24/7 భద్రతకు భరోసా డయల్‌ 100

అర్ధరాత్రి ఆపద వచ్చినా.. అలుమగలు గొడవపడినా.. అనుకోని ప్రమాదం ఎదురైనా.. ఒక్క ఫోన్‌కాల్‌తో క్షణాల్లో వాలిపోతారు. అవాంతరాల నుంచి బయటపడేస్తారు. లాఠీపట్టి బందోబస్తు బాధ్యతలే కాదు.. ప్రాణదాతలుగా మారుతున్నారు రక్షకభటులు. 24X7 డయల్‌ 100 ప్రజలకు సేవలు అందిస్తున్నది. ఫోన్‌కాల్‌ చెవినితాకగానే వాయువేగంతో ఘటనా స్థలికి చేరుకుంటున్నారు.

• ఆపదవేళ.. ఐదు నిమిషాల్లో పోలీసు సేవలు
• 24 గంటలూ అప్రమత్తంగా రక్షకభటులు.. కమాండ్‌ కంట్రోల్‌ నుంచి పర్యవేక్షణ
• ఆపదవేళ ఫోన్‌ కొట్టు.. సేవలు పట్టు..!

అర్ధరాత్రి ఆపద వచ్చినా.. అలుమగలు గొడవపడినా.. అనుకోని ప్రమాదం ఎదురైనా.. ఒక్క ఫోన్‌కాల్‌తో క్షణాల్లో వాలిపోతారు. అవాంతరాల నుంచి బయటపడేస్తారు. లాఠీపట్టి బందోబస్తు బాధ్యతలే కాదు.. ప్రాణదాతలుగా మారుతున్నారు రక్షకభటులు. 24X7 డయల్‌ 100 ప్రజలకు సేవలు అందిస్తున్నది. ఫోన్‌కాల్‌ చెవినితాకగానే వాయువేగంతో ఘటనా స్థలికి చేరుకుంటున్నారు.

“88 ఏటీఎంలో దొంగలు పడ్డారు.. అందులో అలజడి రాగానే బ్యాంకు అధికారులకు సైరన్‌ వినిపించింది. వెంటనే డయల్‌ 100కు ఫోన్‌ చేయడంతో ఐదు నిమిషాల్లో రాచకొండ పోలీసులు అక్కడకు చేరుకున్నారు. ఆ సమయంలో దొంగ ఏటీఎం కేంద్రంలో దొంగతనానికి విఫలయత్నం చేస్తుండగా రెడ్‌ హ్యాండెడ్‌గా పట్టుకున్నారు.” ఇలా డయల్‌ 100కు ఫోన్‌ చేయడంతో వేగంగా పోలీసు సేవలు అందుతున్నాయి.

– సిటీబ్యూరో, ఏప్రిల్‌ 16 (నమస్తే తెలంగాణ)

డయల్‌ 100పై నిరంతరం సమీక్ష

డయల్‌ 100 నంబర్‌కు వచ్చే ఫోన్‌ కాల్స్‌ను ఐటీసెల్‌ పర్యవేక్షిస్తుంటుంది. సాంకేతిక పరిజ్ఞానం సాయంతో మొబైల్‌ పెట్రోలింగ్‌ వాహనం, ఎస్‌హెచ్‌వో, పోలీస్‌ స్టేషన్‌ అందర్నీ ఒకేసారి అప్రమత్తం చేస్తారు. ఘటనా స్థలానికి పోలీసులు చేరేంత వరకు అన్ని స్థాయిల్లోని యంత్రాంగం పర్యవేక్షణ కొనసాగుతుంది. ఫోన్‌ చేసిన వారికి సాయం అందగానే దాన్ని రికార్డు రూపంలో భద్రపరుస్తున్నారు. కొన్ని సందర్భాలలో మాత్రం ఒకే సారి రెండు మూడు కాల్స్‌ రావడంతో ఒక కాల్‌ అటెండ్‌ చేసి, అక్కడి నుంచి మరో ప్రాంతానికి సిబ్బంది వెళ్లే వరకు కొద్ది సమయం పట్టే అవకాశముంటుంది. అయితే ఇందులో అత్యవసరమైనదానికి సిబ్బంది ముందుగా ప్రాధాన్యత ఇస్తారు. ఆలస్యమైతే కారణాలను విశ్లేషించి బాధ్యులపై శాఖాపరమైన చర్యలు తీసుకుంటున్నారు. ఇదంతా సైబరాబాద్‌ పరిధిలోని ఇంటిగ్రేటెడ్‌ కమాండ్‌ అండ్‌ కంట్రోల్‌ సెంటర్‌ నుంచి నిరంతర పర్యవేక్షణ ఉంటుంది.

ఇటీవల కొన్ని ఘటనలు

• మౌలాలీలో ఏటీఎం కేంద్రంలో చోరీ చేస్తుండగా డయల్‌ 100కు ఫోన్‌ రావడంతో పోలీసులు వెంటనే స్పందించి రెడ్‌ హ్యాండెడ్‌గా దొంగను పట్టుకున్నారు.
• గురువారం రాత్రి జూబ్లీహిల్స్‌ వెంకటగిరిలోని ఓ వైన్స్‌లో మద్యం సేవించిన వెంకటేశ్‌ బయటకు వచ్చిన అనంతరం స్నేహితుడి కోసం ఎదురు చూస్తున్నాడు. అంతలోనే రంజిత్‌, షర్ఫుద్దీన్‌ అనే యువకులు అకారణంగా గొడవకు దిగి అతడి మెడలో ఉన్న బంగారు గొలుసు లాక్కొని పరారయ్యారు. రాత్రి 11:45 నిమిషాల ప్రాంతంలో ఘటన జరుగగా డయల్‌ 100కు బాధితుడు ఫోన్‌ చేయడంతో ఐదు నిమిషాలలో సిబ్బంది అక్కడకు చేరుకున్నారు. బాధితుడిని వెంట పెట్టుకొని నిందితుల కోసం ఆ ప్రాంతంలో గాలింపు చేపట్టగా, శ్రీకృష్ణానగర్‌లోని ఓ వైన్‌షాప్‌ వద్ద మరో ఘటన చేసేందుకు అవకాశం కోసం ఎదురు చేస్తున్న ఇద్దరు దొంగలను పోలీసులు పట్టుకున్నారు. ఇలా 20 నిమిషాల వ్యవధిలోనే దొంగలు పట్టుబడ్డారు.
• రూ.2 వేల నోట్లను కేంద్రం రద్దు చేస్తుందని, తమ వద్ద ఎక్కువగా 2వేల నోట్లు ఉన్నాయని, 20 శాతం కమిషన్‌తో రూ.500 తీసుకుంటామని నమ్మించి సంతోష్‌నగర్‌, రిక్షాపురానికి చెందిన ప్రభాకర్‌గౌడ్‌ను ఓ ముఠా రూ.1.9 కోట్లు మోసం చేసింది. బాధితుడి వద్ద నుంచి రూ.2 వేల నోట్లు తీసుకొని, కొద్ది సేపట్లో రూ. 500 నోట్లతో వస్తామంటూ నమ్మించిన ముఠా డబ్బుతో అక్కడి నుంచి పరారైంది. బాధితుడు వెంటనే అప్రమత్తమై డయల్‌ 100కు ఫోన్‌ చేయగా పోలీసులు రంగంలోకి దిగి ఈ ముఠాను పట్టుకున్నారు.

అరగంటలో పట్టేశారు..

• జూబ్లీహిల్స్‌ పోలీసులకు సీపీ అభినందనలు

బంజారాహిల్స్‌, ఏప్రిల్‌ 17 : నేరం జరిగిన నిమిషాల్లోనే సంఘటనా స్థలానికి చేరుకోవడంతో పాటు చాకచక్యంగా వ్యవహరించి ఇద్దరు చైన్‌ స్నాచర్లను అరెస్ట్‌ చేసిన జూబ్లీహిల్స్‌ పోలీసులను నగర పోలీస్‌ కమిషనర్‌ సీవీ.ఆనంద్‌ అభినందించారు. గురువారం రాత్రి 11 గంటల ప్రాంతంలో వెంకటగిరిలోని ఓ వైన్‌షాపు వద్ద వెంకటేశ్‌ అనే వ్యక్తి మెడలోని బంగారు చైన్‌ను గుర్తుతెలియని దుండగులు లాక్కొని పారిపోయారు. ఈ సంఘటనపై సమాచారం అందుకున్న జూబ్లీహిల్స్‌ డిటెక్టివ్‌ ఇన్‌స్పెక్టర్‌ శ్రీనివాస్‌, ఎస్‌ఐ నర్సింగరావు, హోంగార్డు సురేశ్‌ ఘటనా స్థలానికి చేరుకొని 20 నిమిషాల వ్యవధిలోనే నిందితులు రంజిత్‌(30), షేక్‌ షర్ఫుద్దీన్‌(28)ను పట్టుకున్నారు. వారి వద్దనుంచి గొలుసును స్వాధీనం చేసుకున్నారు. ఫిర్యాదు అందుకున్న ఆరగంటలోనే నిందితులను పట్టుకొని సొత్తు రికవరీ చేసిన జూబ్లీహిల్స్‌ డీఐ శ్రీనివాస్‌, ఎస్‌ఐ నర్సింగరావు, హోంగార్డు సురేశ్‌లను నగర పోలీస్‌ కమిషనర్‌ సీవీ ఆనంద్‌ సోమవారం పిలిపించి రివార్డు అందజేయడంతో పాటు ప్రశంసాపత్రం, నగదు ప్రోత్సాహం అందించారు. వారిపనితీరును ప్రశంసించారు.