Lasya Nanditha | అశ్రునివాళి.. ఎమ్మెల్యే లాస్యనందితకు కన్నీటి వీడ్కోలు

రోడ్డు ప్రమాదంలో ప్రాణాలు కోల్పోయిన కంటోన్మెంట్‌ బీఆర్‌ఎస్‌ ఎమ్మెల్యే లాస్య నందితకు అభిమానులు, రాజకీయ నేతలు, ప్రజలు కన్నీటి వీడ్కోలు పలికారు. ప్రభుత్వ అధికారిక లాంఛనాలతో ఆమె పార్థివదేహానికి మారేడ్‌పల్లి హిందూ శ్మశానవాటికలో అంత్యక్రియలు నిర్వహించారు.

Lasya Nanditha | రోడ్డు ప్రమాదంలో ప్రాణాలు కోల్పోయిన కంటోన్మెంట్‌ బీఆర్‌ఎస్‌ ఎమ్మెల్యే లాస్య నందితకు అభిమానులు, రాజకీయ నేతలు, ప్రజలు కన్నీటి వీడ్కోలు పలికారు. ప్రభుత్వ అధికారిక లాంఛనాలతో ఆమె పార్థివదేహానికి మారేడ్‌పల్లి హిందూ శ్మశానవాటికలో అంత్యక్రియలు నిర్వహించారు. అంతకుముందు కార్ఖానాలోని నివాసం నుంచి అంతిమయాత్ర కొనసాగింది. అంతకుముందు లాస్య నందిత భౌతికకాయానికి సీఎం రేవంత్‌రెడ్డి, మంత్రులు, బీఆర్‌ఎస్‌ అధినేత కేసీఆర్‌ నివాళులర్పించారు. కుటుంబసభ్యులను పరామర్శించి ఓదార్చారు.

• పేరు : గ్యాని లాస్య నందిత
• పుట్టిన తేదీ : 07/09/1986
• ఎస్‌ఎస్‌సీ. : సెయింట్‌ అంథోని హైస్కూల్‌, సికింద్రాబాద్‌
• ఇంటర్‌ : 2004.. రత్న జూనియర్‌ కళాశాల
• బీటెక్‌ : 2012.. సీఎస్‌సీ, మల్లారెడ్డి కాలేజీ
• 2015లో తొలిసారిగా రాజకీయాల్లోకి అరంగేట్రం
• 2015లో కంటోన్మెంట్‌ బోర్డు పరిధిలోని నాలుగో వార్డు నుంచి పోటీ చేసి ఓటమి
• 2016లో తండ్రి సాయన్నతో కలిసి బీఆర్‌ఎస్‌లో చేరి.. కవాడిగూడ కార్పొరేటర్‌గా విజయం
• 2021లో మరోసారి కవాడిగూడ కార్పొరేటర్‌గా పోటీ చేసి స్వల్ప ఓట్ల తేడాతో ఓటమి
• 2023 ఫిబ్రవరి 19న తండ్రి సాయన్న మరణంతో గతేడాది జరిగిన సార్వత్రిక ఎన్నికల్లో లాస్యనందిత కంటోన్మెంట్‌ నుంచి ఎమ్మెల్యేగా గెలుపొందారు
• 2023 డిసెంబర్‌ 24న బోయిన్‌పల్లిలోని ఓ ఆసుపత్రిలో జరిగిన కార్యక్రమంలో పాల్గొనేందుకు వచ్చి లిఫ్ట్‌లో ఇరుక్కు పోయి బయటపడ్డారు.
• ఈ ఏడాది జనవరిలో వారం రోజుల పాటు అనారోగ్యంతో ఆసుపత్రిలో చికిత్స
• ఈ నెల 13న నల్గొండ సభకు వెళ్లి తిరిగి వస్తున్న క్రమంలో జరిగిన రోడ్డు ప్రమాదంలో స్వల్ప గాయాలతో బయటపడ్డారు.
• ఈ నెల 21న చివరిసారి మడ్‌ఫోర్డ్‌ దోభీ ఘాట్‌ వద్ద ఉన్న డబుల్‌ బెడ్రూం ఇండ్ల సముదాయం వద్ద నూతనంగా నిర్మిస్తున్న దక్షిణ కాళీ మాత దేవాలయ భూమి పూజలో పాల్గొన్నారు.
• శుక్రవారం తెల్లవారుజామున పటాన్‌చెరువు సమీపంలో ఔటర్‌ రింగ్‌రోడ్డులో జరిగిన రోడ్డు ప్రమాదంలో ఎమ్మెల్యే లాస్యనందిత ప్రాణాలు కోల్పోయారు.