వేర్వేరు చోట్ల ఆబ్కారీ దాడులు

నగరంలోని పలుచోట్ల ప్రొహిబిషన్‌ అండ్‌ ఎక్సైజ్‌ ఎస్‌టీఎఫ్‌ పోలీసులు దాడులు జరిపారు. ఈ దాడుల్లో రూ.4.36లక్షల విలువ చేసే 122 ఎల్‌ఎస్‌డీ బ్లాస్ట్‌లు, 16 గ్రాముల ఓజీ కుష్‌, 4.69గ్రాముల ఎండీఎంఏ డ్రగ్స్‌ను పట్టుకుని, నిందితులను అరెస్టు చేశారు.

• రూ.4.36లక్షల విలువ చేసే డ్రగ్స్‌ పట్టివేత

సిటీబ్యూరో, మే 31 (నమస్తే తెలంగాణ): నగరంలోని పలుచోట్ల ప్రొహిబిషన్‌ అండ్‌ ఎక్సైజ్‌ ఎస్‌టీఎఫ్‌ పోలీసులు దాడులు జరిపారు. ఈ దాడుల్లో రూ.4.36లక్షల విలువ చేసే 122 ఎల్‌ఎస్‌డీ బ్లాస్ట్‌లు, 16 గ్రాముల ఓజీ కుష్‌, 4.69గ్రాముల ఎండీఎంఏ డ్రగ్స్‌ను పట్టుకుని, నిందితులను అరెస్టు చేశారు. ఎస్‌టీఎఫ్‌ ఈఎస్‌ అంజిరెడ్డి కథనం ప్రకారం..ఢిల్లీలోని ఐఐఐటీలో ఉన్నత చదువులు చదువుతున్న కనిష్‌ కెవిన్‌ అనే యువకుడు డ్రగ్స్‌కు అలవాటు పడ్డాడు.

ఈ క్రమంలో మత్తులో కూరుకుపోయిన సదరు విద్యార్థి పరీక్షల్లో ఫెయిల్‌ కావడంతో హైదరాబాద్‌కు వచ్చి హోటల్‌ మేనేజ్‌మెంట్‌ కోర్సులో చేరాడు. అయితే ఢిల్లీలో ఉన్న పరిచయాలతో అక్కడి నుంచి ఎల్‌ఎస్‌డీ బ్లాస్ట్‌లు కొనుగోలుచేసి నగరంలో విక్రయించడంతోపాటు తాను తీసుకునేవాడు. ఈ మేరకు సమాచారం అందుకున్న ఎస్‌టీఎఫ్‌ పోలీసులు డీడీనగర్‌లో డ్రగ్స్‌ విక్రయాలకు పాల్పడుతున్న కనిష్క్‌ కెవిన్‌ను అరెస్ట్‌ చేసి, అతడి వద్ద నుంచి 113ఎల్‌ఎస్‌డీ బ్లాస్ట్‌లు, 16గ్రాముల ఓజీ కుష్‌ను స్వాధీనం చేసుకున్నారు. పరారీలో ఉన్న ఎం.దీపక్‌కుమార్‌, మహ్మమద్‌ సిరాజ్‌ , జెతిన్‌లపై కేసు నమోదు చేసినట్లు అధికారులు వెల్లడించారు.

• కుత్బుల్లాపూర్‌ రేణుక ఎల్లమ్మ, పోచమ్మ దేవాలయం సమీపంలో సాయి స్థానికంగా డ్రగ్స్‌ విక్రయిస్తున్నట్లు అందిన సమాచారం మేరకు ఎస్‌టీఎఫ్‌ పోలీసులు దాడులు జరిపి అతడి వద్ద నుంచి 9 ఎల్‌ఎస్‌డీ బ్లాస్ట్‌లను స్వాధీనం చేసుకున్నారు. నిందితుడిని అరెస్టు చేసి కేసును కుత్బుల్లాపూర్‌ ఎక్సైజ్‌ పోలీసులకు అప్పగించారు.
• బెంగుళూరు ప్రాంతానికి చెందిన దేశిక్‌ ఉపాధి కోసం నగరానికి వలస వచ్చాడు. డ్రగ్స్‌కు అలవాటు పడిన దేశిక్‌ .. శనివారం బంజారాహిల్స్‌ రోడ్డు నంబర్‌-3లో డ్రగ్స్‌ విక్రయిస్తుండగా ఎస్‌టీఎఫ్‌ పోలీసులు పట్టుకుని, అతడి వద్ద నుంచి 4.69గ్రాముల ఎండీఎంఏ డ్రగ్స్‌ను స్వాధీనం చేసుకున్నారు. విచారణ నిమిత్తం కేసును అమీర్‌పేట ఎక్సైజ్‌ స్టేషన్‌కు అప్పగించారు.