ఊరెళ్లినట్లు .. పోస్టులు పెట్టొద్దు.. అప్పుడు మీ ఇంటినే దొంగలు టార్గెట్‌ చేయొచ్చు..

సాధారణంగా దసరా, సంక్రాంతి వంటి పండుగల సమయంలో ఇండ్లకు తాళాలు వేసి ఊరెళ్లే వారిని లక్ష్యంగా చేసుకొని విరుచుకుపడే దొంగలు వేసవిలోనూ విజృంభిస్తుంటారు. మే నెల వచ్చిందంటే దాదాపు అన్ని స్థాయిల విద్యార్థులకు సెలవులు ప్రకటిస్తారు. దీంతో చాలా మంది విహార యాత్రలకు వెళ్తుంటారు.

• పోస్టులు పెడితే ఇంట్లో లేరనే విషయం తెలుస్తుంది..
• విహార యాత్రకు వెళ్లేవారు జాగ్రత్తలు పాటించాలి
• ఎక్కడికెళ్లినా.. పోలీసులకు సమాచారం ఇవ్వండి

సిటీబ్యూరో, మే 14 (నమస్తే తెలంగాణ) : సాధారణంగా దసరా, సంక్రాంతి వంటి పండుగల సమయంలో ఇండ్లకు తాళాలు వేసి ఊరెళ్లే వారిని లక్ష్యంగా చేసుకొని విరుచుకుపడే దొంగలు వేసవిలోనూ విజృంభిస్తుంటారు. మే నెల వచ్చిందంటే దాదాపు అన్ని స్థాయిల విద్యార్థులకు సెలవులు ప్రకటిస్తారు. దీంతో చాలా మంది విహార యాత్రలకు వెళ్తుంటారు. మరికొందరు బంధువుల ఇండ్లకు, సొంతూర్లకు పయణమవుతారు. దీనిని ఆసరాగా చేసుకుని దోపిడీ దొంగలు సైతం రెచ్చిపోయే అవకాశాలు ఉన్నట్లు పోలీసులు హెచ్చరిస్తున్నారు.

తాళాలు వేసిన ఇండ్లే లక్ష్యంగా..

ముఖ్యంగా కాలనీలు, అపార్ట్‌మెంట్లు, ఇండిపెండెంట్‌ ఇండ్లపైనే దోపిడీ దొంగలు దృష్టి పెడుతారు. మధ్యా హ్నం, రాత్రి సమయాల్లో నిర్మానుష్యంగా ఉండటంతో ఈ ప్రాంతాల్లో తాళాలు వేసి ఉన్న ఇండ్లను లక్ష్యంగా చేసుకుని తమ చేతివాటాన్ని చూపే అవకాశాలు ఎక్కువగా ఉంటాయని పోలీసులు హెచ్చరిస్తున్నారు. వీటితోపాటు కొత్తగా ఏర్పడుతున్న కాలనీల్లో దూర దూరంగా ఉండే గృహాలు, ఒంటరిగా ఉండే వృద్ధులు, మహిళలను సైతం లక్ష్యంగా చేసుకుని దొంగలు దోపిడీకి పాల్పడే ప్రమాదం ఉందంటున్నారు పోలీసులు.

తీసుకోవాల్సిన జాగ్రతలు :

• ప్రధాన ద్వారానికి సెంట్రల్‌ లాక్‌ సిస్టమ్‌ను ఏర్పాటు చేసుకోవాలి.
• సెన్సార్‌తో కూడిన సెక్యూరిటీ అలారం సిస్టమ్‌ను ఏర్పాటు చేసుకోవాలి.
• పరిసరాలలో ఎవరైనా అనుమానితులు సంచరిస్తుంటే స్థానిక పోలీసులు/100 నంబర్‌కు సమాచారం ఇవ్వాలి.
• వాహనాలను ఇంటి గోడ లోపలనే పార్క్‌ చేసుకోవాలి.
• ప్రధాన ద్వారంతోపాటు చుట్టూ సీసీ కెమెరాలను ఏర్పాటు చేసుకుని, సెల్‌ఫోన్‌లకు అనుసంధానం చేసుకోవడం ఉత్తమం.
• గుమ్మం వద్ద చెత్తతో నిండిన డస్ట్‌బిన్‌, పాల ప్యాకెట్‌, న్యూస్‌ పేపర్‌లు పడి ఉండకుండా జాగ్రత పడాలి. ఇవి ఉండటం వల్ల ఇంట్లో ఎవరూ లేరనే సంకేతాలను దొంగలు గ్రహించే అవకాశం ఉంటుంది.
• వేసిన తాళం కనిపించకుండా కర్టన్స్‌న/ఇతర విధంగా కవర్‌ చేయడం ఉత్తమం.
• బయట పూర్తిగా చీకటి ఉండకుండా ఇంట్లో కొన్ని, ఇంటి బయట ఒక లైటు వెలిగేలా చూడాలి. ఈ లైట్లు వెలగడం వల్ల బయటి వారికి ఇంట్లో ఎవరైనా ఉన్నట్లు తెలుస్తుంది.
• ఇరుగు, పొరుగు వారికి మీరు బయటకు వెళ్తున్న విషయాన్ని తెలియపర్చి, ఇంటిపై ఒక కన్నేసి ఉంచమని చెప్పాలి.
• ఇతర వాటికి సంబంధించిన తాళం చెవిలను షూ రాక్స్‌, దిండు కింద, కబోర్డ్స్‌ పైన, డ్రస్సింగ్‌ టెబుల్‌ డ్రాలు వంటి ప్రదేశాల్లో పెట్టకూడదు.
• అపార్ట్‌మెంట్స్‌లలో నమ్మకమైన వాచ్‌మన్‌ను నియమించాలి. ముఖ్యంగా రాత్రి సమయాల్లో వచ్చిపోయే వారి వివరాలను నమోదు చేసేలా ఓ రిజిస్టర్‌ ఏర్పాటు చేయాలి.
• ఫేస్‌బుక్‌, ఇన్‌స్ట్రాగ్రామ్స్‌లలో ప్రయాణాలకు సంబంధించిన వివరాలను పోస్టు చేయరాదు.

సమాచారం ఇస్తే గస్తీ చేపడుతాం

విహార యాత్రలు, ఊళ్లకు వెళ్లే ప్రజలు తగిన జా గ్రత్తలు తీసుకుంటే దొంగల బారి నుంచి తమ విలువైన వస్తువులు, డబ్బును రక్షించుకోవచ్చు. బయటకు వెళ్లే ముందు స్థానిక పోలీసులకు సమాచారం ఇవ్వాలి. ఇలా ముందస్తు సమాచారం ఇవ్వడం వల్ల స్థానిక పోలీసులు ఆయా ఇండ్లపై ప్రత్యేక దృష్టి పెడుతారు. మధ్యాహ్నం, రాత్రి సమయాల్లో గస్తీ చేపట్టడం వంటివి చేస్తారు. ఇండ్లకు సీసీ కెమెరాలను ఏ ర్పాటు చేసుకోవడంతోపాటు వాటిని తమ మొబైల్‌ ఫోన్లలో ఆన్‌లైన్‌ ద్వారా ఎక్కడి నుంచైనా పర్యవేక్షించవచ్చు. నమ్మకమైన సెక్యూరిటీ గార్డును నియమించుకోవాలి. ముఖ్యంగా బయటకు వెళ్లినా, వెళ్తున్న విషయాలను సోషల్‌ మీడియాలో పెట్టకపోవడం ఉత్తమమం. సోషల్‌ మీడియాలో పోస్టులు పెట్టడం వలన మీరు ఇంట్లో లేరనే విషయం దోపిడీ దొంగలకు సైతం తెలిసిపోయి దొంగతనాలకు పాల్పడే అవకాశాలుంటాయి.

– ఎల్‌.సి.నాయక్‌, క్రైమ్‌ డీసీపీ