రంగారెడ్డి ప్రీబిడ్‌కు అద్భుత స్పందన

రంగారెడ్డి జిల్లా పరిధిలో విక్రయానికి ఉన్న భూములకు మంచి డిమాండ్‌ ఉందని హెచ్‌ఎండీఏ అధికారులు తెలిపారు. మంగళవారం శేరిలింగంపల్లి జీహెచ్‌ఎంసీ జోనల్‌ ఆఫీస్‌ మీటింగ్‌ హాలులో హెచ్‌ఎండీఏ నిర్వహించిన ప్రీబిడ్‌ సమావేశానికి దాదాపు వంద మందికి పైగా హాజరయ్యారు

సిటీబ్యూరో, ఫిబ్రవరి 21 (నమస్తే తెలంగాణ)/ మియాపూర్‌ : రంగారెడ్డి జిల్లా పరిధిలో విక్రయానికి ఉన్న భూములకు మంచి డిమాండ్‌ ఉందని హెచ్‌ఎండీఏ అధికారులు తెలిపారు. మంగళవారం శేరిలింగంపల్లి జీహెచ్‌ఎంసీ జోనల్‌ ఆఫీస్‌ మీటింగ్‌ హాలులో హెచ్‌ఎండీఏ నిర్వహించిన ప్రీబిడ్‌ సమావేశానికి దాదాపు వంద మందికి పైగా హాజరయ్యారు. ఈ సందర్భంగా శేరిలింగంపల్లి, గండిపేట, ఇబ్రహీంపట్నం మండలాల పరిధిలో ఉన్న ల్యాండ్‌ పార్సిల్స్‌ వివరాలను అధికారులు వెల్లడించారు.

ఈ ప్రాంతాల్లో విక్రయానికి ఉన్న ప్రభుత్వ స్థలాలకు ఎలాంటి వివాదాలు లేవని రెవెన్యూ అధికారులు తెలిపారు. మార్చి 1వ తేదీన ఈ ల్యాండ్‌ పార్సిల్స్‌ను ఎం.ఎస్‌.టి.సి ఆధ్వర్యంలో ఆన్‌లైన్‌ వేలం ద్వారా హెచ్‌ఎండీఏ విక్రయించడానికి సన్నాహాలు చేస్తున్నామని చెప్పారు. ఈ సందర్భంగా కొనుగోలుదారుల సందేహాలను హెచ్‌ఎండీఏ ఎస్టేట్‌ ఆఫీసర్‌ కె.గంగాధర్‌ నివృత్తి చేశారు. ఆన్‌లైన్‌ వేలంలో పాల్గొనడానికి వీలుగా ఈ నెల 27న సాయంత్రం 5 గంటల వరకు ఎం.ఎస్‌.టి.సిలో రిజిస్ట్రేషన్‌(నమోదు) చేసుకోవాలని, రిజిస్టర్‌ అయిన వారు 28వ తేదీ సాయంత్రం 5 గంటల గడువు లోపు నిర్దేశించిన ఈఎండీ రుసుము చెల్లించాలని అధికారులు కొనుగోలుదారులకు వివరించారు. ఈ సమావేశంలో రాజేంద్రనగర్‌ రెవెన్యూ డివిజనల్‌ ఆఫీసర్‌(ఆర్డీవో) కె.చంద్రకళ, గండిపేట్‌ తాసీల్దార్‌ రాజశేఖర్‌ తదితరులు పాల్గొన్నారు.