Visit:
అటు సరోగసీ బాగోతాలు.. ఇటు స్పెర్మ్‌ కలెక్షన్‌ దందాలు.. తిలాపాపం తలాపిడికెడు అన్నట్లు అటు ఫర్టిలిటీ సెంటర్లు.. ఇటు స్పెర్మ్‌ కలెక్షన్‌ బ్యాంకులు.. అమ్మతనాన్ని అంగడి సరుకుగా మార్చేశాయి. ఇక్కడ నో రూల్స్‌.. నో సెంటిమెంట్‌.. ఓన్లీ మనీ.. ఇది ప్రస్తుతం నగరంలో జరుగుతున్న సంతానభాగ్యం కలిగించే సెంటర్ల దందా.
– సిటీబ్యూరో, జూలై 27 (నమస్తే తెలంగాణ)
ఈ మధ్యకాలంలో వస్తున్న ఒకట్రెండు వెబ్‌సిరీస్‌ల్లో, సినిమాల్లో స్పెర్మ్‌ కలెక్షన్‌కు సంబంధించిన సీన్లు వెగటు పుట్టేలా ఉన్నా.. అవి పూర్తిగా బిజినెస్‌ మోడ్‌లో ఉన్నాయనేది వాస్తవం. ఇందులో స్పెర్మ్‌ కోసం వారికి పోర్న్‌ వీడియోలు చూపించడం, అమ్మాయిలను ఎరగా వేసి వారి నుంచి కలెక్ట్‌ చేసి వాటిని ఒక కంటైనర్‌లో పెట్టి స్టోర్‌ చేయడం వంటి దృశ్యాలు.. ఇలా కూడా చేస్తారా అనే రీతిలో ఉన్నప్పటికీ ఈ తరహా దందా భాగ్యనగరంలోనే జరుగుతున్నదంటే ఆశ్చర్యపోనక్కర్లేదు.
ఏకంగా యువతకు డబ్బుల ఆశ చూపి వారికి గాలం వేసి ఏదో ఒక రీతిలో స్పెర్మ్‌ కలెక్ట్‌ చేస్తున్నారు నిర్వాహకులు. ఈ దందా పూర్తిగా అక్రమమే అయినా మూడు స్పెర్మ్‌లు ఆరు అండాలుగా పెరిగిపోతున్నదని పోలీసులే చెబుతున్నారు. ముఖ్యంగా పలు రాష్ర్టాల్లోని ఫర్టిలిటీ, సరోగసీ సెంటర్లకు సైప్లె చేయడానికి వారితో ఒప్పందాలు కుదుర్చుకుని ఆరోగ్యవంతమైన యువత దగ్గర నుంచి ఎగ్స్‌, స్పెర్మ్‌ సేకరిస్తున్నారని పోలీసుల విచారణలో తేలింది.
సికింద్రాబాద్‌ స్పెర్మ్‌ టెక్‌ సంస్థపై జరిగిన పోలీసుల దాడుల్లో విస్తుపోయే నిజాలు వెలుగుచూశాయి. అద్దె గర్భాల కోసం అక్రమంగా వీర్యాన్ని, అండాలను సేకరిస్తున్న ఇండియన్‌ స్పెర్మ్‌ టెక్‌ మేనేజర్‌ పంకజ్‌సోనిని ఆదివారం పోలీసులు అరెస్ట్‌ చేశారు. ఈ కేసులో ఇప్పటివరకు పోలీసులు పంకజ్‌తో పాటు సంపత్‌, శ్రీను, జితేందర్‌, శివ, మణికంఠ, బోరోలను అదుపులోకి తీసుకున్నారు. సికింద్రాబాద్‌లోని ఇండియన్‌ స్పెర్మ్‌ టెక్‌ సంస్థపై జరిగిన పోలీసుల దాడుల్లో అక్రమంగా నిల్వ ఉంచిన 16 స్పెర్మ్‌, ఎగ్‌ శాంపిల్స్‌ స్వాధీనం చేసుకున్నారు. అసిస్టెడ్‌ రిప్రొడక్టివ్‌ టెక్నాలజీ చట్టం 2021, సరోగసీ చట్టం 2021లను ఈ సంస్థ ఉల్లంఘించినట్లు పోలీసులు గుర్తించారు.
గుజరాత్‌, ఢిల్లీలోని సరోగసీ, టెస్ట్‌ ట్యూబ్‌ సెంటర్ల కోసం శాంపిల్స్‌ సేకరణ జరుగుతున్నదని పోలీసుల ప్రాథమిక విచారణలో తేలింది. సరోగసి కోసం స్పెర్మ్‌ సేకరిస్తున్న క్లినిక్‌ నిర్వాహకులు స్పెర్మ్‌ని అహ్మదాబాద్‌కు తరలిస్తున్నట్లు పోలీసులు తెలిపారు. స్పెర్మ్‌ క్వాలిటీని బట్టి దాతలకు రూ.5వేల నుంచి రూ.10వేల వరకు ఇస్తున్నారు. కాలేజీ యువతను అట్రాక్ట్‌ చేసి వారి నుంచి స్పెర్మ్‌, ఎగ్స్‌ సేకరిస్తున్నారని, ఇందులో ఎగ్స్‌ కోసం ఎక్కువ మొత్తంలో డబ్బులు ఖర్చు పెడుతున్నట్లు తెలిసింది.
అయితే స్పెర్మ్‌ కూడా యువతకు డబ్బుల ఆశ చూపి తమ దగ్గర ఉన్న నెట్‌వర్క్‌ ద్వారా వారిని అట్రాక్ట్‌ చేసి వారి నుంచి సేకరిస్తున్నట్లు సమాచారం. ముఖ్యంగా స్పెర్మ్‌ కలెక్షన్‌ కోసం పోర్న్‌ వీడియోలు కూడా చూపిస్తున్నారని, ఇదంతా పక్కా ప్రణాళిక ప్రకారమే జరుగుతున్నదని ఒక పోలీస్‌ అధికారి ఆఫ్‌ది రికార్డ్‌గా చెప్పారు. తాము స్వాధీనం చేసుకున్న 16 స్పెర్మ్‌ శాంపిల్స్‌ను డీఎంహెచ్‌వోకు అప్పగించినట్లు పోలీసులు చెప్పారు.
మనదేశంలో సరోగసీ, స్పెర్మ్‌ కలెక్షన్లకు సంబంధించి నిర్దిష్ట చట్టాలున్నాయని డీఎంహెచ్‌వో వెంకటి తెలిపారు. సరోగసీ పేరుతో చైల్డ్‌ ట్రాఫికింగ్‌కు పాల్పడుతున్న యూనివర్సల్‌ సృష్టి సెంటర్‌పై దాడి చేసి సీజ్‌ చేసిన తర్వాత ఏర్పాటు చేసిన విలేకరుల సమావేశంలో డీసీపీ రశ్మీ పెరుమాళ్‌తో కలిసి వెంకటి మాట్లాడారు. ఈ సందర్భంగా ఈ సెంటర్‌కు రిజిస్ట్రేషన్‌ గడువు ముగిసిందని, కమర్షియల్‌ సరోగసీ మన దేశంలో పూర్తిగా నిషేధమని ఆయన పేర్కొన్నారు.
కేవలం ఆల్ట్రూయిస్టిక్‌ సరోగసీ అంటే మెడికల్‌ ఖర్చులు, ఇన్సూరెన్స్‌ మినహా ఆర్థిక ప్రతిఫలం లేని సరోగసీకి మాత్రమే అనుమతి ఉందని, ఇందుకు సంబంధించి ఏఆర్‌టీ నిబంధనలను పాటించాలని వెంకటి తెలిపారు. తాము ఈ సెంటర్‌ను గతంలోనే క్లోజ్‌ చేస్తూ సర్టిఫికెట్‌ ఇచ్చామని, కానీ అక్రమంగా సృష్టి సెంటర్‌ నడుపుతున్నారని, నగరంలో స్పెర్మ్‌సెంటర్లు, ఫర్టిలిటీ సెంటర్లకు సంబంధించి అక్రమాలపై దృష్టిపెడతామని వెంకటి పేర్కొన్నారు.
