ఎన్నికల ఉల్లంఘన.. ఫిర్యాదులు

ఎన్నికల నియమావళి ఉల్లంఘనపై ఎన్నికల నిర్వహణ అధికారులు ఇస్తున్న ఫిర్యాదుల మేరకు మలక్‌పేట, యాకుత్‌పురా, ముషీరాబాద్‌ నియోజకవర్గాల్లో ఆయా పార్టీల నాయకులపై కేసులు నమోదయ్యాయి.

• మలక్‌పేట, యాకుత్‌పురా నియోజకవర్గాల్లో ఎంఐఎం, కాంగ్రెస్‌, బీజేపీ, బీఆర్‌ఎస్‌ నాయకులపై కేసులు

సిటీబ్యూరో/చాదర్‌ఘాట్‌, నవంబర్‌ 9 (నమస్తే తెలంగాణ): ఎన్నికల నియమావళి ఉల్లంఘనపై ఎన్నికల నిర్వహణ అధికారులు ఇస్తున్న ఫిర్యాదుల మేరకు మలక్‌పేట, యాకుత్‌పురా, ముషీరాబాద్‌ నియోజకవర్గాల్లో ఆయా పార్టీల నాయకులపై కేసులు నమోదయ్యాయి. ఎంఐఎం, కాంగ్రెస్‌, బీజేపీ, బీఆర్‌ఎస్‌ అభ్యర్థులు, ఆయా పార్టీల అనుచరులపై కూడా కేసులు నమోదయ్యాయి. సౌత్‌ ఈస్ట్‌జోన్‌ డీసీపీ రోహిత్‌ రాజ్‌ వివరాలను వెల్లడించారు.

• మలక్‌పేట ఆనంద్‌నగర్‌ కాలనీలో బీజేపీ అభ్యర్థి కరపత్రాలు పంపిణీకి అనుమతి తీసుకున్నాడు. ఆ కరపత్రాలపై కాపీల సంఖ్య, ప్రింటర్‌ పేరు వంటి సమాచారం లేకపోవడంతో బీఆర్‌ఎస్‌ అభ్యర్థి తీగల అజిత్‌రెడ్డిపై కేసు నమోదు చేసి, 41 (ఏ) సీఆర్‌పీసీ నోటీసులు జారీ చేశారు.
• మలక్‌పేట కాంగ్రెస్‌ పార్టీ అభ్యర్థి షేక్‌ అక్బర్‌ తన అనుచరులతో కలిసి 6వ తేదీన ముసారాంబాగ్‌ డివిజన్‌లోని పెద్దబజార్‌, ఇందిరానగర్‌లో ప్రచారం చేస్తుండగా.. ఎంఐఎం పార్టీకి చెందిన ఫహద్‌ బిన్‌మహ్మద్‌ అక్కడ ప్రచారానికి అడ్డంకులు కలిగించాడు. కాంగ్రెస్‌ అభ్యర్థి షేక్‌ అక్బర్‌కు వ్యతిరేకంగా నినాదాలు చేస్తూ.. బెదిరించాడు. దీనిపై కాంగ్రెస్‌ పార్టీ డివిజన్‌ అధ్యక్షుడు ఎల్‌.శ్రీనివాస్‌గౌడ్‌ మలక్‌పేట పోలీసులకు ఇచ్చిన ఫిర్యాదు చేయడంతో, 7వ తేదీన కేసు నమోదు చేసి, బుధవారం నిందితుడిని అరెస్ట్‌ చేసి, 41(ఏ) సీఆర్‌పీసీ నోటీసులు జారీ చేశారు.
• మలక్‌పేట కాంగ్రెస్‌ పార్టీ అభ్యర్థి 6వ తేదీన సంజీవయ్యనగర్‌లో పాదయాత్ర చేస్తూ కరపత్రాలు పంపిణీ చేశాడు. ఆ కరపత్రాలపై ప్రింటింగ్‌ ప్రెస్‌ పేరు, కాంటాక్టు నంబర్‌, ప్రతుల సంఖ్య.. లాంటి వివరాలు లేకపోవడంతో ఎన్నికల నిర్వహణ అధికారులు మలక్‌పేట పోలీసులకు ఫిర్యాదు చేశారు. షేక్‌ అక్బర్‌పై కేసు నమోదు చేసి, 9వ తేదీన 41(ఏ) సీఆర్‌పీసీ నోటీసులు జారీ చేశారు.
• యాకుత్‌పురా నియోజకవర్గంలో బీజేపీ పార్టీ నాయకులు నామినేషన్‌ కోసం ర్యాలీ అనుమతి తీసుకున్నారు. నిబంధనలకు విరుద్ధంగా నిషేధంలో ఉన్న డీజే, డ్రోన్‌ కెమెరాలు వాడారు. ఎన్నికల అధికారి ఇచ్చిన ఫిర్యాదుపై ఐఎస్‌ సదన్‌ పోలీసులు కేసు నమోదు చేసి, బీజేపీ కన్వీనర్‌ గౌలికర్‌ ధీరజ్‌ లాల్‌పై కేసు నమోదు చేశారు. ఈ మేరకు 41(ఏ) సీఆర్‌పీసీ సెక్షన్‌ కింద నోటీసులు జారీ చేశారు.
• మలక్‌పేట నియోజకవర్గంలో కాంగ్రెస్‌ పార్టీ అభ్యర్థికి మద్దతుగా బైక్‌ ర్యాలీని మూడు వందల మందితో నిర్వహించేందుకు రిటర్నింగ్‌ అధికారి నుంచి అనుమతి తీసుకున్నారు. ర్యాలీలో మాత్రం 300 మందికి పైగా పాల్గొనడంతో ట్రాఫిక్‌కు తీవ్ర అంతరాయం కలిగింది. అదేవిధంగా.. జైకా హోటల్‌, తదితర ప్రాంతాల్లో పటాకులు కూడా కాల్చి, ప్రజలను ఇబ్బందులకు గురి చేశారు. దీంతో ఎన్నికల నిర్వహణ అధికారులు ఇచ్చిన ఫిర్యాదుపై డబీర్‌పురా పోలీసులు కేసు నమోదు చేశారు. బుధవారం మహ్మద్‌ అదాన్నాన్‌ ఖమర్‌కు 41(ఏ) సీఆర్‌పీసీ కింద నోటీసులు జారీ చేశారు. ఈ కేసులో ఎ1ను అరెస్టు చేయాల్సి ఉంది.
• ఎంఐఎం అభ్యర్థి నామినేషన్‌ సందర్భంగా 6వ తేదీన 400 మందితో బైక్‌ ర్యాలీకి అనుమతి తీసుకున్నాడు. ర్యాలీలో 800 మంది పాల్గొన్నారని, ట్రాఫిక్‌కు ఇబ్బందులు కలిగించడంతో పాటు నిబంధనలకు విరుద్ధంగా క్రాకర్స్‌ కాల్చారంటూ ఎన్నికల నిర్వహణ అధికారులు చాదర్‌ఘాట్‌ పోలీసులకు ఫిర్యాదు చేశారు. మోడల్‌ కోడ్‌ ఆఫ్‌ కండక్ట్‌ను ఉల్లంఘించారనే ఆరోపణలపై చాదర్‌ఘాట్‌ పోలీసులు కేసు నమోదు చేశారు. బుధవారం నిందితులు అబ్దుల్‌ షాలిద్‌(కార్పొరేటర్‌), సయ్యద్‌ అబ్దుల్లా రజ్వి, మహ్మద్‌ హబీబ్‌ను అరెస్ట్‌ చేసి, వారికి 41(ఏ) సీఆర్‌పీసీ నోటీసులు జారీ చేశారు.
• ముషీరాబాద్‌ పీఎస్‌ పరిధిలో 2 కేసులు నమోదయ్యాయి. రాంనగర్‌లో డీజే బాక్సులు వినియోగించి ట్రాఫిక్‌కు, ప్రజలకు అంతరాయం కలిగించిన పూస రాజు, తదితరులపై.. భోలక్‌పూర్‌లో నిర్వహించిన ప్రచారంలో డీజే బాక్సులతో ప్రజలకు అసౌకర్యం కలిగించిన అంజనీ కుమార్‌పై కేసులు నమోదు చేశారు. డీజే బాక్సులతో పాటు వాహనాలను స్వాధీనం చేసుకున్నారు.
• మలక్‌పేట నియోజకవర్గంలో 200 బైకులతో ప్రచార అనుమతి పొంది.. 400 మందితో బైక్‌ ర్యాలీ నిర్వహించారు. దీంతో చాదర్‌ఘాట్‌ పోలీసులు మణికొండకు చెందిన నూతి రమేశ్‌ కుమార్‌, ఎల్బీనగర్‌కు చెందిన ప్రణీత్‌ కుమార్‌పై కేసులు నమోదు చేశారు. ఈ మేరకు 41 (ఏ) సీఆర్‌పీసీ సెక్షన్‌ కింద నోటీసులు జారీ చేశారు.