మైక్రో మెడిటేషన్‌ ప్రయత్నిస్తారా!

ధ్యానం శారీరక, మానసిక ఆరోగ్యానికి ఎంతో మేలు చేసేదని తెలిసినా... ఉరుకులు పరుగుల జీవితంలో దాని కోసం ఓ అరగంట సమయాన్ని కేటాయించలేకపోతున్నామని చాలామంది బాధపడుతుంటారు.

ధ్యానం శారీరక, మానసిక ఆరోగ్యానికి ఎంతో మేలు చేసేదని తెలిసినా… ఉరుకులు పరుగుల జీవితంలో దాని కోసం ఓ అరగంట సమయాన్ని కేటాయించలేకపోతున్నామని చాలామంది బాధపడుతుంటారు. మెడిటేషన్‌ పట్ల, దాని ద్వారా ఒనగూరే లాభాల పట్లా అవగాహన ఉన్నా, తీరిక లేకపోవడం వల్ల వాటిని అందిపుచ్చుకోలేక పోతుంటారు. అలాంటి వాళ్ల కోసమే ఇప్పుడు ఒక కొత్త విధానం కూడా తెరమీదకి వచ్చింది. అదే ‘మైక్రో మెడిటేషన్‌’. అంటే మనం ఏదైనా ముఖ్యమైన పని ప్రారంభించే ముందు కొద్ది నిమిషాల పాటు మౌనంగా కూర్చుని ధ్యానం చేయడం అన్నమాట.

• మైక్రో మెడిటేషన్‌ను సాధారణ ధ్యానంలా ఉదయం, సాయంత్రం.. ఇలా ఫలానా సమయంలోనే చేయాలన్న నియమేం లేదు. ప్రత్యేకమైన ప్రదేశాన్ని ఎంచుకోవాలన్న పట్టింపూ లేదు.
• మనకు అందుబాటులో ఉన్న స్థలంలో ప్రశాంతంగా కూర్చుని కళ్లు మూసుకునే వీలుంటే చాలు. 30 సెకన్ల నుంచి 5 నిమిషాల సమయం వరకూ దీన్ని చేయొచ్చు.
• ఇది చేయాలంటే ముందు ప్రశాంతంగా కూర్చుని మూడుసార్లు నిదానంగా ఊపిరి తీసుకోవడం వదలడం చేయాలి. తర్వాత మన అవకాశాన్ని బట్టి దాన్ని పొడిగించాలి.
• ఏదైనా ముఖ్యమైన నమావేశం ఉన్నప్పుడు, ఒక పని పూర్తి చేసి మరో పని మొదలు పెట్టే మధ్యలో, ఏదైనా తీవ్రమైన ఒత్తిడికి గురవుతున్న సందర్భంలోనూ, నిద్రపోయే ముందు… ఇలా మనకు ఎప్పుడు విరామం అవసరం అనిపించినా అప్పుడు ఈ సూక్ష్మ ధ్యానాన్ని ప్రయత్నించవచ్చు.
• ఒక రోజులో అప్పుడప్పుడు చేస్తూ, అలా క్రమం తప్పకుండా చేయడం వల్ల మంచి లాభాలు పొందవచ్చట. అప్పటికప్పుడు ఆందోళనను తగ్గించి, ఏకాగ్రతను పెంచడానికి ఇది ఉపయోగపడినా, అదో అలవాటులా చేస్తూ ఉండటం వల్ల ఆలోచనల్లో స్పష్టత, నాడీ వ్యవస్థకు సాంత్వనలాంటి పెద్ద లాభాలూ కలుగుతాయట. సూక్ష్మంలోనే మోక్షం కావాలనుకునే వాళ్లకి మంచి మార్గం ఈ మైక్రో మెడిటేషన్‌.