Snacks | రాత్రి పూట ఆక‌ల‌వుతుంద‌ని స్నాక్స్ తిన‌కండి.. వీటిని తీసుకుంటే ఎంతో మేలు జ‌రుగుతుంది..

అర్ధరాత్రి ఆకలి వేయగానే చాలామంది వెంటనే ఇన్‌స్టంట్ నూడుల్స్ వైపు మొగ్గు చూపుతారు. కేవలం కొన్ని నిమిషాల్లో తయారయ్యే ఈ ఆహారం తాత్కాలికంగా ఆకలిని తీర్చినా, ఆరోగ్యంపై దీర్ఘకాలిక ప్రభావాలు చూపే ప్రమాదం ఉందని నిపుణులు హెచ్చరిస్తున్నారు.

Snacks | అర్ధరాత్రి ఆకలి వేయగానే చాలామంది వెంటనే ఇన్‌స్టంట్ నూడుల్స్ వైపు మొగ్గు చూపుతారు. కేవలం కొన్ని నిమిషాల్లో తయారయ్యే ఈ ఆహారం తాత్కాలికంగా ఆకలిని తీర్చినా, ఆరోగ్యంపై దీర్ఘకాలిక ప్రభావాలు చూపే ప్రమాదం ఉందని నిపుణులు హెచ్చరిస్తున్నారు. ముఖ్యంగా రాత్రి వేళల్లో తరచూ ఇన్‌స్టంట్ నూడుల్స్ తినడం గుండె ఆరోగ్యం, రక్తపోటు, నిద్ర, జీవక్రియలపై ప్రతికూల ప్రభావం చూపిస్తుంద‌ని చెబుతున్నారు. ఇన్‌స్టంట్ నూడుల్స్‌లో ప్రధానంగా అధిక మొత్తంలో సోడియం (ఉప్పు) ఉంటుంది. ఒక ప్యాకెట్ నూడుల్స్‌లో సుమారు 800 నుంచి 1,200 మిల్లీగ్రాముల వరకు సోడియం ఉండే అవకాశం ఉంది. ప్రపంచ ఆరోగ్య సంస్థ (WHO) సూచనల ప్రకారం ఒక వ్య‌క్తి రోజుకు 2వేల మిల్లీగ్రాముల కంటే తక్కువ సోడియం మాత్రమే తీసుకోవాలి. అంటే ఒక్క బౌల్ నూడుల్స్‌తోనే రోజువారీ పరిమితికి సగానికి పైగా చేరుకునే అవకాశం ఉంటుంది.

ర‌క్త‌నాళాలపై ఒత్తిడి పెరిగే అవ‌కాశం..

సోడియం అధికంగా తీసుకున్నప్పుడు శరీరంలో నీరు నిల్వ ఉండే పరిస్థితి ఏర్పడుతుంది. దీంతో రక్తనాళాల్లో ఒత్తిడి పెరిగి గుండె మరింత కష్టపడాల్సి వస్తుంది. ఫలితంగా రక్తపోటు పెరిగే ప్రమాదం ఉంటుంది. ఇప్పటికే అధిక రక్తపోటు లేదా గుండె జబ్బుల కుటుంబ చరిత్ర ఉన్నవారిలో ఈ ప్రమాదం మరింత ఎక్కువగా ఉంటుంది. నిపుణుల ప్రకారం సమస్య కేవలం నూడుల్స్ తినడంలోనే కాదు, వాటిని రాత్రి ఆలస్యంగా తినడంలో కూడా ఉంటుంది. సాధారణంగా రాత్రి సమయంలో శరీరంలోని రక్తపోటు సహజంగా కొంత తగ్గుతుంది. దీనివల్ల గుండె, రక్తనాళాలకు విశ్రాంతి లభిస్తుంది. అయితే అధిక సోడియం కలిగిన ఆహారాన్ని రాత్రి వేళల్లో తీసుకుంటే ఈ సహజ ప్రక్రియకు అంతరాయం కలుగుతుంది. అదే సమయంలో మూత్రపిండాలు (కిడ్నీలు) రాత్రి వేళల్లో కొంత నెమ్మదిగా పనిచేస్తాయి. ఫలితంగా శరీరంలోకి చేరిన అదనపు సోడియాన్ని బయటకు పంపేందుకు ఎక్కువ సమయం పడుతుంది. దీంతో రక్తపోటుపై ప్రభావం ఎక్కువసేపు కొనసాగుతుంది.

చ‌క్కెర స్థాయిల‌పై ప్ర‌భావం..

రాత్రి సమయంలో ఇన్సులిన్ సున్నితత్వం కూడా తక్కువగా ఉంటుంది. అలాంటి సమయంలో కార్బోహైడ్రేట్లు అధికంగా ఉండే నూడుల్స్ తీసుకోవడం వల్ల రక్తంలో చక్కెర స్థాయిలు వేగంగా పెరిగే అవకాశం ఉంటుంది. ఇది జీవక్రియల సమతుల్యతను దెబ్బతీస్తుంది. నిద్రపై కూడా ఈ అలవాటు ప్రతికూల ప్రభావం చూపిస్తుంది. రాత్రి ఆలస్యంగా భారీ ఆహారం తీసుకోవడం వల్ల శరీరానికి అసౌకర్యంగా అనిపించడమే కాకుండా నిద్రకు అవసరమైన హార్మోన్ల పనితీరుపై కూడా ప్రభావం పడే అవకాశం ఉంటుంది. దీంతో నిద్ర నాణ్యత త‌గ్గుతుంది. రాత్రిపూట తరచూ అధిక సోడియం ఉన్న ఆహారాలు తీసుకునే వారిలో ఉదయం లేవగానే తలనొప్పి, అలసట, రక్తపోటు స్వల్పంగా పెరగడం వంటి సమస్యలు కనిపించే అవకాశం ఉంటుందని నిపుణులు చెబుతున్నారు.

ఆరోగ్య‌క‌ర‌మైన ఆహారాలు ముఖ్యం..

క‌నుక అర్ధరాత్రి ఆకలి వేస్తే ఇన్‌స్టంట్ నూడుల్స్‌కు బదులుగా ఆరోగ్యకరమైన ప్రత్యామ్నాయాలను ఎంచుకోవడం మంచిది. చిన్న గిన్నె పప్పు, వేయించిన మఖానా (ఫాక్స్ నట్స్), అరటిపండు, ఉప్పు లేని డ్రైఫ్రూట్స్, పసుపు కలిపిన గోరువెచ్చని పాలు లేదా క‌మోమిల్ టీ, కొద్దిగా పీనట్ బటర్ రాసిన గోధుమ రొట్టె వంటి ఆహారాలు ఆరోగ్యకరమైన ఎంపికలుగా ఉంటాయి. నిపుణుల అభిప్రాయం ప్రకారం నూడుల్స్‌ను పూర్తిగా మానేయాల్సిన అవసరం లేదు. అయితే వాటిని ప్రతిరోజూ ముఖ్యంగా రాత్రి 10 గంటల తర్వాత తినే అలవాటుగా మార్చుకోవద్దు. ఒకవేళ తినాల్సి వచ్చినా పరిమిత మోతాదులో, తక్కువ ఉప్పు కలిగిన ఎంపికలను ఎంచుకోవడం ఆరోగ్యానికి మేలు చేస్తుంది.