నగరంలో మరో పెద్ద ఉద్యానం

ఒకవైపు పట్టణీకరణతో పెరుగుతున్న కాలుష్యం.. మరోవైపు ఉద్యోగ నిర్వహణలో ఒత్తిడి.. వెరసి నగర వాసి జీవన విధానంలో వస్తున్న మార్పులతో ఎన్నో అనారోగ్య సమస్యలు ఉత్పన్నమవుతున్నాయి. వీటి నుంచి నగర వాసులకు ఉపశమనం కల్పించేందుకు రాష్ట్ర ప్రభుత్వం అర్బన్‌ ఫారెస్ట్‌ బ్లాక్‌ల అభివృద్ధికి శ్రీకారం చుట్టింది

మంచిరేవుల వద్ద 100 హెక్టార్లలో అర్బన్‌ ఫారెస్ట్‌ పార్క్‌
కేబీఆర్‌ పార్కు తరహాలో.. ఐటీ కారిడార్‌లో అర్బన్‌ ఫారెస్ట్‌ పార్క్‌
100కు పైగా హెక్టార్ల విస్తీర్ణంలో, ఓఆర్‌ఆర్‌ను ఆనుకొని ఏర్పాటు
4 కి.మీ పొడవునా వాకింగ్‌ ట్రాక్‌
సందర్శకులను ఆకట్టుకోనున్న కొండల నడుమ చెరువు
కుటుంబ సమేతంగా వచ్చి సేద తీరేలా ఏర్పాట్లు

సిటీబ్యూరో,జూన్‌ 16 (నమస్తే తెలంగాణ): ఒకవైపు పట్టణీకరణతో పెరుగుతున్న కాలుష్యం.. మరోవైపు ఉద్యోగ నిర్వహణలో ఒత్తిడి.. వెరసి నగర వాసి జీవన విధానంలో వస్తున్న మార్పులతో ఎన్నో అనారోగ్య సమస్యలు ఉత్పన్నమవుతున్నాయి. వీటి నుంచి నగర వాసులకు ఉపశమనం కల్పించేందుకు రాష్ట్ర ప్రభుత్వం అర్బన్‌ ఫారెస్ట్‌ బ్లాక్‌ల అభివృద్ధికి శ్రీకారం చుట్టింది. విశ్వనగరంగా మారుతున్న హైదరాబాద్‌లో అత్యుత్తమ జీవన ప్రమాణాలు కల్పించేందుకు గ్రేటర్‌ చుట్టూ ఉన్న అటవీ ప్రాంతాలను అర్బన్‌ పార్కులుగా తీర్చిదిద్దుతూ ఆహ్లాదాన్ని పంచుతున్నారు. తాజాగా నగరానికి పడమర దిక్కున శరవేగంగా విస్తరిస్తున్న ఐటీ కారిడార్‌లో సుమారు 100 హెక్టార్ల విస్తీర్ణంలో ఉన్న అటవీ ప్రాంతాన్ని అర్బన్‌ ఫారెస్ట్‌ పార్కుగా రాష్ట్ర అటవీ అభివృద్ధి సంస్థ తీర్చిదిద్దుతున్నది.

కేబీఆర్‌ పార్కు తరహాలో..
కాంక్రీట్‌ జంగిల్‌గా మారుతున్న మహానగరంలో అటవీ ప్రాంతాలు నగర వాసులకు ఆహ్లాదాన్ని పంచుతున్నాయి. నగరం నడిబొడ్డున బంజారాహిల్స్‌, జూబ్లీహిల్స్‌ కొండల మధ్య ఉన్న కేబీఆర్‌ పార్కు తరహాలోనే ఐటీ కారిడార్‌లోని కోకాపేట, పుప్పాల్‌గూడ, నానక్‌రాంగూడ, గచ్చిబౌలి ఫైనాన్సియల్‌ డిస్ట్రిక్‌, నార్సింగి ప్రాంతాలకు సమీపంలో ఉన్న మంచిరేవులలో సుమారు 100 హెక్టార్లకు పైగా విస్తరించి ఉన్న అటవీ ప్రాంతాన్ని అర్బన్‌ ఫారెస్ట్‌ పార్కుగా తీర్చిదిద్దుతున్నారు. ఓఆర్‌ఆర్‌ లోపల ఉన్న ఈ అటవీ ప్రాంతం చిలుకూరు మృగవని అటవీ ప్రాంతంలో ఒక భాగంగా ఉండేది. కాని ఓఆర్‌ఆర్‌ దాని మధ్యలోనుంచే వెళ్లడంతో రెండుగా విడిపోయింది. ప్రస్తుతం ఈ ప్రాంతాల్లో పెద్ద ఎత్తున నివాస ప్రాంతాలు రావడంతో నగరంలోని కేబీఆర్‌ పార్కు తరహాలో దీన్ని అభివృద్ధి చేసి, నగర వాసులకు అందుబాటులోకి తీసుకురానున్నారు.

పార్కులో ఏర్పాటు చేస్తున్న వసతులు..

• ఎత్తైన రాళ్ల గుట్టలతో కూడిన ఈ అటవీ ప్రాంతంలో కొన్ని కి.మీ మేర ట్రాకింగ్‌ రూట్‌ను నిర్మిస్తున్నారు.
• సైకిల్‌ ట్రాక్‌ను 4 కి.మీ మేర ఏర్పాటు చేసి, సైకిళ్లను నిలిపేందుకు షెడ్డును ఏర్పాటు చేస్తున్నారు.
• నడక దారి (వాకింగ్‌ ట్రాక్‌)ని 4 కి.మీ మేర నిర్మించారు.
• సందర్శకులు హాయిగా కూర్చుని మాట్లాడేందుకు వీలుగా చెట్ల కింద రచ్చబండలను ఏర్పాటు చేశారు.
• అటవీ ప్రాంతం మధ్యలో పెద్ద చెరువు ఉండటంతో దాన్ని సందర్శకులు పూర్తి స్థాయిలో అస్వాదించేలా చెరువు కట్టను, వ్యూ
• పాయింట్‌ను నిర్మిస్తున్నారు. చెరువులోకి నీరు వచ్చే మార్గంలో చెక్‌ డ్యాంను నిర్మించారు.
• అటవీ పార్కు మొత్తాన్ని, నగరాన్ని చూసేలా ఎత్తైన వాచ్‌ టవర్‌ను ఏర్పాటు చేస్తున్నారు.
• అటవీ ప్రాంతంలో ఖాళీ ప్రదేశం ఉన్న చోట 45 వేల మొక్కలు నాటుతుండగా, అందులో సుమారు 44 రకాల అటవీ జాతి మొక్కలు ఉన్నాయి.
• ఔటర్‌ రింగు రోడ్డును అనుకొని ఉన్న పార్కు ప్రవేశ ద్వారాన్ని ఆకర్షణీయంగా తీర్చిదిద్దుతున్నారు.
• పిల్లల కోసం ఓపెన్‌ ఎయిర్‌ స్కూలు వేదికను ఏర్పాటు చేస్తున్నారు.