Visit:
Vitiligo | చర్మంపై అకస్మాత్తుగా తెల్లని మచ్చలు కనిపిస్తే చాలామంది అవి బొల్లి (విటిలిగో) వ్యాధి వేగంగా వ్యాపిస్తోందని లేదా ఇతరులకు అంటుకుంటుందని భయపడుతుంటారు. అయితే ప్రతి తెల్లని మచ్చ బొల్లి వ్యాధే కాదు. అలాగే బొల్లి అంటువ్యాధి కూడా కాదని చర్మవ్యాధి నిపుణులు స్పష్టం చేస్తున్నారు. సరైన సమయంలో వైద్యులను సంప్రదిస్తే ఆధునిక చికిత్సలతో ఈ వ్యాధిని నియంత్రించడంతోపాటు చర్మం మళ్లీ సహజ రంగును పొందే అవకాశాలు కూడా ఉంటాయని చెబుతున్నారు. బొల్లి అంటే స్వయం ప్రతిరక్షక (ఆటో ఇమ్యూన్) చర్మవ్యాధి. ఇందులో చర్మానికి రంగును ఇచ్చే మెలనిన్ను ఉత్పత్తి చేసే మెలనోసైట్స్ అనే కణాలు దెబ్బతినడం లేదా నాశనం కావడం వల్ల చర్మంపై తెల్లని మచ్చలు ఏర్పడతాయి. ఈ ప్రక్రియలో శరీరంలోని రోగనిరోధక వ్యవస్థ పొరపాటున ఆరోగ్యకరమైన కణాలపైనే దాడి చేస్తుంది. దీనికి కచ్చితమైన కారణం ఇంకా పూర్తిగా తెలియకపోయినా జన్యుపరమైన, పర్యావరణ సంబంధిత అంశాలు కలిసి ప్రభావం చూపే అవకాశం ఉందని నిపుణులు చెబుతున్నారు.
బొల్లి అంటువ్యాధి కాదు. బాధితులను తాకడం, వారితో కలిసి భోజనం చేయడం, ఒకే టవల్ లేదా ఇతర వస్తువులు ఉపయోగించడం వల్ల ఈ వ్యాధి మరొకరికి వ్యాపించదు. అలాగే ఇది బ్యాక్టీరియా, వైరస్ లేదా పరాన్నజీవుల వల్ల వచ్చే వ్యాధి కూడా కాదు. కొన్ని ఆహారాలు తినడం, ఇన్ఫెక్షన్లు లేదా పరిశుభ్రత లోపం వల్ల బొల్లి వస్తుందనే నమ్మకానికి ఎలాంటి శాస్త్రీయ ఆధారాలు లేవు. ఈ వ్యాధి ఏ వయసులోనైనా వచ్చే అవకాశాలు ఉంటాయి. అయితే సాధారణంగా 30 ఏళ్లలోపు వయసులో ఎక్కువగా కనిపిస్తుంది. పిల్లలు, యువతలో కూడా ఇది వస్తుంది. కుటుంబంలో ఇప్పటికే బొల్లి లేదా ఇతర ఆటో ఇమ్యూన్ వ్యాధులు ఉన్నవారికి ఈ సమస్య వచ్చే అవకాశం కొంత ఎక్కువగా ఉంటుంది. అయితే కుటుంబ చరిత్ర లేకపోయినా కొందరిలో బొల్లి అభివృద్ధి చెందుతుంది.
బొల్లి కొందరిలో శరీరంలోని ఒకే ప్రాంతానికి పరిమితమై చాలా సంవత్సరాలు అలాగే ఉండిపోతుంది. మరికొందరిలో మాత్రం తెల్లని మచ్చలు క్రమంగా పెద్దవిగా మారడం లేదా శరీరంలోని ఇతర భాగాల్లో కొత్త మచ్చలు ఏర్పడడం జరుగుతుంది. వ్యాధి ఎలా పురోగమిస్తుందో ప్రతి వ్యక్తిలో భిన్నంగా ఉంటుంది. అధిక మానసిక ఒత్తిడి, చర్మానికి గాయాలు, తీవ్రమైన ఎండ వల్ల కలిగే సన్బర్న్ వంటి పరిస్థితులు కొందరిలో కొత్త మచ్చలు వచ్చే ప్రక్రియను వేగవంతం చేస్తాయి. అయితే దీనివల్ల ఇతరులకు ఎలాంటి ప్రమాదం ఉండదు. బొల్లి చికిత్సలో ప్రారంభ దశలోనే వైద్యులను సంప్రదించడం చాలా ముఖ్యమని నిపుణులు సూచిస్తున్నారు. ఆధునిక చికిత్సలతో చాలామందిలో చర్మం మళ్లీ సహజ రంగును పొందే అవకాశం ఉంటుంది.
ముఖ్యంగా ముఖంపై ఉండే చిన్న తెల్లని మచ్చలు త్వరగా మెరుగుపడే అవకాశాలు ఎక్కువగా ఉంటాయి. అయితే పెదవులు వంటి శ్లేష్మ పొరలపై లేదా ఎముకలు ఎక్కువగా ఉండే భాగాల్లోని మచ్చలకు చికిత్స ఫలితాలు కనిపించడానికి ఎక్కువ సమయం పడుతుంది. చర్మంపై కనిపించే ప్రతి తెల్లని మచ్చ బొల్లి అని భావించడం సరైంది కాదు. ఇతర చర్మవ్యాధుల వల్ల కూడా తెల్లని మచ్చలు ఏర్పడే అవకాశం ఉంటుంది. అందువల్ల కొత్తగా తెల్లని మచ్చలు కనిపించినా లేదా ఇప్పటికే ఉన్న మచ్చల్లో మార్పులు గమనించినా స్వయంగా మందులు వాడకుండా లేదా ఇంటి చిట్కాలను పాటించకుండా చర్మవ్యాధి నిపుణులను సంప్రదించి సరైన నిర్ధారణ, చికిత్స తీసుకోవడం ఉత్తమమని నిపుణులు సూచిస్తున్నారు.
