మడమ తిప్పని.. మహా సమస్య!

శరీరాన్ని కుదురుగా నిలబెట్టేవి పాదాలే అయినా, మన బరువును మోసేది మాత్రం మడమలే. వాటికి నొప్పి పుడితే అడుగులు వేయడం కూడా కష్టం అవుతుంది.

శరీరాన్ని కుదురుగా నిలబెట్టేవి పాదాలే అయినా, మన బరువును మోసేది మాత్రం మడమలే. వాటికి నొప్పి పుడితే అడుగులు వేయడం కూడా కష్టం అవుతుంది. దీంతో, మన దినచర్య నెమ్మదిస్తుంది. చిన్న వయసులోనే వృద్ధాప్య లక్షణాలు కనిపిస్తాయి.

పాదం మనిషికి ఆధారం. ఎంతదూరం నడిస్తే అంత జీవితానుభవం సంపాదించినట్టు లెక్క. ఆ జ్ఞానానికే మనం పాదాభివందనం చేస్తాం. మనతో అడుగులు వేయించే పాదాలకు కనుక నొప్పి వస్తే, బతుకు నరకమే అవుతుంది. ఈ అసౌకర్యానికి అనేక కారణాలు..

1. మడమలను, కాలివేళ్ల ఎముకలను కలిపే పట్టీలో వాపు-ప్లాంటార్‌ ఫసైటిస్‌.
2. పాదాల్లో మడమ భాగంలో ఎముక పెరగడం వల్ల తలెత్తే- హీల్‌ స్పర్స్‌.
3. కాలు, మడమ ఎముకల కండరాలను కలిపే పట్టీకి గాయం కావడం వల్ల వచ్చే-అకిలీస్‌ టెండనైటిస్‌.
4. మడమల్లో నరాలు కుంచించుకుపోవడం-నర్వ్‌ కంప్రెషన్‌.
5. మడమల ఎముకల్లో పగుళ్లు-స్ట్రెస్‌ ఫ్రాక్చర్‌ ఆఫ్‌ హీల్‌ బోన్‌.

సమస్య మూలాలు

చాలాసార్లు మడమ నొప్పికి అసలు కారణాలు తెలియవు. కాకపోతే కొన్ని సమస్యలను ఈ నొప్పికి దారితీసేవిగా అనుమానించవచ్చు (అఫెండర్స్‌). అవి…

1. అధిక బరువు.
2. అరికాళ్ల మధ్య ఖాళీ లేకుండా పాదం పూర్తిగా నేలకు ఆనడం (ఫ్లాట్‌ ఫీట్‌) లేదా ఆ ఖాళీ మరీ ఎక్కువగా ఉండటం (హై ఆర్చెస్‌).
3. పాదాలకు అనువుగా లేని షూస్‌ ధరించడం.
4. నడవడం, పరిగెత్తడం మూలంగా పాదాల మీద ఎక్కువ ఒత్తిడిపడటం (ఎక్సెసివ్‌ అనక్కస్టమ్డ్‌ స్ట్రెయిన్‌).
5. కీళ్లనొప్పులు, నరాల సమస్యలు, మధుమేహం, అధిక యూరికామ్లం లాంటి ఆరోగ్యపరమైన కారణాలు.

గుర్తించడం ఎలా?

• పొద్దున్న లేవగానే తొలి అడుగులు వేస్తున్నప్పుడే.. లేదంటే ఏదైనా పని చేయడానికి లేచి నిల్చున్నప్పుడు మడమల్లో నొప్పిగా అనిపించడం.
• మడమల దగ్గర వాపు లేదా ఎర్రగా కందిపోవడం.
• మడమల్లో తీవ్రమైన నొప్పి లేదంటే కాలివేళ్లు, పాదాల మధ్యభాగంలో సూదితో పొడుస్తున్నట్టుగా నొప్పి అనిపించడం.
• నడవడానికి ఇబ్బంది.

నివారణ ఇలా..

• కొన్ని చిన్నచిన్న జీవనశైలి మార్పులతో మడమ నొప్పిని నివారించవచ్చు.
• వేళ్లు, మడమలకు అతికినట్టు సరిపోయే షూ ధరించాలి.
• షూలో సిలికాన్‌ హీల్‌ కుషన్‌ చేర్చుకుంటే మంచిది.
• శరీర బరువు తగినంత ఉండేలా చూసుకోవాలి.
• వాకింగ్‌, రన్నింగ్‌ ఏకబిగిన చేయకుండా మధ్యలో విరామం ఇవ్వాలి.
• మడమలు, అరికాళ్లు సాగదీయడానికి (స్ట్రెచింగ్‌) సంబంధించిన చిట్కాలు పాటించాలి.

నిర్లక్ష్యం వద్దు

మడమల నొప్పిని తేలిగ్గా తీసుకోవద్దు. కొంత అవగాహన, సంరక్షణతో పాదాల్ని ఆరోగ్యంగా ఉంచుకోవచ్చు. ఎన్ని జాగ్రత్తలు తీసుకున్నా నొప్పి అలానే వేధిస్తుంటే మాత్రం.. చికిత్స కోసం డాక్టర్‌ను సంప్రదించాలి. నిర్లక్ష్యం చేస్తే దీర్ఘకాలిక నొప్పి వెంటాడుతుంది. నడవటం కూడా కష్టం అవుతుంది.