Visit:
Excessive Water Drinking | మ‌నం ఆరోగ్యంగా ఉండాలంటే రోజూ పౌష్టికాహారాన్ని వేళ‌కు తీసుకోవ‌డం, వ్యాయామం చేయ‌డంతోపాటు రోజుకు త‌గిన‌న్ని నీళ్ల‌ను కూడా తాగాల్సి ఉంటుంద‌న్న విష‌యం అంద‌రికీ తెలిసిందే. నీళ్ల‌ను తాగ‌డం వల్ల అనేక జీవ‌క్రియ‌లు సాఫీగా సాగుతాయి. శ‌రీరం ఆరోగ్యంగా ఉంటుంది. రోగాలు రాకుండా సుర‌క్షితంగా ఉండ‌వ‌చ్చు. అయితే రోజుకు ఎవ‌రైనా స‌రే క‌నీసం 2 నుంచి 3 లీట‌ర్ల నీళ్ల‌ను లేదా 8 నుంచి 10 గ్లాసుల మేర నీళ్ల‌ను తాగాల్సి ఉంటుంద‌ని వైద్యులు మ‌న‌కు సూచిస్తుంటారు. ఇది నిజ‌మే అయిన‌ప్ప‌టికీ మ‌నం నివ‌సించే వాతావ‌ర‌ణ ప‌రిస్థితులు, మ‌న ఆరోగ్యం, ఉష్ణోగ్ర‌త, శ‌రీర బరువు, మ‌న‌కు ఉండే వ్యాధులు వంటి అంశాల‌ను ఆధారంగా చేసుకుని కూడా మ‌నం రోజూ నీళ్ల‌ను తాగాల్సి ఉంటుంది. ఈ క్ర‌మంలోనే వ్య‌క్తిని బ‌ట్టి రోజుకు తాగాల్సిన నీటి శాతం నిర్దారించ‌బ‌డుతుంది. అయితే నీళ్ల‌ను ఎవ‌రైనా స‌రే త‌గిన మోతాదులోనే తాగాల్సి ఉంటుంది. అలా అని మ‌రీ అతిగా తాగితే అనేక దుష్ప‌రిణామాల‌ను ఎదుర్కోవాల్సి వ‌స్తుంద‌ని వైద్యులు చెబుతున్నారు.
నీటిని మ‌రీ అతిగా తాగ‌డం వల్ల శ‌రీరంలో ద్ర‌వాలు అధికంగా చేరుతాయి. దీని వల్ల శ‌రీరంలో ఉండే ద్ర‌వాల ప‌రిమాణం మారుతుంది. ద్ర‌వాల స‌మ‌తుల్య‌త లోపిస్తుంది. దీంతో శ‌రీరంలో ల‌వ‌ణాల శాతం త‌గ్గుతుంది. ఫ‌లితంగా ద్ర‌వాలు ఎక్కువ‌గా చేరి శ‌రీరం వాపుల‌కు గుర‌వుతుంది. ముఖ్యంగా పాదాలు, క‌ళ్లు, ముఖం, చేతులు వాపుల‌కు గురై క‌నిపిస్తాయి. అలాగే కొంద‌రికి వికారంగా ఉండ‌డం, వాంతికి వ‌చ్చిన‌ట్లు అనిపించ‌డం వంటి ల‌క్ష‌ణాలు క‌నిపిస్తాయి. కొంద‌రికి కండ‌రాలు ప‌ట్టేస్తాయి. కండ‌రాలు నొప్పులుగా ఉంటాయి. ముఖ్యంగా రాత్రి పూట ఇలా ఎక్కువ‌గా జ‌రుగుతుంది. రాత్రి పూట నిద్ర‌లో కాలి పిక్క‌లు ప‌ట్టుకుపోతుంటాయి. అలాగే తీవ్ర‌మైన నీర‌సం, అల‌స‌ట ఉంటాయి. చిన్న ప‌నిచేసినా కూడా విప‌రీతంగా అల‌సిపోతారు.
నీటిని స‌రిగ్గా తాగ‌క‌పోతే ఏర్ప‌డే స్థితిని డీహైడ్రేష‌న్ అంటారు. అదే నీటిని మ‌రీ అతిగా సేవిస్తే ఏర్ప‌డే ప‌రిస్థితిని ఓవ‌ర్ హైడ్రేషన్ అంటారు. ఇవి రెండూ కూడా వాస్త‌వానికి ప్ర‌మాద‌క‌ర‌మే. ఈ రెండు సంద‌ర్భాల్లోనూ విప‌రీత‌మైన త‌ల‌నొప్పి వ‌స్తుంది. ర‌క్తంలో ఉప్పు శాతం త‌గ్గుతుంది. దీంతో క‌ణాలు వాపుల‌కు గుర‌వుతాయి. దీని వల్ల ఒళ్లు నొప్పులు, వాపులు వ‌స్తాయి. ఇక అధికంగా నీటిని తాగితే శ‌రీరంలో ఎల‌క్ట్రోలైట్స్ స్థాయిలు పెరుగుతాయి. దీని వల్ల కండ‌రాలు ప‌ట్టేయ‌డం, నొప్పులు వంటి స‌మ‌స్య‌లు వ‌స్తాయి. కండ‌రాల ప‌నితీరు మంద‌గించి కండ‌రాలు బ‌ల‌హీనంగా మారుతాయి. నీటిని మోతాదుకు మించి సేవిస్తే కిడ్నీల‌పై భారం ప‌డుతుంది. శ‌రీరంలో అధికంగా ఉండే ద్ర‌వాల‌ను బ‌య‌ట‌కు పంపేందుకు కిడ్నీలు శ్ర‌మించాల్సి వ‌స్తుంది. దీంతో కిడ్నీల‌పై ఒత్తిడి పెరుగుతుంది. దీర్ఘ‌కాలంలో ఇది కిడ్నీల డ్యామేజ్‌కు దారి తీస్తుంది. క‌నుక నీళ్ల‌ను మ‌రీ అతిగా సేవించ‌కూడ‌దు.
ఇక నీళ్ల‌ను మోతాదుకు మించి తాగ‌డం వల్ల శ‌రీరంలో పొటాషియం లెవ‌ల్స్ ప‌డిపోతాయి. దీని వల్ల ర‌క్త స‌ర‌ఫ‌రా త‌గ్గుతుంది. బీపీ అసాధార‌ణ రీతిలో పెరుగుతుంది. దీని ప్ర‌భావం గుండెపై ప‌డుతుంది. దీర్ఘ‌కాలంలో ఇది హార్ట్ ఎటాక్‌కు దారి తీసే అవ‌కాశం ఉంటుంది. అలాగే కాళ్ల నొప్పులు వ‌స్తుంటాయి. తీవ్ర‌మైన విసుగ్గా ఉంటుంది. మూడ్ మారుతుంది. ఎల్ల‌ప్పుడూ చిరాగ్గా ఉంటారు. కొంద‌రికి ఛాతిలో త‌ర‌చూ నొప్పి కూడా వ‌స్తుంది. నీళ్ల‌ను మోతాదుకు మించి అతిగా తాగ‌డం వల్ల ఎక్కువ సార్లు మూత్ర విస‌ర్జ‌న‌కు వెళ్లాల్సి వ‌స్తుంది. రాత్రి పూట ఈ స‌మ‌స్య మ‌రింత ఎక్కువ‌గా ఉంటుంది. దీంతో నిద్ర‌కు ఆటంకం క‌లుగుతుంది. దీని వల్ల ఒత్తిడి, ఆందోళ‌న సైతం పెరుగుతాయి. ఇలా అతిగా నీళ్ల‌ను తాగ‌డం వల్ల అనేక అన‌ర్థాల‌ను ఎదుర్కోవాల్సి వ‌స్తుంది. క‌నుక నీళ్ల‌ను రోజూ త‌గినంత మోతాదులోనే తాగాల్సి ఉంటుంది.
