World Pneumonia Day | న్యుమోనియా రాకుండా ఇలా జాగ్రత్తపడండి..? ఇవాళ న్యుమోనియా అవగాహన దినం

World Pneumonia Day | న్యుమోనియా ఒక అంటువ్యాధి. కనిపెట్టకపోతే ప్రాణాంతకంగా మారుతుంది. చిన్నారుల్లో, వయోవృద్ధుల్లో ఎక్కువగా ఇబ్బంది పెడుతుంది. ఇతరత్రా సీరియస్‌ వ్యాధులకు కారణమవుతుంది.

World Pneumonia Day | న్యుమోనియా.. బ్యాక్టీరియా లేదా వైరస్‌ కారణంగా ఊపిరితిత్తులకు సంక్రమించే వ్యాధి. ఊపిరితిత్తుల్లోని గాలి సంచులు చీము, ద్రవాలతో ఉబ్బిపోతాయి. గాలి గదుల్లోకి బ్యాక్టీరియా లేదా వైరస్‌తో నిండిన ద్రవపదార్థం చేరడం వలన శ్వాస తీసుకోవడం కష్టంగా మారుతుంది. ఎవరైనా న్యుమోనియా బారిన పడవచ్చు. అయితే. కొన్ని కారకాలు మనలో ప్రమాదాన్ని పెంచుతాయి. ఇది సోకితే అది మరణాలకు కూడా దారి తీసే ప్రమాదం ఉంది. ఇది 5 సంవత్సరముల లోపు చిన్నారుల మరణాలలో 15 శాతంగా ఉండటం భయపెట్టే అంశంగా పేర్కొనాలి.

ఇన్‌ఫెక్షన్‌కు కారణమయ్యే సూక్ష్మక్రిమి రకం, మన వయసు, మన ఆరోగ్యంపై ఆధారపడి ఈ వ్యాధి తేలికపాటి నుంచి తీవ్రమైనదిగా ఉంటుంది. వైరల్ న్యుమోనియా వ్యాధులు కొవిడ్-19, ఇన్‌ఫ్లూయెంజా వైరస్, రెస్పిరేటరీ సిన్సిటియల్ వైరస్‌గా అత్యంత సాధారణంగా ముఖ్యంగా చిన్నారుల్లో గుర్తించారు. బ్యాక్టీరియాలో స్ట్రెప్టోకోకస్ న్యుమోనియా, మైకోప్లాస్మా, హేమోఫిలస్ ఇన్‌ఫ్లుఎంజా అనేవి సాధారణ కారకాలు.

దీని బారిన పడేవారెవరంటే..!

• 2 లేదా అంతకంటే తక్కువ వయసున్న పిల్లలు
• 65 అంతకంటే ఎక్కువ వయస్సు పెద్దవారు
• దవాఖానలోని ఐసీయూలో వెంటిలేటర్‌పై ఎక్కువ రోజులు ఉన్నవారు
• ఆస్తమా, దీర్ఘకాలికి సీఓపీడీ, గుండె వ్యాధులు ఉన్నవారు
• సిగరెట్‌ స్మోకింగ్‌ అధికంగా చేసేవారు
• బలహీనమైన రోగనిరోధక వ్యవస్థ కలిగిఉన్నవారు
• కొన్ని రసాయనాలు, కాలుష్య కారకాలకు గురైనవారు
• విషపూరిత పొగలకు గురయ్యేవారు

దీని లక్షణాలిలా ఉంటాయ్‌..!
ఈ వ్యాధికి గురైన వారు దగ్గు, రక్తంతో కూడిన కఫం , చలి జ్వరం, శ్వాస కోశాల్లో నొప్పి, ఛాతీ భాగంలో నొప్పి, తలనొప్పి, ఆక్సిజన్‌ స్థాయిల్లో హెచ్చుతగ్గులు వంటి లక్షణాలు కనిపిస్తాయి. కొందరిలో వికారం, వాంతులు లేదా విరేచనాలు కలుగుతాయి. న్యుమోనియా వ్యాధిని తీసుకొచ్చే కారకాన్ని బట్టి వివిధ రకాలుగా ఉంటుందని చాలా మందికి తెలియదు. వైరల్, బ్యాక్టీరియల్ న్యుమోనియా అందరిలో చాలా సాధారణం. తొలి దశలో ఉన్నప్పుడు గుర్తిస్తే సరైన చికిత్స పొందడానికి వీలుంటుంది. ఒక్కోసారి వృద్ధుల్లో సాధారణం కంటే తక్కువ ఉష్ణోగ్రతలు కనిపిస్తుంటాయి.

ఇది అంటువ్యాధా..?
న్యుమోనియా అంటువ్యాధి. వ్యాధి సోకిన వ్యక్తి దగ్గడం, తుమ్మడం వల్ల క్రిములు మనం పీల్చే గాలిలోకి వ్యాప్తిచెందుతాయి. వ్యాధికి గురైన వారి పరిసరాల్లోని వస్తువుల ఉపరితలాలపై వ్యాధికారక సూక్ష్మక్రిములు ఉంటాయి. ఈ వైరస్‌లు లేదా బాక్టీరియాలు నేల మీద లేదా ఇతరత్రా వస్తువుల మీద ఉన్న సందర్భాలలో వాటిని తాకినపుడు కూడా వ్యాప్తి చెందుతుంది. మన చుట్టూ ఉన్న వాతావరణంలో ఉండే పంగస్‌ల కారణంగా కూడా న్యుమోనియా వచ్చే అవకాశాలు ఉంటాయి. అయితే ఫంగస్‌ల కారణంగా వచ్చే న్యుమోనియా అంటువ్యాధి కాదు.

ఎలా నిర్ధారించుకోవాలి..?
గాలి పీల్చే, వదిలే సందర్భాల్లో వచ్చే శబ్దాలను స్టెతస్కోప్‌ ఆధారంగా విని గుర్తించవచ్చు. రక్తపరీక్ష, ఊపిరితిత్తుల ఎక్స్‌రే, పల్స్‌ ఆక్సిమెట్రీ, గళ్ల పరీక్ష, సిటి స్కాన్‌ వంటి పరీక్షల ద్వారా కూడా వ్యాధిని నిర్ధారించుకోవచ్చు.

ఎలాంటి జాగ్రత్తలు తీసుకోవాలి..?

• పరిశుభ్రత పాటించడం వలన ఈ వ్యాధికారక క్రిములను అదుపులో పెట్టవచ్చు.
• నిత్యం తగినంత ద్రవాలు తీసుకుని శరీరాన్ని హైడ్రేట్‌గా ఉంచాలి.
• నీరు, సూప్‌లు, తేనె నిమ్మరసం కలిపిన నీరు తాగుతుండాలి.
• సిగరెట్‌ స్మోకింగ్‌, ఆల్కహాల్‌కు, కెఫిన్‌ పదార్థాలను దూరం పెట్టాలి.
• ఇంటి నుంచి బయటకు వెళ్లకుండా చూసుకోవాలి.
• శరీరం తల, ఛాతీ కంటే కొద్దిగా ఎత్తులో ఉండేలా దిండ్లను వాడాలి.
• ఇంటి పనులు ఎక్కువగా చేయకుండా చూసుకోవాలి.
• తుమ్మడం, దగ్గడం చేయాల్సి వస్తే నోటికి చేతులు అడ్డుగా పెట్టుకోవాలి.
• సొంతంగా ఔషధాలు తీసుకోకుండా వైద్యులను సంప్రదించాలి.
• ఊపిరిత్తుల్లోని శ్లేష్మాన్ని వదులు చేసేందుకు వేడినీటితో స్నానం చేయాలి.
• ఊపిరితిత్తుల నుంచి శ్లేష్మం బయటకు వచ్చేందుకు శ్వాస వ్యాయామాలు చేయాలి.
• పండ్లు, కూరగాయలు, ఫైబర్‌ వంటి వాటితో కూడిన పోషకాహారం తీసుకోవాలి.

రాకుండా ఎలా నిరోధించాలి..?

• వ్యాక్సినేషన్‌ తీసుకోవాలి.
• 6 నెలల వయసు వరకు తల్లిపాలు ఇవ్వాలి
• పోషకాహార లోపాన్ని నిరోధించుకోవాలి
• పొగకు దూరంగా ఉండాలి
• రద్దీ ప్రదేశాలకు వెళ్లకుండా చూసుకోవాలి
• వైద్యుల సూచనతో యాంటీ బయోటిక్స్‌, యాంటీ వైరల్స్‌ తీసుకోవాలి.

గమనిక: ఈ కథనం కేవలం పాఠకుల అవగాహన కోసమే అందిస్తున్నాం. ఆరోగ్యానికి సంబంధించి ఏ సమస్యకైనా వైద్యులను సంప్రదించడం శ్రేయస్కరం.