ఎయిర్‌పోర్టు మెట్రో మార్గంలో 3 కోచ్‌లతో 10 మెట్రో రైళ్లు

ఎయిర్‌పోర్టు ఎక్స్‌ప్రెస్‌ మెట్రో లైన్‌ ప్రాజెక్టు పనులు ముమ్మరంగా కొనసాగుతున్నాయి. ఒకవైపు క్షేత్ర స్థాయిలో మెట్రో అలైన్‌మెంట్‌కు సంబంధించిన సర్వే పనులు కొనసాగుతుండగా, మరోవైపు మెట్రో రైలు కోచ్‌ల డిజైన్‌, వాటి తయారీపై మెట్రో అధికారులు

• రద్దీ సమయాల్లో 8 నిమిషాలకో రైలు
• మిగతా సమయాల్లో 20 నిమిషాలకు
• నిర్ణయించిన మెట్రో అధికారులు

సిటీబ్యూరో, జనవరి 17 (నమస్తే తెలంగాణ): ఎయిర్‌పోర్టు ఎక్స్‌ప్రెస్‌ మెట్రో లైన్‌ ప్రాజెక్టు పనులు ముమ్మరంగా కొనసాగుతున్నాయి. ఒకవైపు క్షేత్ర స్థాయిలో మెట్రో అలైన్‌మెంట్‌కు సంబంధించిన సర్వే పనులు కొనసాగుతుండగా, మరోవైపు మెట్రో రైలు కోచ్‌ల డిజైన్‌, వాటి తయారీపై మెట్రో అధికారులు దృష్టి సారించారు. మొదటి దశలో నిర్మించిన మెట్రో రైలు ప్రాజెక్టు కంటే మరింత అత్యాధునికంగా ఉండేలా దీన్ని రూపొందిస్తున్నారు.

ఒకేసారి 120 కి.మీ వేగంతో దూసుకెళ్లే ఎయిర్‌పోర్టు ఎక్స్‌ప్రెస్‌ మెట్రో రైలును 3 కోచ్‌లతో ఉండేలా డిజైన్‌ చేస్తున్నామని, ప్రాథమికంగా 10 రైళ్లను ఒకేసారి తయారు చేయించనున్నట్లు, భవిష్యత్తులో 6 కోచ్‌లతో ఉండే రైళ్లు రాకపోకలు సాగించేందుకు వీలుగా మెట్రో స్టేషన్ల నిర్మాణం ఉంటుందని మెట్రో అధికారి ఒకరు తెలిపారు. ఐటీ కారిడార్‌లోని రాయదుర్గం నుంచి శంషాబాద్‌ ఎయిర్‌పోర్టు వరకు ఉన్న 31 కి.మీ దూరాన్ని 26 నిమిషాల్లో చేరుకునేలా ట్రాక్‌ను డిజైన్‌ చేస్తున్నారు. ఎయిర్‌పోర్టు మెట్రో మార్గంలో రద్దీ సమయాల్లో ప్రారంభంలో ప్రతి 8 నిమిషాలు, అవసరమైతే ప్రతి 2.5 నిమిషాలకు ఒక రైలును నడిపేందుకు వీలుగా, అదేవిధంగా మిగతా సమయాల్లో ప్రతి 20 నిమిషాలకో మెట్రో రైలు నడుపనున్నారు.

ఎయిర్‌పోర్టు ఎక్స్‌ప్రెస్‌ మెట్రోలో మరిన్ని ఫీచర్లు..

• కోచ్‌లను తక్కువ బరువుతో కూడిన స్టెయిన్‌లెస్‌ స్టీల్‌ లేదా అల్యూమినియంతో రూపొందిస్తారు.
• విమానాశ్రయానికి వెళ్లే మార్గం కావడంతో ప్రతి మెట్రో స్టేషన్‌లో విమాన రాకపోకలకు సంబంధించిన సమాచారం చూసుకునేలా ఎల్‌సీడీ స్క్రీన్‌లు, డెస్క్‌లను ఏర్పాటు చేయాలని మెట్రో అధికారులు నిర్ణయించారు.
• సిటీలోని మెట్రోతో పాటు ఎయిర్‌పోర్టు మెట్రోలోనూ ప్రయాణం చేసేందుకు వీలుగా సింగిల్‌ స్మార్ట్‌ టికెట్‌ను అందుబాటులోకి తీసుకురానున్నారు.
• రిటైల్‌ షాపింగ్‌, ఫుడ్‌ కోర్టులు, ఇన్పోటైయిన్‌మెంట్‌ వంటి స్టేషన్‌లలో ఉంటాయి.
• ఎయిర్‌ కండిషన్‌ కోచ్‌లతో పాటు అందులో ఎల్‌సీడీ స్క్రీన్‌లు, రూట్‌మ్యాప్‌, 360 డిగ్రీల కోణంలో సీసీటీవీ కెమెరాలు మెట్రో రైళ్లు, స్టేషన్‌లలో ఉంటాయి.
• విద్యుత్‌ సరఫరా కోసం 25 కేవీ ఓవర్‌ హెడ్‌ ట్రాక్షన్‌ ఉంటుంది.
• రాయదుర్గం మెట్రో స్టేషన్‌తో పాటు కొన్ని ఎంపిక చేసిన మెట్రో స్టేషన్‌లలో ప్రయాణికులను, బ్యాగేజీలను తనిఖీ చేసేందుకు ప్రత్యేకంగా కేంద్రాలు ఏర్పాటు చేస్తారు.