Hyderabad | పెళ్లయిన రెండు వారాలకే భర్తకు వేరే యువతితో వివాహం జరిపించిన భార్య.. అసలు ట్విస్ట్‌ తెలిస్తే మైండ్‌ బ్లాక్‌ అయిపోద్ది!

Hyderabad | మొదటి భార్య సాక్షిగా.. ఓ యువకుడు రెండో పెళ్లి చేసుకున్నాడు. రెండో భార్య ఫిర్యాదు మేరకు భర్తతోపాటు మొదటి భార్యపై బంజారాహిల్స్‌ పోలీసులు కేసు నమోదు చేసి, అరెస్టు చేశారు.

Hyderabad | బంజారాహిల్స్‌: మొదటి భార్య సాక్షిగా.. ఓ యువకుడు రెండో పెళ్లి చేసుకున్నాడు. రెండో భార్య ఫిర్యాదు మేరకు భర్తతోపాటు మొదటి భార్యపై బంజారాహిల్స్‌ పోలీసులు కేసు నమోదు చేసి, అరెస్టు చేశారు. పోలీసుల కథనం ప్రకారం.. శ్రీకాకుళం జిల్లాకు చెందిన కరజాడ గాంధీ (23) బంజారాహిల్స్‌ రోడ్‌ నంబర్‌-10లోని సింగాడకుంటలో ఉంటున్నాడు. కేజీ ఫిల్మ్స్‌ పేరుతో ఉన్న యూట్యూబ్‌ చానెల్‌లో డ్యాన్స్‌ వీడియోల్లో నటిస్తాడు. 2020లో యూసుఫ్‌గూడలోని ఓ డ్యాన్స్‌ అకాడమీలో క్లాసికల్‌ నృత్యం నేర్చుకునే సమయంలో అక్కడికి శిక్షణ కోసం వచ్చిన యువతి (20)తో పరిచయం ఏర్పడింది. ప్రేమిస్తున్నానని నమ్మించాడు. పెద్దలను ఒప్పించి పెళ్లి చేసుకోవాలని ఇద్దరూ నిర్ణయించుకున్నారు.

వారి పెళ్లికి పెద్దలు అంగీకరించలేదు. ఇద్దరి మధ్య మనస్పర్ధలు వచ్చాయి. ఆ తర్వాత బాధిత యువతిని పెళ్లి చేసుకునేందుకు గాంధీ నిరాకరించాడు. దీంతో ఆమె ఆరు నెలల కిందట జూబ్లీహిల్స్‌ పోలీసులకు ఫిర్యాదు చేస్తూ.. తనను మోసం చేసిన గాంధీపై చర్యలు తీసుకోవాలని కోరింది. మరోయువతితో అతడికి సంబంధం ఉన్నదని, అందుకే తనను పెళ్లి చేసుకోవడం లేదంటూ ఫిర్యాదులో పేర్కొంది. మరో యువతితో తనకు ఎలాంటి సంబంధం లేదు.. కేవలం ఆమె తన స్నేహితురాలు మాత్రమేనంటూ గాంధీ బుకాయించాడు. కేసు వెనక్కి తీసుకుంటే పెళ్లి చేసుకుంటానని చెప్పి.. ఆరునెలల కిందట తన గదికి తీసుకెళ్లి తాళి కట్టాడు. తాళికట్టే సమయంలో రెండో యువతి కూడా అక్కడే ఉండి పెళ్లి జరిపించింది. ఇదిలాఉండగా..

పెళ్లయిన తర్వాత కొన్నాళ్ల పాటు బాగానే ఉన్న గాంధీ.. తరచూ బాధితురాలిని కొట్టడంతోపాటు ఇంటికి ఆలస్యంగా రావడం, కొన్నిసార్లు రాత్రిపూట షూటింగ్‌ ఉందంటూ రాకపోవడం చేశాడు. దీంతో అనుమానం వచ్చిన బాధిత యువతి వాకబు చేయగా.. తనను పెళ్లి చేసుకోవడానికి రెండు వారాల ముందే రెండో యువతిని కూడా గాంధీ పెళ్లి చేసుకున్నాడని, కేసు నుంచి తప్పించుకోవడం కోసమే గాంధీ, ఆ యువతితో కలిసి ఈ పెళ్లి నాటకం ఆడి మోసం చేశారని గుర్తించింది. ఇద్దరు కలిసి బంజారాహిల్స్‌ రోడ్‌ నంబర్‌- 12లో ఓ గది అద్దెకు తీసుకుని ఉంటున్నారని తెలుసుకున్న బాధిత యువతి.. మంగళవారం రాత్రి అక్కడికి వెళ్లి గాంధీని నిలదీసింది. తనకు రెండో యువతితో ఉండటమే ఇష్టమని, నీతో ఉండటం ఇష్టం లేదంటూ తేల్చి చెప్పాడు. బాధితురాలు బుధవారం పోలీసులకు ఫిర్యాదు చేయడంతో.. నిందితులు కె.గాంధీ, మరో యువతిపై వివిధ సెక్షన్ల కింద కేసు నమోదు చేసి దర్యాప్తు చేపట్టారు. నిందితులను అరెస్ట్‌ చేసి, రిమాండ్‌కు తరలించారు.