Bharosa & She Teams | బాలికలపై చెయ్యేస్తే చెరసాలకే..!

భరోసా పరిష్కరించిన కొన్ని కేసులు

➤ నాలుగేండ్ల బాలికపై సొంత చిన్నాన్నే అఘాయిత్యం చేసిన కేసు భరోసా కేంద్రానికి వచ్చింది. తీవ్రగాయాలతో ఉన్న ఆ పాపను బంధువులు జనవరిలో నిలోఫర్‌ దవాఖానకు తీసుకొచ్చారు. కిందపడటంతో గాయాలయ్యాయని కుటుంబసభ్యులు చెప్పటంతో అనుమానం వచ్చిన వైద్యులు పోలీసులకు ఫిర్యాదు చేశారు. సైఫాబాద్‌లో కేసు నమోదు కాగానే దర్యాపును భరోసా కేంద్రానికి అప్పగించారు. దర్యాప్తులో భాగంగా చిన్నారి నుంచి వాస్తవాలు తెలుసుకొనేందుకు భరోసా టీం చాలా కష్టపడాల్సి వచ్చింది. చివరకు బాలికను ఆడిస్తూ, పాడిస్తూ విషయం మొత్తం తెలుసుకొన్నారు. చిన్నారి స్టేట్‌మెంట్‌, వైద్యుల రిపోర్టులు, ఫోరెన్సిక్‌ నివేదికలు, సాక్ష్యాలను పక్కాగా సేకరించి కోర్టులో చార్జిషీట్‌ వేశారు. దీంతో కోర్టు నిందితుడికి 25 ఏండ్ల జైలు శిక్ష, రూ.20 వేల జరిమానా విధిస్తూ తీర్పు చెప్పింది.

➤ తుకారంగేట్‌లో నివాసముండే దివ్యాంగురాలైన బాలికపై సీసీఎస్‌లో డ్రైవర్‌గా పనిచేస్తున్న మల్లికార్జున అనే హోంగార్డు లైంగిక దాడికి పాల్పడ్డాడు. అమ్మాయి గర్భం దాల్చింది. ఎవరికైనా చెబితే చంపేస్తానంటూ నిందితుడు బెదిరించాడు. ఈ విషయం బయటకు రావడంతో కుటుంబసభ్యులు పోలీసులను ఆశ్రయించారు. బాధితురాలి వద్ద అన్ని వివరాలు తీసుకున్న భరోసా కేంద్రం ఆమెకు అండగా నిలిచింది. అన్ని ఆధారాలు సమర్పించడంతో కోర్టు నిందితుడికి 30 ఏండ్ల జైలు శిక్ష, రూ.40 వేల జరిమానా విధించింది.

➤ కన్న బిడ్డలపైనే ఓ దుర్మార్గుడు అఘాయిత్యం చేశాడు. ముగ్గురు ఆడపిల్లల తండ్రి అయిన అతడు, ఇద్దరు పెద్ద బిడ్డలను బలవంతంగా లోబర్చుకొన్నాడు. అదే విధంగా మూడో బిడ్డపై అఘాయిత్యం చేయబోతే ఆమె షీ టీమ్స్‌కు ఫిర్యాదు చేసింది. అదనపు డీసీపీ శిరీష బృందం ఈ విషయాన్ని సీరియస్‌గా తీసుకొని బాధితురాలికి పూర్తి భరోసా కల్పించింది. బాధితురాలి సోదరిమణులతో మాట్లాడి అభయం ఇవ్వడంతో తండ్రి దారుణాలపై వారు పెదవి విప్పారు. కేసును పక్కాగా దర్యాప్తు చేసిన భరోసా బృందం నిందితుడికి యవజ్జీవ కారాగార శిక్ష పడేలా చేసింది.