క్రిప్టో చీటింగ్‌

క్రిప్టో కరెన్సీ ట్రేడింగ్‌తో మంచి లాభాలొస్తాయంటూ నమ్మిస్తూ సైబర్‌నేరగాళ్లు అందిన కాడికి దోచేస్తున్నారు. బిట్‌ కాయిన్‌ ధర లక్ష డాలర్లకు చేరువవుతుండగా, ఇతర క్రిప్టో కరెన్సీలలో రోజు వారిగా హెచ్చుతగ్గులుండడంతో చాలా మంది విద్యావంతులు స్టాక్స్‌ ఎక్స్ఛేంజ్‌ కంటే క్రిప్టోలో పెట్టుబడులు పెడితే లాభాలు ఆర్జించవచ్చనే ఆలోచనలో ఉంటున్నారు.

• ట్రేడింగ్‌ పేరుతో భారీ మోసాలు
• పది రోజుల్లో కోటి రూపాయలకుపైగా లూటీ
• విద్యావంతులే బాధితులు
• ఇన్‌స్టాగ్రామ్‌ ప్రకటనలు క్లిక్‌ చేసి బాధితులవుతున్న వైనం

సిటీబ్యూరో, ఫిబ్రవరి 16 (నమస్తే తెలంగాణ): క్రిప్టో కరెన్సీ ట్రేడింగ్‌తో మంచి లాభాలొస్తాయంటూ నమ్మిస్తూ సైబర్‌నేరగాళ్లు అందిన కాడికి దోచేస్తున్నారు. బిట్‌ కాయిన్‌ ధర లక్ష డాలర్లకు చేరువవుతుండగా, ఇతర క్రిప్టో కరెన్సీలలో రోజు వారిగా హెచ్చుతగ్గులుండడంతో చాలా మంది విద్యావంతులు స్టాక్స్‌ ఎక్స్ఛేంజ్‌ కంటే క్రిప్టోలో పెట్టుబడులు పెడితే లాభాలు ఆర్జించవచ్చనే ఆలోచనలో ఉంటున్నారు. అలాంటి వారినే లక్ష్యంగా చేసుకుంటూ సైబర్‌నేరగాళ్లు లక్షల రూపాయలు దోచేస్తున్నారు.

కేవలం రెండు రోజుల వ్యవధిలోనే రాచకొండ కమిషనరేట్‌ పరిధిలో రూ. కోటికిపైగా బాధితులు మోసపోయారు. ప్రభుత్వ, ప్రైవేట్‌ ఉద్యోగులు, వ్యాపారులు ఇందులో బాధితులుగా మిగులుతున్నారు. క్రిప్టోలో ఎక్కువగా యూఎస్‌డీటీపై పెట్టుబడి పెట్టండంటూ సైబర్‌నేరగాళ్లు సూచనలు చేస్తున్నారు. మోసపోతున్న వాళ్లు చాల మంది ఇన్‌స్టాగ్రామ్స్‌ రిల్స్‌లలో వచ్చే ట్రేడింగ్‌ ప్రకటనలతో ఈజీగా బుట్టలో పడేస్తున్నారు.

సోషల్‌మీడియాలో సైబర్‌నేరగాళ్లు అర్టిఫిషియల్‌ ఇంటలిజెన్స్‌ను ఉపయోగిస్తూ ప్రముఖులు ట్రేడింగ్‌ చేసి భారీ లాభాలు సంపాదించారంటూ వారి డమ్మీ వీడియోలు తయారు చేసి ప్రకటనలు ఇస్తున్నారు. ఇలాంటి వాటికి కొందరు ప్రేరేపితమవుతుండగా, మరికొందరు ఇతర ప్రకటనలతో ట్రేడింగ్‌ ట్రాప్‌లో పడి భారీ మోసాలు చవిచూస్తున్నారు. సైబర్‌నేరగాళ్లు భారతదేశంలో మోసం ద్వారా బ్యాంకు ఖాతాలలో డిపాజిట్‌ చేయించే రూపాయాలను, యూఎస్‌డీటీ క్రిప్టోలోకి మార్చి విదేశాలకు పంపిస్తున్న ఘటనలు కూడా ఉన్నాయి. ఇలా సైబర్‌నేరగాళ్లు క్రిప్టోలో ట్రేడింగ్‌ అంటూ అమాయకులకు వల వేస్తూ బాధితులను భిన్న రకాలుగా మోసం చేస్తున్నారు. కొన్ని సందర్భాలలో బాధితులు సైతం నిందితులుగా మారే అవకాశాలున్నాయి.

ఇటీవల నమోదైన కొన్ని కేసులు

• బడంగ్‌పేట్‌కు చెందిన ఒక యువతి సాప్ట్‌వేర్‌ ఉద్యోగం చేస్తోంది. ఇన్‌స్టాగ్రామ్‌లో ఒక ట్రేడింగ్‌కు సంబంధించిన ప్రకటన చూసింది. ఆ ప్రకటనను క్లిక్‌ చేయడంతోనే ఒక వాట్సాప్‌ గ్రూప్‌లో చేరాలని సూచించడంతో ఆమె ఆ గ్రూప్‌లో చేరింది. అది ప్రత్యేకంగా క్రిప్టో ట్రేడింగ్‌ గ్రూప్‌ కావడంతో పాటు కిశోర్‌ లింగంపల్లి అనే పేరుతో దానిని నిర్వహిస్తున్నారు. మొదట రూ. 3 వేలతో ప్రారంభించి, కొన్ని లాభాలు చూపించారు. దీంతో ఆమెకు పూర్తిగా నమ్మకం వచ్చిన తరువాత పెట్టుబడిని నెమ్మదిగా పెంచుతూ, మీ డబ్బుకు నాది గ్యారంటీ అంటూ గ్రూప్‌ అడ్మిన్‌ కిశోర్‌ పేరుతో ఉన్న వ్యక్తి చెబుతూ వచ్చాడు. నేరగాళ్లు సూచించిన యాప్‌ నుంచి తన లాభాలు తీసుకోవడానికి బాధితురాలు ప్రయత్నించింది. అయితే ఇప్పుడే డ్రా చేసుకోవద్దని ఇంకా కొన్ని రోజులు ఇన్వెస్ట్‌ చేస్తే మంచి లాభాలొస్తాయంటూ నమ్మిస్తూ దఫ దఫాలుగా లక్షల రూపాయలు పెట్టుబడి పెట్టించారు. ఇలా రూ. 46.97 లక్షల వరకు బాధితురాలు క్రిప్టో ట్రేడింగ్‌ కోసం పెట్టుబడి పెట్టి మోసపోయింది.
• ప్రైవేట్‌ ఉద్యోగం చేసే ఎల్బీనగర్‌కు చెందిన యువకుడు ఇన్‌స్టాగ్రామ్‌లో దాన్‌ యాప్‌ అండ్‌ సాట్‌ స్పోర్ట్స్‌ క్రిప్టో ట్రేడింగ్‌ కంపెనీ స్టాక్‌ అనాలసిస్‌, క్రిప్టో ట్రేడింగ్‌ సర్వీస్‌ చేస్తోందంటూ ఒక ప్రకటన చూసి క్లిక్‌ చేశాడు.
• ఆ తరువాత వాట్సాప్‌ గ్రూప్‌లో లింక్‌ పంపి అందులో బాధితుడి నెంబర్‌ను యాడ్‌ చేశారు. ఆ తరువాత యూఎస్‌డీటీ క్రిప్టో ట్రేడింగ్‌లో రూ. 20 శాతం పక్కాగా లాభాలొస్తాయంటూ నమ్మిస్తూ దఫ దఫాలుగా రూ. 21.86 లక్షలు పెట్టుబడి పెట్టి మోసపోయాడు.
• సరూర్‌నగర్‌ ప్రాంతంలో నివాసముండే ఒక వ్యాపారీకి ఇన్‌స్టాగ్రామ్‌లో ధాన్‌ యాప్‌ అండ్‌ సాట్‌ స్పోర్ట్స్‌ క్రిప్టో ట్రేడింగ్‌ కంపెనీ స్టాక్‌ అనాలసిస్‌, క్రిప్టో ట్రేడింగ్‌ సర్వీస్‌ చేస్తోందంటూ ఒక ప్రకటన చూసి క్లిక్‌ చేశాడు. కొద్దిసేపటి తరువాత విక్కీ అనే పేరుతో ఒక వ్యక్తి వాట్సాఫ్‌ కాల్‌ చేశాడు. మా సర్వీస్‌లలో యూఎస్‌డీటీ క్రిప్టో రూ. 89కి అందిస్తాం, మీరు దానిపై పెట్టుబడి పెట్టండి తక్కువలో తక్కువ 20 శాతం మీకు లాభాలు వచ్చే విధంగా ఫ్లాన్‌ చేద్దామంటూ నమ్మించారు. వాళ్లతో మాట్లాడిన బాధితుడు వారి మాటలు నమ్మేశాడు, దఫ దఫాలుగా రూ. 45,43,998 పెట్టుబడి పెట్టాడు. ఇలా మొదట కొన్ని లాభాలు చూపించి, ఆ తరువాతా భారీగా పెట్టుబడి పెట్టించారు.