Eye Problems | 87 శాతం విద్యార్థులకు దృష్టి లోపం.. ప్రమాదపు వలయంలో చిన్నారుల కండ్లు

చిన్నారుల కండ్లు ప్రమాదపు వలయంలో చిక్కుకుపోతున్నాయి. జిల్లాలో వైద్యాధికారులు చేస్తున్న కంటి పరీక్షల్లో విస్తుపోయే విషయాలు వెలుగులోకి వచ్చాయి. జిల్లావ్యాప్తంగా 96.9 శాతం పరీక్షలు జరపగా, ఏకంగా 87.1శాతం మంది విద్యార్థుల కండ్లు దృష్టి సమస్యలతో సతమతమవుతున్నాయని వెల్లడైంది. వీళ్లందరికీ కళ్లజోడు పెడితే కానీ చదువు ముందుకు సాగదన్న విషయం తేటతెల్లమైంది. తరగతి గదిలో బోర్డుపై అక్షరాలను గుర్తించలేకపోతున్నారు.

Eye Problems | సిటీబ్యూరో: చిన్నారుల కండ్లు ప్రమాదపు వలయంలో చిక్కుకుపోతున్నాయి. జిల్లాలో వైద్యాధికారులు చేస్తున్న కంటి పరీక్షల్లో విస్తుపోయే విషయాలు వెలుగులోకి వచ్చాయి. జిల్లావ్యాప్తంగా 96.9 శాతం పరీక్షలు జరపగా, ఏకంగా 87.1శాతం మంది విద్యార్థుల కండ్లు దృష్టి సమస్యలతో సతమతమవుతున్నాయని వెల్లడైంది. వీళ్లందరికీ కళ్లజోడు పెడితే కానీ చదువు ముందుకు సాగదన్న విషయం తేటతెల్లమైంది. తరగతి గదిలో బోర్డుపై అక్షరాలను గుర్తించలేకపోతున్నారు. జిల్లా వ్యాప్తంగా ఉన్న ప్రభుత్వ పాఠశాలల్లో ఒకటో తరగతి నుంచి పదో తరగతి చదివే చిన్నారులందరికీ వైద్యాధికారులు గత నెల 17 నుంచి ఈ నెల 6 వరకు ఉచిత కంటి పరీక్షలు నిర్వహించారు.

8578 మందికి టెస్టులు

హైదరాబాద్‌ జిల్లాలో 8578 మందికి టెస్టులు చేశారు. వారిలో 7471 మంది విద్యార్థులు తీవ్రమైన కంటి సమస్యలతో బాధపడుతున్నట్లు వెల్లడైంది. 87.1శాతం మందికి కంటి అద్దాలు కావాల్సి ఉంది. ఇప్పటివరకు 1018 మంది విద్యార్థుల వరకే రాష్ట్ర ఆరోగ్యశాఖ కంటి అద్దాలు మంజూరు చేస్తూ ఉత్తర్వులిచ్చింది. మిగతావారికి కూడా అతి త్వరలోనే వస్తాయని వైద్యాధికారులు తెలపడం గమనార్హం.

ఆస్పత్రుల వారీగా వివరాలిలా..

• మలక్‌పేట ఏరియా ఆసుపత్రిలో 1598 మంది విద్యార్థులను పరీక్షించగా, 1095 మందికి దృష్టిలోపం ఉన్నట్లు గుర్తించారు.
• నాంపల్లి ఏరియా ఆసుపత్రిలో 1235 మంది పిల్లలను పరీక్షించగా, 1095 మందికి కంటి సమస్యలు ఉన్నట్లు తేలింది.
• కింగ్‌కోటీ జిల్లా ఆసుపత్రిలో 1460 మందికి పరీక్షించగా. 1411 మంది చిన్నారులకు దృష్టి సమస్యలు ఉన్నట్లు నిర్ధారణైంది.
• గాంధీ ఆసుపత్రిలో 1749 మందికి పరీక్షలు నిర్వహించగా 1646 మందికి కంటి లోపం ఉన్నట్లు వెల్లడైంది.
• సరోజినీదేవి కంటి ఆసుపత్రిలో 2536 మంది విద్యార్థులకు కంటి పరీక్షలు నిర్వహించగా, 2214 మందికి దృష్టిలోపాలు ఉన్నట్లు గుర్తించారు.