National Nutrition Week | శరీరానికి అవసరమైన పోషకాలు అందాలంటే.. ఇలా చేయండి

National Nutrition Week | మనం ఆరోగ్యంగా జీవించాలంటే పోషకాహారం తప్పనిసరి. పోషకాలు సక్రమంగా అందకపోతే మన రోగ్యనిరోధక వ్యవస్థ యాక్టీవ్‌గా ఉండదు. ఫలితంగా వివిధ వ్యాధులను...

National Nutrition Week | మనం ఆరోగ్యంగా జీవించాలంటే పోషకాహారం తప్పనిసరి. మనం తీసుకునే ఆహారంలో ఒకటి లేదా అంతకన్నా ఎక్కువ పోషక పదార్థాలు లోపించిన ఆహారాలను తీసుకోవడాన్ని పోషకాహార లోపంగా పరిగణిస్తారు. ఉపవాసాలు చేయడం, అనారోగ్య పరిస్థితులు, పేదరికం, మూఢనమ్మకాలు, అవగాహనారాహిత్యం, ఆర్థిక కారణాలు, అపరిశుభ్రత వంటివి ముఖ్య కారణాలుగా చెప్పుకోవచ్చు. పోషకాహార లోపంతో ఎందరో హాస్పిటళ్లలో చేరుతూ ప్రాణం మీదికి తెచ్చుకుంటున్నారు. అందుకే పోషకాహారంపై తగిన అవగాహన కలిగించేందుకు ఏటా సెప్టెంబర్‌ 1 నుంచి వారం రోజులపాటు జాతీయ పోషకాహార వారం నిర్వహిస్తారు.

ఆరోగ్యకరమైన మనుగడ, ఎదుగుదల కోసం పోషకాల అవసరం ఎంతో ఉంటుంది. కార్బోహైడ్రేట్లు, ఫైబర్లు, కొవ్వులు, ప్రోటీన్లు, ఖనిజాలు, ప్రోటీన్లు, విటమిన్లు, నీరు వంటి పోషకాలు మనల్ని సదా ఆరోగ్యంగా ఉంచడానికి ఉపయోగపడతాయి. వీటిని సమపాళ్లలో నిత్యం మన ఆహారంలో భాగం చేసుకోవడం ద్వారా పోషకాహార లోపానికి గురికాకుండా చూసుకోవచ్చు. పోషకాలు సక్రమంగా అందకపోతే మన రోగ్యనిరోధక వ్యవస్థ యాక్టీవ్‌గా ఉండదు. ఫలితంగా వివిధ వ్యాధులను ఎదుర్కోవాల్సి వస్తుంది.

ఇలా అందించాలి..

• పిల్లలకు 7 నెలల నుంచి జావ, కూరగాయాలు, పండ్లతో గుజ్జుగా చేసిన ఆహారాలను నిత్యం రెండుసార్లు 250 మిల్లీ లీటర్ల చొప్పున అందించాలి.
• 11 నెలల లోపు చిన్నారులకు ఆహారం గుజ్జుగా చేసి రోజుకు మూడుసార్లు 250 మిల్లీ లీటర్ల చొప్పున ఇవ్వాలి.
• విటమిన్‌ ఏ లోపంతో రేచీకటి, కార్నియల్‌ క్యూరోసిస్‌ వ్యాధుల నివారణకు పాలు, పాలపదార్థాలు, ఆకు కూరలు, పసుపు పచ్చ కూరగాయలు, క్యారెట్‌, గుమ్మడి తినాలి.
• ఇనుము లోపంతో వచ్చే అనీమియా వ్యాధి నివారణకు రెడ్‌ మీట్‌, గుడ్డులోని పసుపు సొన, ధాన్యాలు,
• ఆకుకూరలు, శనగలు, నువ్వులు, చిక్కుళ్లు, పప్పులు, బెల్లం, డ్రై ప్రూట్స్‌, మొలకెత్తిన పప్పు ధాన్యాలు తీసుకోవాలి.
• అయోడిన్‌ లోపంతో వచ్చే గ్రంథివాపు వ్యాధి నివారణకు అయోడిన్‌ కలిగిన ఉప్పును వాడాలి.

ప్రధాన సంకేతాలు..

• నిర్దిష్ట పోషకాహార లోపం వల్ల కలిగే వ్యాధి లక్షణాలు కూడా ఆ పోషక లోపానికి సంబంధించినవే అయి ఉంటాయి.
• మన రోజువారీ కార్యకలాపాల్లో ఈ పోషకాహార సంకేతాలు, వ్యాధి లక్షణాలను చూడొచ్చు.
• అలసట, బరువు తక్కువగా ఉండటం, రక్తహీనత, కండరాల తిమ్మిరి, జుట్టు ఊడిపోవడం, చర్మం పాలిపోవడం, వేళ్లలో తిమ్మిర్లు, సున్నితమైన ఎముకలు, దృష్టిలోపాలు, మూర్చ, మానసిక ఆనారోగ్యం, గాయిటర్‌ వ్యాధి, మలబద్ధకం వంటి సంకేతాలు కనిపిస్తాయి.
• వీటి ఆధారంగా మనలో పోషకాహార లోపం ఉన్నట్లుగా గుర్తించి తగు రీతిన చర్యలు తీసుకోవాలి.

ఉద్యోగులు పని ఒత్తిళ్ల కారణంగా ఒకటికి నాలుగు సార్లు కాఫీలు, టీలు తీసుకోవడం, కనిపించగానే సమోసాలు, పిజ్జాలను ఆబగా లాగించేస్తున్నారు. ఇది అనేక వ్యాధులకు గురిచేస్తుందని తెలిసినా.. కడుపు నింపుకోవడానికి అందుబాటులో ఉన్న ఏదో ఒక ఆహారాన్ని తీసుకుంటున్నారు. ఫలితంగా పోషకాహారం సక్రమంగా అందక అనేక వ్యాధులకు లోనవుతున్నారు. ‘తిండి కలిగితే కండగలదోయ్, కండ కలవాడే మనిషోయ్’ అని ఓ కవి చెప్పినట్లు.. ఆరోగ్యానికి అవసరమైన సమతుల ఆహారాన్ని తీసుకోవడం చాలా ముఖ్యం. రుచికోసం ఫాస్ట్‌ఫుడ్ సెంటర్ల వద్దకు వెళ్లి రోగాలు కోరి తెచ్చుకుండా చూసుకోవాలి.

గమనిక: ఈ కథనం కేవలం మీ అవగాహన కోసమే అందిస్తున్నాం. ఆరోగ్యానికి సంబంధించి ఏ సమస్యకైనా వైద్యులను సంప్రదించడం శ్రేయస్కరం.