వైద్య సేవల్లో కింగ్

తెలంగాణ ప్రభుత్వం వైద్య రంగానికి ప్రాణం పోస్తున్నది. సీఎం కేసీఆర్‌ వైద్యంపై ప్రత్యేక దృష్టి సారించి వేల కోట్ల నిధులు కేటాయిస్తూ సర్కార్‌ దవాఖానలను కార్పొరేట్‌ దవాఖానలకు దీటుగా తీర్చిదిద్దుతున్నారు

• మూడేండ్లలో 2లక్షలకు పైగా పరీక్షలు
• అందుబాటులోకి ఆల్ట్రా సౌండ్‌, టిఫా స్కానింగ్‌ సేవలు
• పైసా ఖర్చు లేకుండా మోకాలి చిప్ప మార్పిడి శస్త్ర చికిత్స
• ప్రసవాల్లో 60శాతం నార్మల్‌ డెలివరీలే
• 1600 నుంచి 1800 వరకు పెరిగిన ఓపీ పేషెంట్ల సంఖ్య
• కింగ్‌ కోఠి ప్రభుత్వ దవాఖానకు పెరుగుతున్న ఆదరణ

సిటీబ్యూరో, నవంబర్‌ 21(నమస్తే తెలంగాణ) : తెలంగాణ ప్రభుత్వం వైద్య రంగానికి ప్రాణం పోస్తున్నది. సీఎం కేసీఆర్‌ వైద్యంపై ప్రత్యేక దృష్టి సారించి వేల కోట్ల నిధులు కేటాయిస్తూ సర్కార్‌ దవాఖానలను కార్పొరేట్‌ దవాఖానలకు దీటుగా తీర్చిదిద్దుతున్నారు. సూపర్‌ స్పెషాలిటీ వసతులు.. అధునాతనమైన శస్త్ర చికిత్సలు.. 58 రకాల ఉచిత పరీక్షలు, సకాలంలో రిపోర్టులు వెరసి కింగ్‌ కోఠిలోని జిల్లా కేంద్ర దవాఖాన ప్రజలకు నాణ్యమైన వైద్యాన్ని అందిస్తూ ప్రజల మన్ననలు పొందుతున్నది. రోజు రోజుకు వసతులను మెరుగుపర్చుకుంటూ సేవల్లో కింగ్‌లా దుసుకెళ్తున్నది.

మూడేండ్లలో రెండు లక్షలకు పైగా పరీక్షలు..
వివిధ వ్యాధుల నిర్ధారణకు రూ.వేలల్లో ఖర్చు పెట్టలేని పేదల కోసం ప్రభుత్వం మూడేండ్ల క్రితం ఇక్కడి హాస్పిటల్‌లో డయాగ్నోస్టిక్‌ హబ్‌ను ఏర్పాటు చేసింది. ఇందులో రక్త, మల, మూత్ర పరీక్షలు, టైఫాయిడ్‌, డెంగీ, మలేరియా, జ్వరాల నిర్ధారణ, కాలేయం, మూత్ర పిండాలు, థైరాయిడ్‌ పనితీరు పరీక్షలు, కొలెస్ట్రాల్‌, షుగర్‌ వంటివాటితోపాటు 58 రకాల పరీక్షలను ఉచితంగా చేస్తున్నారు. ఆధునాతనమైన పరికరాలతో రోగులు దవాఖానకు వచ్చిన రోజే పరీక్షలు జరిపి రిపోర్టులు అందజేస్తున్నారు. మూడేండ్లలో రెండు లక్షలకుపైగా పరీక్షలను ఉచితంగా చేసినట్లు వైద్యులు తెలిపారు.

టిఫా స్కాన్‌తో తప్పిన తిప్పలు..
టిఫా (టార్గెట్‌ ఇమేజింగ్‌ ఫర్‌ ఫీటల్‌ ఎనామలిస్‌) స్కానింగ్‌ సేవలు నిన్నమొన్నటి వరకు ప్రైవేటు హాస్పిటల్స్‌, ల్యాబ్‌లలో మాత్రమే అందుబాటులో ఉండేవి. ఈ స్కానింగ్‌కు రూ.2,500 నుంచి రూ.3వేల వరకు ఖర్చు అవుతుంది. ఆరు నెలల క్రితమే ప్రభుత్వం కింగ్‌ కోఠి జిల్లా దవాఖానలో రూ.30 లక్షలు వెచ్చించి టిఫా స్కాన్‌తోపాటు ఆల్ట్రా సౌండ్‌ సదుపాయాలను అందుబాటులోకి తేవడంతో గర్భిణులకు తిప్పలు తప్పాయి.

ఆధునిక సదుపాయాలు..

• కింగ్‌ కోఠి దవాఖానలో జనరల్‌ సర్జరీ విభాగానికి ప్రభుత్వం ల్యాప్రోస్కోపిక్‌ సెట్‌ను, సుమారు రూ.50లక్షల విలువ గల అత్యాధునిక పరికరాలను సమకూర్చింది.
• జనరల్‌ వార్డుల్లో 200 పడకలు, మాతా శిశు సంరక్షణ కేంద్రంలో 150 బెడ్లు అందుబాటులోకి తేవడంతో నిత్యం హాస్పిటల్‌లో ఉంటున్న ఇన్‌పేషెంట్లతోపాటు, ఓపీ సేవలు పొందుతున్న వారి సంఖ్య 1600 నుంచి 1800 వరకు ఉంటున్నది.
• ఇటీవల దవాఖానలో బ్లడ్‌ బ్యాంక్‌ను ఏర్పాటు చేయడంతో అత్యవసర సమయాల్లో అనేక మంది గర్భిణులు, క్షతగాత్రులకు రక్తాన్ని అందించి ప్రాణాలు కాపాడే అవకాశం కలిగింది.
• అధిక రక్తపోటు, మధుమేహం, క్యాన్సర్‌ వంటి అసంక్రమితి వ్యాధుల(నాన్‌ కమ్యూనికబుల్‌ డిసీజెస్‌)కు వైద్యమందించేందుకు దవాఖానలో ఎన్‌సీడీ క్లినిక్‌ను ఏర్పాటు చేయడంతో సంబంధిత రోగులకు ఊరటనిస్తున్నది.
• చాలా ఖర్చుతో కూడుకున్న మోకాలి చిప్ప మార్పిడి శస్త్ర చికిత్స ఇక్కడ ఉచితంగా చేయడంతో సామాన్యులకు ఎంతో మేలు చేస్తున్నది.
• హాస్పిటల్‌లో ప్రసవాల సంఖ్య గణనీయంగా పెరిగాయి. నెలకు 250 వరకు ప్రసవాలు జరగుతుండగా ఇందులో నార్మల్‌ డెలివరీలు 60 శాతం వరకు ఉంటున్నాయి.

మెరుగైన వైద్య సేవలు అందిస్తున్నాం
పైసా ఖర్చు లేకుండా నిరుపేదలకు మెరుగైన వైద్య సేవలను అందించేందుకు ప్రభుత్వం చర్యలు తీసుకుంటున్నది. ఇందుకు అనుగుణంగా కింగ్‌ కోఠి జిల్లా దవాఖానలో సకల సదుపాయాలతో నాణ్యమైన వైద్యాన్ని అందిస్తున్నాం. వివిధ విభాగాలకు సంబంధించి 40 మంది స్పెషలిస్టులు ఉన్నారు. కార్పొరేట్‌ స్థాయి వైద్యం అందుతుండడంతో హాస్పిటల్‌కు వచ్చేవారి సంఖ్య కూడా గతంలో కంటే ఎక్కువగా ఉంది.
– డాక్టర్‌ రాజేంద్రనాథ్‌, సూపరింటెండెంట్‌,
కింగ్‌ కోఠి జిల్లా కేంద్ర దవాఖాన