3 రోజుల్లో.. రూ. 10 కోట్లు.. సొత్తు స్వాధీనం

ఎన్నికల కోడ్‌ అమలులోకి వచ్చిన 9వ తేదీ నుంచి నగరంలో నిర్వహించిన విస్తృత తనిఖీలలో సుమారు రూ.10 కోట్ల విలువైన బంగారం, వెండి, నగదు, మద్యం, గంజాయి స్వాధీనం చేసుకున్నట్లు నగర పోలీస్‌ కమిషనర్‌ సీవీ ఆనంద్‌ వెల్లడించారు.

• నిరంతర పర్యవేక్షణ.. ఎక్కడికక్కడ చెక్‌పోస్టులు
• నగర కమిషనర్‌ సీవీ ఆనంద్‌
• 24/7 గంటలూ నిఘా

సిటీబ్యూరో, అక్టోబర్‌ 11 (నమస్తే తెలంగాణ): ఎన్నికల కోడ్‌ అమలులోకి వచ్చిన 9వ తేదీ నుంచి నగరంలో నిర్వహించిన విస్తృత తనిఖీలలో సుమారు రూ.10 కోట్ల విలువైన బంగారం, వెండి, నగదు, మద్యం, గంజాయి స్వాధీనం చేసుకున్నట్లు నగర పోలీస్‌ కమిషనర్‌ సీవీ ఆనంద్‌ వెల్లడించారు. ఎన్నికల నేపథ్యంలో ఓటర్లను ప్రలోభ పెట్టేందుకు వినియోగించే నగదు, లిక్కర్‌, ఇతరత్రా అక్రమ రవాణాను అడ్డుకోవడంపై ఫోకస్‌ పెట్టామని సీపీ తెలిపారు. నిఘాలో భాగంగానే 7.706 కిలోల బంగారం (రూ. 4.2 కోట్లు), 11,700 కిలోల వెండి (రూ. 8.77 లక్షలు), రూ. 5.1 కోట్ల నగదు, 110 లీటర్ల మద్యం, 23 మొబైల్‌ ఫోన్స్‌, 43 క్వింటాళ్ల రేషన్‌ బియ్యాన్ని స్వాధీనం చేసుకున్నట్లు తెలిపారు. స్థానిక పోలీసులు, ఫ్లైయింగ్‌ స్కాడ్‌ బృందాలు, టాస్క్‌ఫోర్స్‌, ఇతర విభాగాలతో 24/7 చెక్‌పోస్టుల వద్ద పర్యవేక్షణ ఉంటుందని, తమ ప్రాంతాల్లో ఎక్కడైనా అనుమానాస్పద కార్యకలాపాలు కనిపిస్తే పోలీసులకు సమాచారమివ్వాలని సీపీ సూచించారు.

ఎన్నికలు.. తనిఖీలు

• బండ్లగూడ: అత్తాపూర్‌ పోలీసులు చేపట్టిన తనిఖీల్లో ఓ వ్యక్తి వద్ద 50 తులాల బంగారం లభించింది.
• మెహిదీపట్నం: మెహిదీపట్నం చౌరస్తాలో బుధవారం సాయంత్రం నిర్వహించిన తనిఖీల్లో టోలీచౌకి నివాసి మిర్జా నిజాముద్దీన్‌ వద్ద రూ. 2.20 లక్షల నగదును హుమాయూన్‌నగర్‌ పోలీసులు పట్టుకున్నారు
• మూసాపేట: కూకట్‌పల్లి పోలీసులు తనిఖీలు చేపట్టగా ఎల్లమ్మబండ దత్తాత్రేయ కాలనీకి చెందిన ద్వారక ప్రసాద్‌(49) వద్ద రూ.3.50 లక్షలు లభించాయి.
• కవాడిగూడ: గాంధీనగర్‌ పోలీసులు బుధవారం సాయంత్రం బైబిల్‌ హౌజ్‌ వద్ద వాహనాల తనిఖీ చేపట్టారు. కియా కారులో తరలిస్తున్న ఒక కిలో బంగారాన్ని పోలీసులు స్వాధీనం చేసుకున్నారు.
  – దోమలగూడ పోలీసులు నిర్వహించిన తనిఖీలలో ద్విచక్ర వాహనంపై వెళ్తున్న ఓ యువకుడి వద్ద రూ.1.75 లక్షలు లభించాయి.
• జూబ్లీహిల్స్‌: జూబ్లీహిల్స్‌ నీరూస్‌ జంక్షన్‌ వద్ద బుధవారం రాత్రి జూబ్లీహిల్స్‌ పోలీసులు తనిఖీలు చేపట్టగా.. కారులో వెళ్తున్న ఓ మహిళ వద్ద రూ.5.50 లక్షలు లభించాయి.