మూత్రం ఉగ్గబట్టుకోవద్దు!

పరిస్థితులను బట్టి కొన్నిసార్లు మూత్రాన్ని చాలాసేపు ఉగ్గబట్టుకుంటూ ఉంటారు. టాయిలెట్‌ వసతి లేకపోవడం, ఉద్యోగంలో సమావేశాల్లో తలమునకలవడం, ప్రయాణాల్లో ఉండటం మొదలైన వాటి కారణంగా మరో ప్రత్యామ్నాయం లేక ఇలాంటి పరిస్థితి ఎదురవుతుంది.

పరిస్థితులను బట్టి కొన్నిసార్లు మూత్రాన్ని చాలాసేపు ఉగ్గబట్టుకుంటూ ఉంటారు. టాయిలెట్‌ వసతి లేకపోవడం, ఉద్యోగంలో సమావేశాల్లో తలమునకలవడం, ప్రయాణాల్లో ఉండటం మొదలైన వాటి కారణంగా మరో ప్రత్యామ్నాయం లేక ఇలాంటి పరిస్థితి ఎదురవుతుంది. కొన్నిసార్లయితే బద్ధకం వల్ల కూడా మూత్రం ఉగ్గబట్టుకుంటూ ఉంటారు. ఎప్పుడో ఒకప్పుడంటే అంత ఇబ్బందిగా ఉండకపోచ్చు కానీ, మూత్రం ఉగ్గబట్టుకోవడం దీర్ఘకాలం కొనసాగితే మాత్రం అది మన లైంగిక, మెదడు సంబంధ, కిడ్నీల ఆరోగ్యంపై దుష్ప్రభావం చూపుతుందని నిపుణులు చెబుతున్నారు.

• మూత్రంలో 95 శాతం నీళ్లు, 2 శాతం యూరియా ఉంటాయి. మిగిలిన భాగం క్యాల్షియం, సోడియం, పొటాషియం లాంటి మినరల్స్‌ ఉంటాయి. మనం ఎక్కువసేపు మూత్రాన్ని పట్టి ఉంచితే క్యాల్షియం కిడ్నీల్లో స్ఫటికాలుగా పేరుకుపోతుంది. ఇది కిడ్నీల్లో రాళ్లు ఏర్పడే ముప్పును పెంచుతుంది.
• సాధారణంగా కిడ్నీలు రోజుకు 180 లీటర్ల నీటిని వడపోస్తాయి. మనం ఎక్కువ కాలంపాటు మూత్రాన్ని ఉగ్గబట్టుకుంటే కిడ్నీలు నీటిని వడబోసే సామర్థ్యం తగ్గిపోతుంది. సమస్య ముదిరిపోతే రక్తంలో ఇన్ఫెక్షన్‌ కూడా తలెత్తే ప్రమాదం ఉంది.
• ఇక మూత్రాశయంలో పల్విక్‌ కండరాలు మూత్రాన్ని పట్టి ఉంచుతాయి. దీర్ఘకాలంపాటు మూత్రాన్ని ఉగ్గబడితే ఈ పల్విక్‌ కండరాలు సాగుతాయి. ఒత్తిడి ఎక్కువగా పడటంతో లైంగిక ఆరోగ్యంపై దుష్ప్రభావం పడే ముప్పు ఉందని వైద్యులు హెచ్చరిస్తున్నారు.
• అంతేకాదు, మూత్రం ఎక్కువ సేపు ఉగ్గబట్టుకోవడం వల్ల మన శరీరం సహజంగా ఇచ్చే సంకేతాలను మనం విస్మరించినట్టు అవుతుంది. ఇది మన శరీరం మెదడు నుంచి వచ్చే సంకేతాలను స్వీకరించే విధానాన్ని కష్టతరం చేస్తుంది.