వికారం..మంచిదే!

గర్భిణుల్లో వేవిళ్లు రావడం, వికారంగా అనిపించడం సహజమే! అయితే, ఇవన్నీ మంచి సంకేతాలనే అంటున్నారు వైద్యరంగ నిపుణులు. అలాగే, వాంతుల వల్ల కడుపులో బిడ్డకు ఎలాంటి కష్టం, నష్టం ఉండదనీ చెబుతున్నారు.

గర్భిణుల్లో వేవిళ్లు రావడం, వికారంగా అనిపించడం సహజమే! అయితే, ఇవన్నీ మంచి సంకేతాలనే అంటున్నారు వైద్యరంగ నిపుణులు. అలాగే, వాంతుల వల్ల కడుపులో బిడ్డకు ఎలాంటి కష్టం, నష్టం ఉండదనీ చెబుతున్నారు. అంతేకాదు.. వాంతులు ఎక్కువగా వస్తే, అబార్షన్‌ అయ్యే అవకాశం తక్కువగా ఉంటుందనీ అంటున్నారు. తాజా అధ్యయనాల్లో ఈ విషయాలు తెలిసినట్టు వెల్లడిస్తున్నారు. గర్భధారణ సమయంలో ఉత్పత్తి అయ్యే ‘హ్యూమన్‌ కోరియోనిక్‌ గోనాడోట్రోపిన్‌’ అనే హర్మోన్‌ ప్రభావం వల్లే.. వికారం, వాంతులు వస్తాయని చెబుతున్నారు. నిజానికి ఈ హార్మోన్‌.. గర్భాశయ పొరను మందంగా చేయడంలో సాయపడుతుంది. ఆ విధంగా, కడుపులో పెరిగే పిండానికి రక్షణనిస్తుంది. అయితే.. వికారం, వాంతులు అధికంగా ఉంటే మాత్రం గర్భిణులు ఇబ్బంది పడాల్సి వస్తుందనీ, అలాంటి సమయాల్లో కొన్ని జాగ్రత్తలు పాటించాలని సూచిస్తున్నారు.

• గర్భిణుల్లో వికారం, వాంతులు రావడం చాలా సాధారణ విషయమనే సంగతి గుర్తుంచుకోవాలి. కంగారు పడిపోకుండా.. ప్రశాంతంగా ఉండాలి.
• వికారాన్ని తగ్గించే లక్షణాలు ఉండే ‘అల్లం’ను ఆహారంలో భాగం చేసుకోవాలి. అల్లం టీ, అల్లం క్యాండీలు తీసుకుంటే.. వికారం తగ్గుతుంది.
• ఒకేసారి కడుపు నిండా తినకుండా.. తక్కువ తక్కువగా ఎక్కువసార్లు భోజనం చేయాలి.
• రోజంతా హైడ్రేటెడ్‌గా ఉండటానికి తగినన్ని నీళ్లు తాగాలి.
• వికారం కలిగించే భోజనాలు, వాసనలకు దూరంగా ఉండాలి.
• రోజువారీ ఆహారంలో అధిక ప్రొటీన్‌ ఉండేలా చూసుకోవాలి.
• మోషన్‌ సిక్‌నెస్‌ను తగ్గించే సీ-బ్యాండ్స్‌ లాంటి వాటిని ఆశ్రయించండి. ఈ రిస్ట్‌బ్యాండ్‌లు శరీరంపై సున్నితమైన ఒత్తిడిని కలిగిస్తూ.. వికారం నుంచి ఉపశమనాన్ని కలిగిస్తాయి.
• ఇన్ని జాగ్రత్తలు తీసుకున్నప్పటికీ వికారం తీవ్రంగా ఉంటే.. వెంటనే వైద్యులను సంప్రదించండి.