DRF | మాన్‌సూన్‌ యాక్షన్‌ ప్లాన్‌ సిద్ధం.. ఏ విపత్తునైనా ఎదుర్కొంటాం: ఈవీడీఎం డైరెక్టర్‌ ప్రకాశ్‌రెడ్డి

రాబోయే వర్షాకాల సమస్యలను సమర్థవంతంగా ఎదుర్కొనేందుకు జీహెచ్‌ఎంసీ సన్నద్దమైంది. గత అనుభవాలను పరిగణలోకి తీసుకొని ఈ ఏడాది ప్రజలకు ఎలాంటి ముంపు సమస్య లేకుండా చేయడమే లక్ష్యంగా 30 ప్రాంతాల్లో డిజాస్టర్‌ రెస్పాన్స్‌ ఫోర్స్‌ (డీఆర్‌ఎఫ్‌) బృందాలను రంగంలోకి దింపారు.

• 30 సర్కిళ్లకు 30 ప్రత్యేక బృందాలు
• 150 డివిజన్లు.. 450 డీఆర్‌ఎఫ్‌ టీమ్స్‌
• నీట మునిగే 54 ప్రాంతాలకు జియో ట్యాగింగ్‌
• మాన్‌సూన్‌ హెల్ప్‌లైన్‌ : 040-29555500, 900113667

DRF | సిటీబ్యూరో, జూన్‌ 8 (నమస్తే తెలంగాణ) : రాబోయే వర్షాకాల సమస్యలను సమర్థవంతంగా ఎదుర్కొనేందుకు జీహెచ్‌ఎంసీ సన్నద్దమైంది. గత అనుభవాలను పరిగణలోకి తీసుకొని ఈ ఏడాది ప్రజలకు ఎలాంటి ముంపు సమస్య లేకుండా చేయడమే లక్ష్యంగా 30 ప్రాంతాల్లో డిజాస్టర్‌ రెస్పాన్స్‌ ఫోర్స్‌ (డీఆర్‌ఎఫ్‌) బృందాలను రంగంలోకి దింపారు. ముంపు సమస్యలను నివారించేందుకు, బాధితులను రక్షించేందుకు సుశిక్షితులైన సిబ్బందితో ఈవీడీఎం సిద్ధంగా ఉందని, వచ్చే అక్టోబరు నెలాఖరు వరకు ఒక్కో సర్కిల్‌కు ఓ డీఆర్‌ఎఫ్‌ బృందాన్ని నియమించినట్లు ఈవీడీఎం డైరెక్టర్‌ ప్రకాశ్‌రెడ్డి తెలిపారు.

గ్రేటర్‌ వ్యాప్తంగా పడవలు, రక్షణ సామాగ్రితో డీఆర్‌ఎఫ్‌ బృందాలు అందుబాటులో ఉండేలా చర్యలు చేపట్టినట్లు పేర్కొన్నారు. ప్రత్యేకంగా కంట్రోల్‌ రూం ద్వారా నిరంతరం ప్రజలకు సేవలందిస్తామని చెప్పారు. ఎస్‌ఎన్‌డీపీ పనులు వచ్చే 15 రోజుల్లోగా పూర్తవుతాయని పేర్కొన్నారు. బుద్ధభవన్‌లోని తన కార్యాలయంలో గురువారం ఏర్పాటు చేసిన విలేకరుల సమావేశంలో మాన్‌సూన్‌ యాక్షన్‌ప్లాన్‌ వివరాలను ప్రకాశ్‌ రెడ్డి వివరించారు. సాయం అవసరమైన పౌరులు 040-29555500, 900113667 నంబర్లలో సంప్రదించాలని డైరెక్టర్‌ సూచించారు.

ముఖ్యమైన అంశాలు

• నగరంలో 30 సర్కిళ్లు, 150 డివిజన్లు ఉండగా.. 450 మంది డీఆర్‌ఎఫ్‌ బృందాలు మూడు షిఫ్టుల్లో పోలీస్‌ శాఖ సమన్వయంతో పనిచేస్తాయి.
• గత అనుభవాల దృష్ట్యా గ్రేటర్‌లో 100 ప్రాంతాల్లో నీరు నిలిచే ప్రాంతాలను గుర్తించగా.. భారీ నీటి నిల్వలు 54 చోట్ల ఉన్నట్లు గుర్తించి, వాటిని జియో ట్యాగింగ్‌ చేశారు. తక్షణం సంఘటన స్థలానికి చేరుకొని సహాయక చర్యలు చేపట్టేందుకు ఇది దోహదపడనున్నది.
• విరిగి పడిపోయిన చెట్లు, కొమ్మలను తరలించేందుకు 10 హరిత వ్యర్థాల సేకరణ బృందాలు పనిచేయనున్నాయి. ప్రతి జోన్‌కు ఒక అంబులెన్స్‌ను సిద్ధంగా ఉంచారు.
• డీసీఎం, ఇసుజు ట్రక్కు వాహనాలతో నీటిని తోడే 1 హెచ్‌పీ నుంచి 20 హెచ్‌పీ సామర్థ్యం గల మోటార్లను అందుబాటులో ఉంచారు.
• జనరేటర్‌, అగ్ని ప్రమాదాలను ఎదుర్కొనే పరికరాలు, ఇతరత్రా రక్షణ వస్తువులను డీఆర్‌ఎఫ్‌ బృందాలకు కేటాయించిన ప్రాంతాల్లో ఉంటూ రక్షణ చర్యలు చేపడుతారు.
• శిథిల భవనాలు కూలినప్పుడు, వ్యర్థాల తొలగింపునకు అత్యాధునిక పరికరాలతో సిద్ధంగా ఉన్నారు.
• కొత్తగా ఏర్పాటుకానున్న వార్డు కార్యాలయాలకు కొత్తగా 300 రేడియో వైర్లెస్‌ సెట్లను కొనుగోలు చేశారు.

అత్యవసర బృందాలను ఏర్పాటు చేసిన ప్రాంతాలివే
రాజ్‌భవన్‌, జీవీకే మాల్‌, ఫతుల్లాగూడ, గుడి మల్కాపూర్‌, కూకట్‌పల్లి జంక్షన్‌, మలక్‌పేట, ఉప్పల్‌, మెట్టుగూడ, శిల్పారామం, సీఎం క్యాంపు కార్యాలయం, ఓయూ క్యాంపస్‌, షేక్‌పేట, చంపాపేట, మియాపూర్‌ మెట్రో స్టేషన్‌, ఎల్బీనగర్‌, ఈసీఐఎల్‌, బయో డైవర్సిటీ పార్కు, చాంద్రాయణగుట్ట, గచ్చిబౌలి స్టేడియం, సుజనా ఫోరం మాల్‌, సుచిత్ర, సెక్రటేరియట్‌, వనస్థలిపురం, మెహిదీపట్నం, మరో మూడు ప్రాంతాలలో అత్యవసర బృందాలను ఏర్పాటు చేశారు.