గచ్చిబౌలిలో నిర్మాణాల కూల్చివేత

గచ్చిబౌలిలో సంధ్య కన్వెన్షన్‌ సమీపంలో చేపడుతున్న పలు అక్రమ నిర్మాణాలను సోమవారం హైడ్రా కూల్చివేసింది. సంధ్య శ్రీధర్‌రావు చేపట్టిన భారీ నిర్మాణాలు, రేకులు షెడ్లు, కంటైయినర్లు, ఫుడ్‌కోర్డులను నేలమట్టం చేశారు. భారీ బందోబస్తు మధ్య హైకోర్డు ఉత్తర్వుల ప్రకారం ఈ చర్యలు చేపట్టినట్లు హైడ్రా అధికారులు పేర్కొన్నారు.

• ఎఫ్‌సీఐ లేఅవుట్‌లో కట్టడాలు నేలమట్టం
• హైకోర్టు ఉత్తర్వుల నేపథ్యంలో చర్యలు

శేరిలింగంపల్లి, నవంబర్‌ 17: గచ్చిబౌలిలో సంధ్య కన్వెన్షన్‌ సమీపంలో చేపడుతున్న పలు అక్రమ నిర్మాణాలను సోమవారం హైడ్రా కూల్చివేసింది. సంధ్య శ్రీధర్‌రావు చేపట్టిన భారీ నిర్మాణాలు, రేకులు షెడ్లు, కంటైయినర్లు, ఫుడ్‌కోర్డులను నేలమట్టం చేశారు. భారీ బందోబస్తు మధ్య హైకోర్డు ఉత్తర్వుల ప్రకారం ఈ చర్యలు చేపట్టినట్లు హైడ్రా అధికారులు పేర్కొన్నారు. శేరిలింగంపల్లి మండల పరిధిలోని గచ్చిబౌలిలో ప్రదాన రహదారికి అనుకొని ఫెర్టిలైజర్స్‌ కార్పొరేషన్‌ ఆఫ్‌ ఇండియా ఎంప్లాయిస్‌ కో-ఆపరేటివ్‌ హౌజింగ్‌ సొసైటీ(ఎఫ్‌సీఐ) లేఅవుట్‌లో కొంతకాలంగా రహదారులు, పార్కు స్థలాలను పట్టించుకోకుండా చేపట్టిన అక్రమ కట్టడాలను కూల్చివేశారు.

ఉదయమే రంగంలోకి దిగిన హైడ్రా 3 భారీ హిటాచీ క్రేన్లు, 7 జేసీబీలు పలు కట్టడాలు నేలమట్టం చేసింది. ఎఫ్‌సీఐ లేఅవుట్‌లో 40 అడుగుల రహదారుల్లో అడ్డంగా నిర్మించిన నాలుగు అంతస్థుల భవనం, మరో 2 భవన సముదాయాలు, మ్యాంగో ఫుడ్‌కోర్టు, యునో ఫుడ్‌కోర్డు ప్రాంగణం, అందులోని కంటైనర్లను పూర్తిగా తొలగించారు. మొత్తం 7 చోట్ల రహదారులను ఆక్రమించి నిర్మించిన 40 వరకు అక్రమ కట్టడాలు, ఫుడ్‌కోర్డులు, ఓ పెట్రోల్‌బంకు గోడను, రెండు సెల్లార్‌ భవంతుల కూల్చివేతలు చేపట్టారు. కట్టడాలతో ఆక్రమణకు గురైన రహదారులకు విముక్తి కల్పించి, వాటి హద్దులు నిర్ధారించి ప్లాట్ల యజమానులకు ప్రయోజనం కలిగేలా ఇచ్చిన హైకోర్టు అదేశాలను అధారంగా ఈ కూల్చివేతలు నిర్వహించినట్లు అధికారులు తెలిపారు. దాదాపు 40 మంది హైడ్రా సిబ్బంది, 35 మంది పోలీసులు, హైడ్రా సర్వే బృందం, పలువురు సిబ్బంది ఈ కూల్చివేతల్లో
పాల్గొన్నారు.