6,224 కోట్ల బడ్జెట్‌కు స్టాండింగ్‌ కమిటీ ఆమోదం

జీహెచ్‌ఎంసీ 2023-24 ఆర్థిక సంవత్సర బడ్జెట్‌ ముసాయిదాను బుధవారం మేయర్‌ గద్వాల్‌ విజయలక్ష్మి అధ్యక్షతన జరిగిన స్టాండింగ్‌ కమిటీ ముందు ప్రవేశ పెట్టారు.

• 2023-24 ఆర్థిక సంవత్సరానికి బల్దియా ప్రతిపాదనలు

సిటీబ్యూరో, నవంబర్‌ 9 (నమస్తే తెలంగాణ) : జీహెచ్‌ఎంసీ 2023-24 ఆర్థిక సంవత్సర బడ్జెట్‌ ముసాయిదాను బుధవారం మేయర్‌ గద్వాల్‌ విజయలక్ష్మి అధ్యక్షతన జరిగిన స్టాండింగ్‌ కమిటీ ముందు ప్రవేశ పెట్టారు. 2023-24 సంవత్సరానికి బడ్జెట్‌ రూ. 6,224 కోట్లుగా ప్రతిపాదించగా, ఈ బడ్జెట్‌ అంచనాలపై స్టాండింగ్‌ కమిటీ సభ్యులు చర్చించి ఆమోదం తెలిపారు. ఈ బడ్జెట్‌ ముసాయిదా పై సభ్యులు లేవనెత్తిన అంశాలను కమిషనర్‌ డీఎస్‌.లోకేశ్‌ కుమార్‌ సమాధానాలు ఇచ్చారు. జనవరి 10 వరకు బడ్జెట్‌ను కౌన్సిల్‌ సమావేశంలో ప్రవేశపెడతారు.

బడ్జెట్‌ ముసాయిదా వివరాలు

• 2022-23 ఆమోదిత బడ్జెట్‌ రూ. 6150 కోట్లు
•  2022-23 సవరించిన బడ్జెట్‌ మొత్తం రూ. 6475 కోట్లు
• 2023-24కు ప్రతిపాదిత బడ్జెట్‌ మొత్తం రూ. 6,224 కోట్లు
• 2023- 24 ఆర్థిక సంవత్సరం ప్రతిపాదిత రెవెన్యూ ఆదాయం రూ. 3967 కోట్లు
• 2023 -24 ఆర్థిక సంవత్సరం ప్రతిపాదిత రెవెన్యూ ఖర్చు రూ. 2667 కోట్లు
• 2023- 24 ఆర్థిక సంవత్సరం రెవెన్యూ సర్‌ ప్లస్‌ రూ. 1300 కోట్లు
• ప్రతిపాదిత క్యాపిటల్‌ రిసీప్ట్స్‌ రూ. 3557 కోట్లు
• క్యాపిటల్‌ ఎక్స్‌ పెండేచర్‌ రూ. 3557 కోట్లు
• ప్రాపర్టీ ట్యాక్స్‌ ద్వారా రాబడి 32 % (రూ. 2000 కోట్లు)
• పట్టణ ప్రగతి/ 15 ఫైనాన్స్‌ కమీషన్‌ గ్రాంట్స్‌ ద్వారా 13% (రూ. 834 కోట్లు)
• టౌన్‌ ప్లానింగ్‌ ద్వారా 28% (రూ. 1750 కోట్లు)
• బారోవింగ్‌ (అప్పులు) 20% (రూ. 1218 కోట్లు)
•  ఇతర ఆదాయం 7% (రూ. 425 కోట్లు) రాబడి అంచనా వేశారు.

స్టాండింగ్‌ కమిటీ సమావేశంలో ఆరు అంశాలకు కమిటీ ఆమోదం..
నగర మేయర్‌ గద్వాల్‌ విజయలక్ష్మి అధ్యక్షతన బుధవారం స్టాండింగ్‌ కమిటీ సమావేశం జీహెచ్‌ఎంసీ ప్రధాన కార్యాలయంలో జరిగింది. కమిటీ సభ్యుల సహకారంతో స్టాండింగ్‌ కమిటీ సమావేశంలో ఆరు అంశాలకు గాను ఆరింటికి సభ్యులు ఆమోదం తెలిపారని మేయర్‌ చెప్పారు. స్టాండింగ్‌ కమిటీ సభ్యులు పన్నాల దేవేందర్‌ రెడ్డి, మహపర, మిర్జా ముస్తఫా బేగ్‌, మహ్మద్‌ అబ్దుల్‌ సలామ్‌ షాహిద్‌, పర్వీన్‌ సుల్తానా, మందగిరి స్వామి, ఇ.విజయ్‌ కుమార్‌ గౌడ్‌, మహ్మద్‌ రషీద్‌ ఫరాజుద్దీన్‌, సీఎన్‌ రెడ్డి, వై.ప్రేమ్‌ కుమార్‌, సామల హేమ తదితరులు పాల్గొన్నారు.

ఆమోదించిన ఆరు అంశాలు..
రంగారెడ్డి జిల్లా రాజేంద్ర నగర్‌ మండలం, మైలార్‌ దేవ్‌ పల్లి సర్వే నెం. 93/ఏ నంబర్‌ లో గల 1560 చ.గజాల ఓపెన్‌ ల్యాండ్‌ను బతుకమ్మ ఫ్లాట్‌ ఫామ్‌గా అభివృద్ధి చేయడం గానీ స్థల సేకరణ చేసేందుకు భూమి యజమాని ప్రభాకర్‌ రెడ్డికి 60 శాతం నష్టపరిహారం జీహెచ్‌ఎంసీ చెల్లించుటకు, మరో 40 శాతం టీడీఆర్‌ జారీ చేయుటకు కమిటీ ఆమోదం తెలిపింది

• రంగారెడ్డి జిల్లా శేరిలింగంపల్లి మండలం, హఫీజ్‌ పేట్‌ విలేజ్‌ మీదికుంట చెరువు మురుగునీటి నాలా (మురుగునీటి) మళ్లింపు చర్యలను రూ. 2.30 కోట్లతో పనులు చేపట్టడానికి షార్ట్‌ టెండర్లను పిలిచేందుకు పరిపాలన ఆమోదానికి కమిటీ ఆమోదం తెలిపింది.
• గోపన్‌ పల్లి నుంచి హుస్మాన్‌ నగర్‌ వయా తాజ్‌ నగర్‌ సర్వే నెం.124, 262 లో 30 మీటర్ల రోడ్డు వెడల్పు చేసేందుకు స్థల సేకరణలో భాగంగా మొత్తం 10ఆస్తులు కోల్పోతుండగా.. అందులో ఐదుగిరి అంగీకారం తెలుపగా మరో ఐదుగురి ఆస్తుల సేకరణకు కమిటీ ఆమోదం.
• రంగారెడ్డి జిల్లా శేరిలింగంపల్లి మండలం, ఖాజాగూడ విలేజ్‌ లో పెద్ద చెరువు వద్ద మురుగునీటి కాలువ మళ్లింపు కోసం రూ. 2.95 కోట్లతో, నిబంధనలు అనుసరించి పనులు చేపట్టేందుకు షార్ట్‌ టెండర్‌ పిలువడానికి పరిపాలన ఆమోదానికై కమిటీ ఆమోదం.
• సీఎస్‌ఆర్‌ కింద ఐసీఐసీఐ ఫౌండేషన్‌కు రెండు సంవత్సరాల పాటు కమ్యూనిటీ భాగస్వామ్యంతో బైరామల్‌ గూడ మద్దెల కుంట చెరువు పునరుద్దరణ, సుందరీకరణ పనులను, మెయింటెనెన్స్‌కు ముందుకు వచ్చింది. ఐసిఐసిఐ ఫౌండేషన్‌, జీహెచ్‌ఎంసితో ఎంఓయూ చేసేందుకు కమిటీ ఆమోదం.
• కమిషనర్‌ జీహెచ్‌ఎంసీ ద్వారా ఏ.సి ఫైనాన్స్‌ 2023-24 ఆర్థిక సంవత్సరానికి బడ్జెట్‌ అంచనాలను, 2022-23 సంవత్సరపు రివైజ్డ్‌ బడ్జెట్‌ అంచనాలకు, బడ్జెట్‌ ముఖ్యాంశాలకు జీహెచ్‌ఎంసీ యాక్ట్‌ 1955, యు/ఎస్‌ 182 అనుసరించి యు/ఎస్‌ 184 ద్వారా సమర్పించడానికి కమిటీ ఆమోదం.
• సరిల్‌ 29 సీతాఫల్‌ మండి వార్డు నంబర్‌145లో మారండేయ నగర్‌ నుంచి షాబాజ్‌ గూడ వరకు 435 లక్షల రూపాయల వ్యయంతో చేపట్టేందుకు ఆర్‌సిసి డ్రైన్‌ నిర్మాణానికి కమిటీ ఆమోదం.
• భవాని నగర్‌ నుంచి అన్నా నగర్‌ వరకు రూ 550 లక్షల వ్యయంతో చేపట్టే ఆర్‌సిసి డ్రైన్‌ నిర్మాణానికి కమిటీ ఆమోదం .
  సమావేశంలో ఈవీడీఎం డైరెక్టర్‌ విశ్వజిత్‌ కంపాటి, అడిషనల్‌ కమిషనర్లు శృతి ఓజా, బి.సంతోష్‌, ప్రియాంక అలా, వి.కృష్ణ, జయరాజ్‌ కెన్నెడి, ప్రాజెక్ట్‌ సీఈ దేవానంద్‌, అడిషనల్‌ సీసీపీ శ్రీనివాస్‌, లేక్స్‌ సీఈ సురేశ్‌, చీఫ్‌ ఎగ్జామినర్‌ వెంకటేశ్వర్లు, జోనల్‌ కమిషనర్లు శంకరయ్య, మమత, పంకజ, శ్రీనివాస్‌ రెడ్డి, సా మ్రాట్‌ అశోక్‌, రవికిరణ్‌ , చీఫ్‌ ఎంటమాలజీ డా. రాంబాబు, వెటర్నరీ చీఫ్‌ అబ్దుల్‌ వకీల్‌ పాల్గొన్నారు.