White Noise Machine | నిద్ర‌లేమి స‌మ‌స్య‌ను త‌గ్గించే వైట్ నాయిస్ యంత్రం.. అస‌లేమిటిది.. ఎలా ప‌నిచేస్తుంది..?

ఇటీవల నిద్రలేమి సమస్యలను తగ్గించేందుకు వైట్‌ నాయిస్‌ యంత్రాల వినియోగం పెరుగుతోంది. ఈ పరికరాలు ఒకే స్థాయిలో నిరంతర శబ్దాన్ని ఉత్పత్తి చేస్తాయి. దీనివల్ల చుట్టుపక్కల నుంచి అకస్మాత్తుగా వచ్చే పెద్ద శబ్దాలు వినిపించకుండా కొంతవరకు అడ్డుకోవచ్చు. సాధారణంగా రేడియో లేదా టీవీలో ప్రసారం లేనప్పుడు వినిపించే శబ్దాన్ని పోలి ఉండే ఈ ధ్వనిలో వినికిడి పరిధిలోని అన్ని పౌనఃపున్యాలు సమానంగా ఉంటాయి.

White Noise Machine | ఇటీవల నిద్రలేమి సమస్యలను తగ్గించేందుకు వైట్‌ నాయిస్‌ యంత్రాల వినియోగం పెరుగుతోంది. ఈ పరికరాలు ఒకే స్థాయిలో నిరంతర శబ్దాన్ని ఉత్పత్తి చేస్తాయి. దీనివల్ల చుట్టుపక్కల నుంచి అకస్మాత్తుగా వచ్చే పెద్ద శబ్దాలు వినిపించకుండా కొంతవరకు అడ్డుకోవచ్చు. సాధారణంగా రేడియో లేదా టీవీలో ప్రసారం లేనప్పుడు వినిపించే శబ్దాన్ని పోలి ఉండే ఈ ధ్వనిలో వినికిడి పరిధిలోని అన్ని పౌనఃపున్యాలు సమానంగా ఉంటాయి. ప్రస్తుతం కొన్ని పరికరాల్లో వర్షం కురుస్తున్నట్లుగా వినిపించే పింక్‌ నాయిస్‌, దూరంగా ఉరుములు వినిపించే బ్రౌన్‌ నాయిస్‌ వంటి శబ్దాలు కూడా అందుబాటులో ఉన్నాయి.

ఎలా ప‌నిచేస్తుంది..?

వైట్‌ నాయిస్‌ యంత్రాల ప్రధాన ప్రయోజనం నిద్రకు అనుకూలమైన వాతావరణాన్ని కల్పించడం. నిరంతరంగా వినిపించే మృదువైన శబ్దం వల్ల బయట నుంచి వచ్చే ఆకస్మిక ధ్వనులు కొంతవరకు తగ్గి, త్వరగా నిద్రపోవడానికి, నిద్ర మధ్యలో మేల్కొనకుండా ఉండడానికి సహాయపడతాయి. అలాగే, ఏకాగ్రతతో పని చేయడానికి కూడా ఈ శబ్దం ఉపయోగపడుతుంది. కార్యాలయాలు, గ్రంథాలయాలు, కేఫ్‌లలో చుట్టుపక్కల శబ్దాల వల్ల కలిగే అంతరాయాలను తగ్గించేందుకు వీటిని ఉపయోగిస్తున్నారు. ముఖ్యంగా చిన్నారులున్న తల్లిదండ్రులు ఈ పరికరాలపై ఆసక్తి చూపుతున్నారు. గర్భంలో ఉన్నప్పుడు శిశువుకు తల్లి శరీరంలోని రక్తప్రసరణ, జీర్ణక్రియ వంటి ప్రక్రియల వల్ల నిరంతర శబ్దాలు వినిపిస్తుంటాయి. అందువల్ల పూర్తిగా నిశ్శబ్దంగా ఉండే వాతావరణం కొందరు నవజాత శిశువులకు కొత్తగా అనిపిస్తుంది. వైట్‌ నాయిస్‌ శబ్దం వారికి ప్రశాంతత కలిగించడంతోపాటు, ఇంట్లో అకస్మాత్తుగా వచ్చే పెద్ద శబ్దాల వల్ల నిద్ర భంగం కాకుండా చూడవచ్చు.

ఎక్కువ శ‌బ్దంతో వింటే..

అయితే, ఈ పరికరాలను ఉపయోగించేటప్పుడు కొన్ని జాగ్రత్తలు తప్పనిసరి. ముఖ్యంగా అధిక శబ్దంతో ఎక్కువసేపు వినడం వల్ల వినికిడి సామర్థ్యంపై ప్రతికూల ప్రభావం పడే ప్రమాదం ఉంటుంది. చిన్నారులు, ముఖ్యంగా శిశువుల విషయంలో ఈ ప్రమాదం మరింత ముఖ్యమైనది. రోజంతా లేదా రాత్రంతా పెద్ద శబ్దంతో నిరంతరంగా వినిపించడం వల్ల పిల్లలు సహజంగా చుట్టుపక్కల శబ్దాలను గుర్తించే ప్రక్రియ, మాటలు నేర్చుకునే అభివృద్ధిపై ప్రభావం పడే అవకాశం ఉంటుందని ఆందోళనలు ఉన్నాయి. పిల్లలు భాషను నేర్చుకోవాలంటే ఇంట్లో మాట్లాడే మాటలు, సాధారణ శబ్దాలు వినడం కూడా అవసరం. అలాగే యంత్రం శబ్దానికి అలవాటుపడిన శిశువులకు అది లేకుండా నిద్రపోవడం కష్టంగా మారే అవ‌కాశం ఉంటుంది.

శిశువుల‌కు అవ‌స‌ర‌మా..?

ప్రతి శిశువుకూ వైట్‌ నాయిస్‌ యంత్రం అవసరం లేదు. కొందరు పిల్లలు సాధారణ ఇంటి వాతావరణంలోనే హాయిగా నిద్రపోతారు. కాబట్టి పరికరాన్ని కొనుగోలు చేసే ముందు శిశువు సహజ వాతావరణంలో ఎలా నిద్రపోతున్నాడో గమనించాలి. చుట్టుపక్కల శబ్దాల వల్ల నిద్రకు తరచూ ఆటంకం కలిగే వారికి మాత్రం ఇది ఉపయోగపడుతుంది. శిశువు కోసం ఉపయోగించేటప్పుడు యంత్రాన్ని ఊయల లేదా మంచానికి కనీసం రెండు మీటర్ల దూరంలో ఉంచాలి. మంచం లోపల లేదా దాని అంచులకు అమర్చకూడదు. శిశువు నిద్రించే చోట శబ్ద స్థాయి 50 డెసిబెల్స్‌ కంటే తక్కువగా ఉండేలా చూసుకోవాలి. అలాగే, రాత్రంతా నిరంతరంగా నడపకుండా, శిశువు గాఢ నిద్రలోకి వెళ్లిన తర్వాత 30 నుంచి 60 నిమిషాలకు ఆగిపోయేలా టైమర్‌ ఏర్పాటు చేసుకోవడం మంచిది. ప్రయోజనాలతోపాటు ప్రమాదాలను కూడా పరిగణనలోకి తీసుకుని, అవసరమైనప్పుడు పరిమిత సమయం పాటు మాత్రమే వీటిని ఉపయోగించడం ఉత్తమమ‌ని నిపుణులు చెబుతున్నారు.