్పాటుతో ఐటీ కారిడార్‌కు ఎల్లలు లేకుండా పోయాయి. గచ్చిబౌలి కేంద్రంగా శరవేగంగా విస్తరిస్తున్న కారిడార్‌తో 158 కిలోమీటర్ల అవుటర్‌ రింగు రోడ్డు పరిధిలో ఎక్కడాలేని విధంగా ఈ స్ట్రెచ్‌లోనే వాహనాల రాకపోకలు అనూహ్యంగా పెరుగుతున్నాయి. ఇందులో భాగంగా అవుటర్‌ రింగు రోడ్డుపై నిత్యం సుమారు 1.20 లక్షల వాహనాలు తిరిగితే… అందులో 70 శాతం మేర 25 కిలోమీటర్ల గచ్చిబౌలి – శంషాబాద్‌ స్ట్రెచ్‌లోనే తిరుగుతుండటం విశేషం. అయితే కేవలం అవుటర్‌ పైనే కాదు… దానికి రెండువైపులా ఉన్న సర్వీసు రోడ్లపైనా ట్రాఫిక్‌ గణనీయంగా పెరిగింది. ప్రస్తుతం రెండు లేన్లుగా ఉన్న సర్వీసు రోడ్లు తాజా ట్రాఫిక్‌ అవసరాలను తీర్చలేకపోతున్నాయి. దీంతో వీటిని నాలుగు లేన్లుగా మార్చేందుకు హెచ్‌ఎండీఏ పనులు ముమ్మరంగా చేపడుతున్నది.

చేపడుతున్న పనులు ఇవే…

• రూ.300 కోట్లతో 22 కిలోమీటర్ల అవుటర్‌ రింగు రోడ్డుకు రెండువైపులా ఉన్న సర్వీసు రోడ్లను రెండు లేన్ల నుంచి నాలుగు లేన్లుగా విస్తరిస్తున్నారు.
• ఇందులో భాగంగా నానక్‌రాంగూడ నుంచి తెలంగాణ పోలీసు అకాడమి (టీఎస్‌టీఏ) వరకు 7.5 కిలోమీటర్ల సర్వీసు రోడ్డు విస్తరణ
• నార్సింగి నుంచి కొల్లూరు వరకు మిగిలిన 14.5 కిలోమీటర్ల సర్వీసు రోడ్డు విస్తరణ
  సర్వీసు రోడ్డు విస్తరణ పనులను వచ్చే ఏడాది ఫిబ్రవరిలోగా పూర్తి చేసేందుకు అధికారులు నిర్ణయించారు.
• గచ్చిబౌలి నుంచి శంషాబాద్‌ వరకు ఉన్న 25 కిలోమీటర్ల అవుటర్‌ రింగు రోడ్డు ప్రధాన రహదారిపై ట్రాఫిక్‌ రద్దీ ఎక్కువగా ఉన్నందున రోడ్డును పునరుద్ధరించే పనులను చేపట్టడం. ఇందుకు గాను రూ.87 కోట్లతో చేపట్టిన పనులు ప్రస్తుతం వేగంగా కొనసాగుతున్నాయి.
• ఈ పనులను రానున్న జూన్‌లోగానే పూర్తి చేయాలని అధికారులు లక్ష్యంగా పెట్టుకున్నారు.
• ఇప్పటికే రూ.100 కోట్లతో నార్సింగి, కోకాపేట నియోపోలిస్‌ వద్ద ఇంటర్‌ ఛేంజ్‌ పనులు ముమ్మరంగా జరుగుతున్నాయి. ఇందులో నార్సింగి ఇంటర్‌ ఛేంజ్‌ పనులు 70 శాతం వరకు పూర్తి కాగా, కోకాపేట నియోపోలీస్‌ వద్ద పనులు 40-50 శాతం వరకు పూర్తయ్యాయి.
• దీనికి తోడు బాచుపల్లి పరిధిలోని మల్లాపూర్‌ వద్ద కూడా మరో ఇంటర్‌ఛేంజ్‌ ఏర్పాటుకు అధికారులు ప్రతిపాదనలు సిద్ధం చేశారు. సుమారు రూ.138 కోట్లతో చేపట్టే ఈ పనులను త్వరలోనే ప్రారంభించేందుకు అధికారులు ఏర్పాట్లు చేస్తున్నారు.